Po ua E Aʻoaʻoina Mea Uma Mai iā Ieova?

1. O le ā le finagalo o Ieova e uiga i aʻoaʻoga?

¹ E finagalo Ieova lo tatou “Aʻoaʻo Sili” ia aʻoaʻoina i tatou. (Isa. 30:20) Na amata lana aʻoaʻoga ina ua uma ona foafoaina lana ulumatua. (Ioa. 8:28) Ina ua mavae le fouvalega a Atamu, e leʻi taofia ai lana aʻoaʻo atu, ae sa ia avatu ma le alofa faatonuga i tagata e lē lelei atoatoa.—Isa. 48:17, 18; 2 Timo. 3:14, 15.

2. O le ā le polokalame tauaʻoaʻoga o loo faia i le taimi nei?

² I aso nei, o loo faatonutonuina e Ieova se polokalame tauaʻoaʻoga e pito i sili ona tele i le talafaasolopito. E pei ona valoia e Isaia, e faitau miliona i latou i le lalolagi o le a lolofi mai i le ʻmauga faafaatusa o Ieova’. (Isa. 2:2) Aiseā o le a lolofi mai ai? Ina ia aʻoaʻoina ala o le Atua, ioe, ina ia aʻoaʻoina e Ieova! (Isa. 2:3) A o faagasolo le tausaga faaleauaunaga 2010, sa faaalu ai e Molimau a Ieova le silia i le 1.6 piliona itula, i le molimau ma aʻoaʻo atu i tagata upu moni o le Tusi Paia. E lē gata i lea, i vaiaso taʻitasi, e avatu ai faatonuga faaleagaga i faapotopotoga e sili atu ma le 105, 000 i le lalolagi, faapea ma lomiga tauaʻoaʻoga faa-Kerisiano ua saunia e le pologa faamaoni ma le faautauta, i le silia i le 500 gagana.

3. E faapefea ona aogā iā te oe aʻoaʻoga ua saunia e Ieova?

³ Maua Aogā Atoatoa: Maʻeu le tele o aogā e tatou te maua i aʻoaʻoga mai le Atua! Ua tatou aʻoaʻoina e iai le suafa o le Atua ma e manatu mamafa mai o ia iā i tatou. (Sala. 83:18; 1 Pete. 5:6, 7) Ua uma ona tatou iloa tali i nisi o fesili tāua i le olaga—Aiseā ua mafatia ai tagata ma feoti? E faapefea ona mauaina le fiafia moni? O le ā le fuafuaga o le olaga? Ua aumaia foʻi e Ieova iā i tatou taʻiala tau amio, ina ia ʻmanuia ai o tatou ala.’—Iosua 1:8.

4. O ā nisi o avanoa tau aʻoaʻoga e mafai ona maua e auauna a le Atua, ma aiseā e tatau ai ona tatou aʻoaʻoina mea uma ua maua mai iā Ieova?

⁴ E lē gata i lea, ua aumaia foʻi e Ieova aʻoaʻoga faapitoa e fesoasoani i le toʻatele o ana auauna, ina ia faalautele atu la latou auaunaga iā te ia. Ua lisiina i le itulau 4-6 faaeaga ua avanoa atu i nisi. E tusa lava pe e tatou te lē maua na toleniga uma ona o o tatou tulaga, ae po o tatou faaaogā atoatoa toleniga ua saunia e Ieova mo i tatou? Po o tatou faalaeiauina talavou o ē e masani ona uunaʻia e faiaʻoga, e tuliloa aʻoaʻoga maualuluga o le lalolagi, nai lo o le tuliloa o aʻoaʻoga e sili ona maualuluga mai i le Atua? O le aʻoaʻoina o mea uma ua tatou maua mai iā Ieova, o le a fesoasoani iā i tatou e olioli ai i le olaga i le taimi nei, ma le ola e faavavau i le lumanaʻi.—Sala. 119:105; Ioa. 17:3.

O Nisi o Avanoa Tau Aʻoaʻoga e Mafai Ona Maua Mai i le Faalapotopotoga a Ieova

Aʻoga Faitau Tusi ma Tusitusi

• Fuafuaga: Ina ia aʻoaʻo tagata i le auala e faitau ma tusitusi ai, ina ia mafai ai ona latou faia ni suʻesuʻega totino i le Tusi Paia ma aʻoaʻoina isi i le upu moni.

• Le Umi: E fuafua i le manaʻoga.

• Nofoaga: Maota mo Sauniga.

• O Ē e Auai: Tagata talaʻi uma ma tagata fiafia.

• Le Auala e Talosaga ai: E fuafuaina e toeaina o le faapotopotoga aʻoaʻoga o le faitau ma le tusitusi e tusa ai ma le manaʻoga o le faapotopotoga, ma e latou te faalaeiauina tagata uma ia auai ina ia maua ai aogā.

Aʻoga o le Faiva Faatiokarate

• Fuafuaga: Ia toleni ai tagata talaʻi ina ia avea ma faiaʻoga agavaa ma tagata talaʻi uigā o le tala lelei.

• Le Umi: Faaauau pea.

• Nofoaga: Maota mo Sauniga.

• O Ē e Auai: Tagata talaʻi uma. E faapena foʻi isi o loo auaumea faatasi ma le faapotopotoga, o ē ua talia aʻoaʻoga o le Tusi Paia ma ola e tusa ai ma mataupu silisili faa-Kerisiano.

• Le Auala e Talosaga ai: Talanoa i le ovasia o le Aʻoga o le Faiva Faatiokarate.

Aʻoaʻoina o Isi Gagana

• Fuafuaga: Ina ia aʻoaʻo tagata talaʻi i le auala e talaʻi ai le tala lelei i isi gagana.

• Le Umi: Fā i le lima masina. E masani lava ona faia le aʻoga i taeao o aso Toonaʻi mo le tasi po o le lua itula.

• Nofoaga: E masani lava e faia i se Maota mo Sauniga e lata ane.

• O Ē e Auai: Tagata talaʻi e lelei o latou talaaga o ē e mananaʻo e talaʻi i se isi gagana.

• Le Auala e Talosaga ai: E masani lava ona faatulaga e le ofisa o le lālā e tusa ai ma manaʻoga.

Fausiaina o Maota mo Sauniga

• Fuafuaga: Ina ia fausia ma toe faafou Maota mo Sauniga. E lē o se aʻoga lenei mea, ae o lenei faatulagaga e toleniina ai le ʻautauofo i tomai eseese e fesoasoani ai i faugāfale.

• Le Umi: E fuafua i le tulaga o le tagata tauofo.

• Nofoaga: E faia i so o se mea i le vaipanoa ua tofia e le Komiti o Faugāfale. Atonu e mafai ona valaaulia nisi o tagata tauofo, e fesoasoani i galuega i vaipanoa mamao ua aafia i se mala faalenatura.

• Agavaa: O se uso po o se tuafafine ua uma ona papatiso ma ua faamaonia e le ʻautoeaina. E iai se tomai masani pe e leai foʻi.

• Le Auala e Talosaga ai: Ia faatumu le pepa talosaga ua saunia e toeaina o lau faapotopotoga, ua taʻua o le Kingdom Hall Volunteer Worker Questionnaire (S-82).

Aʻoga mo le Auaunaga Paeonia

• Fuafuaga: Ina ia fesoasoani i paeonia e “faataunuu atoatoa la latou faiva.”—2 Timo. 4:5.

• Le Umi: Lua vaiaso.

• Nofoaga: E filifilia e le ofisa o le lālā; e masani lava o se Maota mo Sauniga e latalata ane.

• Agavaa: O ē na avea ma paeonia sauatoa i le pe tusa o le tausaga.

• Le Auala e Talosaga ai: E otometi lava le auai o paeonia ua agavaa ma e logo atu e le ovasia matagaluega.

Le Aʻoga e Ulufale ai i Peteli

• Fuafuaga: Ua faatulagaina lenei aʻoga ina ia fesoasoani ai i tagata fou ia taulau i la latou auaunaga i le Peteli.

• Le Umi: Tasi le itula i vaiaso taʻitasi mo le sefulu ono vaiaso.

• Nofoaga: Peteli.

• Agavaa: E tatau ona avea ma sui nofo mau i le aiga Peteli pe e tauofo mo se taimi umi lē tumau (tasi tausaga pe e sili atu).

• Le Auala e Talosaga ai: E otometi lava ona auai sui agavaa o le Peteli.

Aʻoga o le Faiva o le Malo

• Fuafuaga: Ina ia toleni ai toeaina ma auauna o le faiva ia tausia lelei o latou tiute ma avega tauave i le faapotopotoga. (Galu. 20:28) E faia lenei aʻoga pe a mavae ni nai tausaga e pei ona fuafuaina e le Vaega Pule.

• Le Umi: Na faia i tausaga talu ai nei mo le tasi ma le afa aso mo toeaina, ae tasi le aso mo auauna o le faiva.

• Nofoaga: E masani lava ona faia i se Maota mo Sauniga po o le Maota mo Fonotaga e latalata ane.

• Agavaa: E tatau ona avea o se toeaina po o se auauna o le faiva.

• Le Auala e Talosaga ai: E valaaulia e le ovasia matagaluega ia toeaina agavaa ma auauna o le faiva.

Aʻoga mo Toeaina o le Faapotopotogaa

• Fuafuaga: Ina ia fesoasoani i toeaina ia faaleleia o latou tiute tauave i le faapotopotoga.

• Le Umi: Lima aso.

• Nofoaga: E filifilia e le ofisa o le lālā se Maota mo Sauniga po o se Maota mo Fonotaga e latalata ane.

• Agavaa: E tatau ona avea ma toeaina.

• Le Auala e Talosaga ai: E valaaulia e le ofisa o le lālā toeaina agavaa.

Aʻoga mo Ovasia Femalagaaʻi ma a Latou Avāb

• Fuafuaga: E fesoasoani i ovasia matagaluega ma ovasia itumalo ina ia faaleleia atili o latou tomai e auauna ai i faapotopotoga, ma ia “galulue mamafa i le upu ma le aʻoaʻo atu,” ma leoleo i le lafu mamoe o loo latou tausia.—1 Timo. 5:17; 1 Pete. 5:2, 3.

• Le Umi: Lua masina.

• Nofoaga: E filifilia e le ofisa o le lālā.

• Agavaa: E tatau ona avea o se ovasia matagaluega po o se ovasia itumalo.

• Le Auala e Talosaga ai: E valaaulia e le ofisa o le lālā toeaina agavaa ma a latou avā.

Aʻoga Faale-Tusi Paia mo Uso Nofofuac

• Fuafuaga: Ina ia sauniuni ai toeaina ma auauna o le faiva e leʻi faaipoipo mo nisi tofiga faaopoopo. O le toʻatele o ē e faauu o le a tofia e galulue i oganuu o manaʻomia ai se fesoasoani i o latou lava atunuu. E toʻaitiiti e mafai ona tofia i isi atunuu pe a talafeagai ma o latou tulaga.

• Le Umi: Lua Masina.

• Nofoaga: E filifilia e le ofisa o le lālā; e masani lava o se Maota mo Fonotaga po o se Maota mo Sauniga.

• Agavaa: O uso nofofua e i le va o le 23 i le 62 tausaga o loo lelei le soifua mālōlōina, ma e naunau e auauna i le ʻauuso ma faaauiluma manaʻoga o le Malo, i so o se mea e manaʻomia ai. (Mare. 10:29, 30) E tatau ona auauna i latou mo se taimi ia lē itiiti ifo i le lua tausaga sosoo o avea ma auauna tofia.

• Le Auala e Talosaga ai: Afai e fai le aʻoga lenei i le oganuu o la outou lālā, e faia se fono ma i latou o fia auai i le taimi o le fonotaga matagaluega. O le a maua nisi faamatalaga i le taimi o le fono.

Aʻoga Faale-Tusi Paia mo Ulugalii Kerisiano Faaipoipod

• Fuafuaga: Ia toleni faapitoa ai ulugalii faaipoipo ina ia aogā atili iā Ieova ma lana faalapotopotoga. O le toʻatele o le ʻaufaauu, o le a tofia e auauna i o latou lava atunuu i mea o loo manaʻomia tele ai le fesoasoani. E toʻaitiiti e mafai ona tofia i isi atunuu pe a talafeagai ma o latou tulaga.

• Le Umi: Lua Masina.

• Nofoaga: O nisi vasega e fai i le Nofoaga mo Aʻoaʻoga a le Olomatamata i Patterson i Niu Ioka, i Amerika. O lea la, e faia lenei aʻoga i nofoaga ua filifilia e ofisa o le lālā, e masani lava o se Maota mo Fonotaga po o se Maota mo Sauniga.

• Agavaa: O ulugalii faaipoipo e i le va o le 25 i le 50 tausaga e lelei le soifua mālōlōina, e naunau e auauna i so o se mea lava e manaʻomia ai, ma e lotomalilie e faataunuu le mau lenei “O aʻu lenei! Inā auina atu ia aʻu.” (Isa. 6:8) E faaopoopo atu i ai, e tatau ona sili atu i le lua tausaga talu ona faaipoipo, ma auauna faataimi atoa e lē itiiti ifo ma le lua tausaga sosoo.

• Le Auala e Talosaga ai: Afai e faia le aʻoga lenei i le oganuu o la outou lālā, e faia se fono ma i latou o fia auai i le aso faapitoa o fonotaga. O le a maua nisi faamatalaga i le taimi o le fono lea.

Aʻoga Faale-Tusi Paia a le Olomatamata o Kiliata

• Fuafuaga: Ina ia toleniina ai paeonia ma isi o loo auauna faataimi atoa mo le auaunaga faamisionare.

• Le Umi: Lima masina.

• Nofoaga: Nofoaga mo Aʻoaʻoga a le Olomatamata i Patterson i Niu Ioka, i Amerika.

• Agavaa: O ulugalii faaipoipo ua tolu tausaga talu ona papatiso, ma e i le va o le 21 i le 38 tausaga le matutua i le taimi lea ua avatu ai le la talosaga. E tatau ona malamalama i le faa-Peretania ma ia sili atu i le lua tausaga talu ona faaipoipo, ma auauna faataimi atoa e lē itiiti ifo ma le lua tausaga sosoo. O ē o loo talosaga e tatau ona lelei le soifua mālōlōina. O paeonia o loo auauna i isi atunuu (e aofia ai ma ē o loo auauna faamisionare), ovasia femalagaaʻi, o ni sui o le aiga Peteli, o ē ua uma ona faauu mai i le Aʻoga o Toleniga i le Faiva, Aʻoga Faale-Tusi Paia mo Uso Nofofua ma le Aʻoga Faale-Tusi Paia mo Ulugalii Kerisiano ua Faaipoipo, e mafai ona talosaga pe afai ua agavaa.

• Le Auala e Talosaga ai: O lālā ua filifilia, e latou te faia se fono ma ē o mananaʻo e auai i lenei aʻoga, i le taimi o le tauaofiaga itumalo. O le a maua ai nisi faamatalaga i lenei fono. Afai e lē faia ai se fono faapea i le taimi o le tauaofiaga i la outou atunuu ae o loo e fia talosaga, e mafai ona e tusi atu i le ofisa o le lālā mo nisi faamatalaga.

Aʻoga mo Sui o Komiti o Lālā ma a Latou Avā

• Fuafuaga: E fesoasoani iā i latou o loo auauna i komiti o lālā, ina ia vaavaaia lelei le tausiga o aiga Peteli, uaʻi atu i mataupu o le auaunaga e aafia ai faapotopotoga, ma le vaavaaia o matagaluega ma itumalo i a latou oganuu, faapea galuega faaliliu, lolomia o tusi, felaʻuaʻiga o lomiga ma le vaaia o matagaluega eseese.—Luka 12:48.

• Le Umi: Lua masina.

• Nofoaga: Nofoaga mo Aʻoaʻoga a le Olomatamata i Patterson i Niu Ioka, i Amerika.

• Agavaa: E tatau ona avea ma sui o le Komiti o le Lālā po o se sui o le Komiti o le Atunuu, po o se tasi ua tofia i ai.

• Le Auala e Talosaga ai: E valaaulia e le Vaega Pule uso taʻumatuaina ma a latou avā.

[Faamatalaga pito i lalo]