ʻAvatu se Molimau Māeʻaeʻa’ e Faatatau i le Malo o le Atua
1. O le ā le tusi o le a amata ona tatou talanoaina i le Suʻesuʻega Faale-Tusi Paia a le Faapotopotoga i le vaiaso o Iulai 23?
1 I le vaiaso o Iulai 23, 2012, o le a amata ai ona tatou talanoaina i le Suʻesuʻega Faale-Tusi Paia a le Faapotopotoga le tusi ʻAvatu se Molimau Māeʻaeʻa’ e Faatatau i le Malo o le Atua. O loo talanoaina i lenei lomiga le tusi o Galuega i se auala e mafai ai ona lagona e le tagata faitau, le naunau fiafia i mea e tele na tutupu o loo faamauina ai. Nai lo o le faamatalaina o fuaiupu taʻitasi, o loo aumaia i le tusi Avatu se Molimau ni lesona mai i tala o loo tusia i le tusi o Galuega, ma fesoasoani e iloa ai le auala e mafai ona tatou faatatauina ai iā i tatou lava.—Roma 15:4.
2. Faamatala mai nisi o vala mataʻina o le tusi Avatu se Molimau.
2 Vala Mataʻina o le Tusi: I le faatomuaga i le itulau e 2, o loo iai se tusi faalaeiau mai le Vaega Pule, e faailoa mai ai le auala e latou te mananaʻo ia tatou maua ai aogā mai i lenei lomiga. E amata mai i le mataupu e 2, o loo iai se faaupuga e taaofaʻi ai manatu o loo i mataupu taʻitasi, ma se mau e iloa ai le vaega o le tusi o Galuega o le a talanoaina. I le tele o mataupu, o loo iai ni pusa e iai faamatalaga faaopoopo o loo faamatala mai ai talaaga o tagata, nofoaga po o mea na tutupu. O loo iai avanoa i autafa o itulau e fai ai a tatou faamaumauga. O loo iai i le tusi le tele o talafaatusa e auʻiliʻili mai ai vaaiga faale-Tusi Paia, e fesoasoani iā i tatou e iloa ai mea tāua na tutupu, ma o loo iai i le itulau mulimuli se faasino ata e faamatala mai ai mea o loo tutupu i ata eseese. I totonu i le faavaa pito i luma ma le pito i tua, o loo iai faafanua e fesoasoani iā i tatou e iloa ai vaipanoa na ō atu i ai uso tapuaʻi i le uluaʻi senituri, a o latou faasalalau atu le tala lelei i “tuluʻiga uma o le lalolagi.”—Galu. 1:8.
3. O ā fesili tāua o le a taliina i lo tatou suʻesuʻeina o le tusi o Galuega?
3 Tali i Fesili Tāua: O le iloiloina o le tusi o Galuega, o le a fesoasoani iā i tatou ina ia manino lelei ai i tali o fesili tāua e uiga i le faiva faa-Kerisiano. Mo se faaaʻoaʻoga, o le ā le galuega ma le feʻau e mātaulia ai soo moni o Iesu Keriso? O ai o loo faatonutonuina lenei galuega talaʻi i le lalolagi aoao, ma e faapefea? O ā avanoa e maua e tagata talaʻi ona o sauāga ma teteega? O le ā le vaega a le agaga paia e fai i la tatou faiva?
4. E ono mafai faapefea ona tatou maua atoatoa aogā mai i le iloiloina o lenei lomiga?
4 Ina ia maua atoatoa aogā, ia suʻesuʻe muamua le mataupu ma sauni e fai se sao i le talanoaga a le faapotopotoga. Ia auai i sauniga uma, ma manatunatu i le auala e mafai ona e faatatauina ai i lau faiva lesona ua e aʻoaʻoina. Tau ina ia avea lo tatou iloiloina o lenei lomiga manaia, ma itu e faagaeeina ai i tatou e avatu se molimau māeʻaeʻa e faatatau i le Malo o le Atua!—Galu. 28:23.