Aua Tou te Fefefe

1. O ā luʻitau e tai pei o faafitauli na feagai ma Ieremia e ono oo iā i tatou?

¹ Ina ua tofia Ieremia e avea ma perofeta, sa ia lagona le faatauvaa ma lē agavaa e faataunuu le tofiga. Peitaʻi na faamautinoa mai e Ieova ma fetalai mai i ai, “aua e te fefe,” ma faamalosia ma le agalelei o ia e faataunuu lona tofiga. (Iere. 1:6-10) E faapena foʻi i o tatou aso, e ono fetoʻi lo tatou auai i le faiva ona o le matamuli po o le leai o se mautinoa. E mafai foʻi ona avea le fefe, ma le popole i le auala e ono tali mai ai pe manatu ai tagata iā i tatou ma māfuaaga e tatou te lē molimau ai i tagata i nisi taimi. E faapefea ona tatou foʻia le fefe, ma o ā faamanuiaga mo i tatou e mafai ona iʻu i ai?

2. E faapefea ona fesoasoani sauniuniga iā i tatou ia faaitiitia le fefe po o le popole e auai i le faiva?

² Ia Muaʻi Sauniuni: A lava sauniuniga e fai, e telē se fesoasoani i le faaitiitia o le fefe po o le popole. O se faataʻitaʻiga, afai tatou te muaʻi autaluina manatu e ono taofia ai le talanoaga e ono tulaʻi mai, o le a tatou sauniuni la e tali atu i teteega e masani ai. (Faata. 15:28) I le Tapuaʻiga a le Aiga, aiseā e lē faaaogā ai se taimi e fai ai ni faataʻitaʻiga e sauniuni ai mo faafitauli e tulaʻi mai i aʻoga ma le faiva?—1 Pete. 3:15.

3. E faapefea ona fesoasoani iā i tatou le faalagolago iā Ieova e faateʻa ai le fefe?

³ Faalagolago iā Ieova: O le vaifofō mautinoa lava mo le fefe o le faalagolago i le Atua. Ua faamautinoa mai e Ieova o le a fesoasoani iā i tatou. (Isa. 41:10-13) O le ā la se isi puipuiga tatou te toe mananaʻo i ai? E lē gata i lea, ua faamautinoa mai iā i tatou e Iesu e tusa lava pe tutupu mai mea tatou te leʻi faatalitalia, e tatou te mafaia lava e ala i le agaga paia o le Atua ona avatu se molimau i se auala sili ona lelei. (Mare. 13:11) O le mea lea, ia ōle atu e lē aunoa iā Ieova mo lona agaga paia.—Luka 11:13.

4. O ā faamanuiaga e iʻu i ai pe a tatou faaauau ai pea i le faiva e ui lava i faafitauli?

⁴ Faamanuiaga: A o tatou faaauau ai pea i le faiva e ui lava i faafitauli, e faamalosia ai i tatou e fesagaʻia ma le manuia faafitauli i le lumanaʻi. Tatou te atiaʻe ai le lototele ma le faamalosi—o uiga ia e mātaulia ai i latou e faatumulia i le agaga paia. (Galu. 4:31) E lē gata i lea, a o tatou foʻia le fefe ona o le fesoasoani a Ieova, e faamalosia ai lo tatou faatuatua ma lo tatou talitonuina o lona aao faaola. (Isa. 33:2) E tatou te maua ai foʻi le olioli ma le lotomalie lea e maua i lo tatou iloa o loo tatou faamalieina lo tatou Tamā o i le lagi. (1 Pete. 4:13, 14) Tau ina ia aua lava tatou te fefefe e faalauiloa atu ma le faamalosi le feʻau o le Malo, ia lē aunoa ona manatua e fesoasoani mai Ieova!