E Manaʻomia le Onosaʻi a o Talaʻi
1. Ua faapefea ona faaalia mai e Ieova lona onosaʻi i tagata?
1 E onosaʻi mai lava Ieova i tagata. (Eso. 34:6; Sala. 106:41-45; 2 Pete. 3:9) O se tasi o faailoaga sili o lona onosaʻi ua faaalia lea i le galuega talaʻi i le lalolagi aoao. Ua toeitiiti atoa le 2,000 tausaga o galulue faatasi Ieova ma tagata, ae o loo faaauau pea ona ia tosina atu ē e lotofaamaoni iā te ia. (Ioa. 6:44) E faapefea ona tatou faaatagia atu le onosaʻi o Ieova i la tatou faiva?
2. E faapefea ona faaalia lo tatou onosaʻi i le galuega talaʻi?
2 Talaʻiga i le Fale i le Fale: E tatou te faataʻitaʻi i le onosaʻi o Ieova e ala i le talaʻi e “lē aunoa” i oganuu e lē o fia iloa e tagata le tala lelei. (Galu. 5:42) E tatou te onosaia le lē ano mai, tauemuga ma teteega i la tatou faiva. (Mare. 13:12, 13) E tatou te onosaʻi pea ma taumafai e toe asia tagata e tusa lava pe e faigatā ona toe maua atu.
3. Aiseā e manaʻomia ai le onosaʻi i le faia o toe asiga ma suʻesuʻega faale-Tusi Paia?
3 Suʻesuʻega Faale-Tusi Paia: E manaʻomia le onosaʻi i le totōina o se laau. E ui ina tatou vaaia lelei se laau, ae e lē mafai ona tatou faavavevaveina lana tuputupu aʻe. (Iako. 5:7) E faapena ona faasolosolo mālie le tuputupu aʻe faaleagaga o se tagata. (Mare. 4:28) E ono faigatā i a tatou tagata suʻesuʻe ona tuua o latou talitonuga tuai ma tū e lē faale-Tusi Paia. E lē tatau ona tatou uunaʻia malosi i latou e faia ni suiga. E manaʻomia le onosaʻi ina ia lava se taimi e galue ai le agaga o le Atua i o latou loto.—1 Kori. 3:6, 7.
4. E faapefea ona aogā le onosaʻi, a o talaʻi atu i o tatou aiga lē talitonu?
4 Aiga Lē Talitonu: E ui e tatou te naunau ina ia iloa e o tatou aiga lē talitonu le upu moni, a ia onosaʻi e ala i le faatali mo le taimi talafeagai e taʻu atu ai o tatou talitonuga, ma ia faaeteete ina neʻi tele faamatalaga e fai atu. (Fai. 3:1, 7) Peitaʻi ia sili ona leotele a tatou amioga lelei i lo o upu, ma nofosauni e faailoa atu o tatou talitonuga i se auala agamalu ma le faaaloalo. (1 Pete. 3:1, 15) O le mea moni o le a sili ona aogā la tatou faiva pe a faia ma le onosaʻi, ma o le a faafiafiaina ai le finagalo o lo tatou Tamā i le lagi.