Ia Leoleoina Lou Lotofuatiaifo
1. O le ā le matua o le aso faapitoa o fonotaga mo le tausaga faaleauaunaga e 2013, ma o le ā le fuafuaga o le polokalame?
1 O aso uma e tatou te feagai ai ma tulaga e ono faaleagaina ai o tatou lotofuatiaifo. O le māfuaaga lea ua faamatuaina ai le polokalame o le aso faapitoa o fonotaga mo le tausaga faaleauaunaga e 2013, lea e amata iā Setema 1, 2012 e faapea “Ia Leoleoina Lou Lotofuatiaifo.” (1 Timo. 1:19) Ua faatulagaina lenei polokalame, ina ia fesoasoani e tatou te uaʻi totoʻa atu ai i le auala o loo faaaogāina ai lenei meaalofa mataʻina mai i Lē na Faia i tatou.
2. O ā fesili tāua o le a taliina a o faagasolo le polokalame?
2 Mātau Manatu Nei: E fitu fesili autū e faatatau i le lotofuatiaifo o le a taliina i le polokalame:
• O le ā e avea ma lamatiaga i le lotofuatiaifo?
• E faapefea ona toleni o tatou lotofuatiaifo?
• E faapefea ona tatou mamā mai i toto o tagata uma?
• O le ā o faailoa atu e uiga iā i tatou i o tatou mafaufauga ma gaoioiga e tusa ai ma mataupu silisili o le Tusi Paia?
• E faapefea ona tatou ʻalofia le faamanuʻaliaina o lotofuatiaifo o isi?
• Talavou, e faapefea ona outou manumalo pe a tofotofoina ia faagutugutulua?
• O ā faamanuiaga e maua e i latou e mulimuli i o latou lotofuatiaifo ua taʻitaʻia e le agaga paia?
3. E faapefea ona tatou maua aogā mai i le polokalame?
3 E ala i le fesoasoani a Ieova, e mafai ai ona tatou manumalo i taumafaiga a Satani ina ia faaleagaina o tatou lotofuatiaifo. Ua taʻu mai e lo tatou Tamā alofa e ala mai i lana Afioga ma lana faalapotopotoga e faapea: “O le ala lenei. Ia outou savavali ai.” (Isa. 30:21) O lenei polokalame o se tasi lea o auala ua saunia mai ai e Ieova lenā taʻitaʻiga. O lea la, ia fai ni fuafuaga ina ia auai i le polokalame atoa. Ia uaʻi totoʻa atu, ma ia iloilo le auala e faatatau ai e le tagata lava ia faamatalaga o le a faalogo i ai. Ia talanoaina le polokalame faatasi o se aiga. Pe a faatatauina faatonuga o le a tatou maua, o le a faamalosia ai i tatou e faaauau ona “taofimau i se lotofuatiaifo lelei,” ma fesoasoani e ʻalofia ai le maileia i fiafiaga e vave mavae atu o le lalolagi a Satani.—1 Pete. 3:16.