E Aogā Talaʻiga i Alatetele
1. O le ā se auala e tatou te faataʻitaʻi ai iā Iesu?
1 A o iai Iesu i le lalolagi, e leʻi mā o ia e talaʻi atu i tagata sa feiloaʻi i ai i auala ma nofoaga faitele. (Luka 9:57-61; Ioa. 4:7) Na naunau o ia e oo atu lana feʻau tāua i le toʻatele e mafai ai. Ua matuā aogā foʻi talaʻiga i alatetele i aso nei, e fesoasoani ai i tagata ia maua le poto ma le atamai mai i le Atua. (Faata. 1:20) O le a atili taulau manuia la tatou galuega pe a tatou tausolomua e talanoa atu i tagata, a ia faia ma le faautauta.
2. O ā auala e tatou te tausolomua ai pe a talaʻi i alatetele?
2 Ia Tausolomua: E sili atu ona aogā pe a e alu e faafeiloaʻi le tagata i lo o le faatalitali seʻi alu atu le tagata iā te oe. Ia ataata i le tagata ma talanoa māfana i ai. Pe a toʻatele le ʻautalaʻi, e sili pe a ō taʻitoʻatasi e talanoa i tagata. E ao foʻi ona tausolomua i le saʻilia o se auala e toe feiloaʻi ai ma le tagata na fiafia i le feʻau. Pe a talafeagai, ia fesili atu ma le faaaloalo po o le ā se auala e lua te toe feiloaʻi ai. E masani i nisi o le ʻautalaʻi ona talaʻi i le nofoaga lava e tasi, ma mafai ona toe feiloaʻi ai ma i latou na talanoa muamua i ai, ma toe faaauau le talanoaga faale-Tusi Paia.
3. E faapefea ona faaalia le faautauta a o tatou talaʻi i alatetele?
3 Ia Faautauta: Ia mafaufau lelei po o lē fea pito o le auala o le a e talaʻi ai ma po o ai foʻi e te talaʻi i ai. E lē seʻiloga e te talaʻi i tagata uma. O se faaaʻoaʻoga, afai o loo savali faanatinati se tagata, aua le faalavelave i ai. Ia faaalia foʻi le faautauta pe a talaʻi i luma o se fale e fai ai pisinisi, ina neʻi faasoesa ane le pule. E sili le talaʻi atu i tagata pe a ō ese mai i le pisinisi i lo o le taimi e ō ai i totonu. Ia faafeiloaʻi tagata i se auala e lē faateʻia ai, ma ia ofo atu lomiga ma le faautauta. Afai e lē o naunau mai le tagata, ia tuu i ai se sāvali ae lē o se mekasini.
4. Aiseā ua aogā ai ma faafiafia loto le talaʻi i alatetele?
4 O le talaʻi i alatetele, e mafai ai ona tatou lūlū le tele o fatu o le upu moni i se taimi puupuu. (Fai. 11:6) Atonu foʻi e tatou te feiloaʻi ai ma tagata e leʻi maua atu i fale a o faia le talaʻiga i le fale i le fale. E lelei ae faia ni fuafuaga e auai i le talaʻiga i alatetele, o se galuega e aogā ma faafiafia loto.