Pe e Aogā le Iai o Sau Oe Lava Oganuu?
1. O le ā le uiga o le faaupuga sau oe lava oganuu?
1 O le faaupuga sau oe lava oganuu, o se oganuu patino e tuu atu iā te oe, atonu e latalata i le mea e te nofo ai. Ua taʻua i le tusi Faamaopoopo, itulau e 103: “O le iai o sau lava oganuu o le a fesoasoani iā te oe e faaaogā lelei le taimi i le auaunaga. E te ono valaaulia foʻi se isi tagata talaʻi e lua te galulue i lau oganuu.”
2. E faapefea ona faaaogā le oganuu a le tagata lava ia e fesoasoani ai i le talaʻiga a le vaega?
2 E Fesoasoani i le Vaega mo le Talaʻiga: Pe a iai sau oe lava oganuu e latalata i lau galuega, e mafai ona e talaʻi ai i taimi e mālōlō ai i le aoauli pe mānava foʻi, faatasi ma se isi tagata talaʻi e faigaluega latalata ane. Afai e latalata i lou fale, e faigofie la ona faaaogā e tou te talaʻi ai ma lou aiga i afiafi. Afai e te lē alu i le faatasiga mo le talaʻiga, ia tatalo muamua mo le taʻitaʻiga a Ieova a o leʻi amata lau talaʻiga. (Fili. 4:6) E tatau foʻi ona faapaleni le taimi e galueaʻiina ai lau oe lava oganuu, ma le lagolagoina o faatulagaga mo talaʻiga a le faapotopotoga. E sili pe a lagolagosua i lea vaega, aemaise lava i le faaiʻuga o le vaiaso.
3. O ā aogā o le iai o sau oe lava oganuu?
3 Aogā: E mafai ona e talaʻi ai i so o se taimi e mafai ai ma tele le taimi e faaalu i le talaʻiga, auā e lē o manaʻomia ona e malaga muamua i le faatasiga mo le talaʻiga. E mafai ai e nisi ona paeonia lagolago pe paeonia sauatoa, faigofie ona toe asia tagata fiafia na feiloaʻi i ai, atiaʻe lo latou naunau ma faia ni suʻesuʻega faale-Tusi Paia. Ua iloa foʻi e le toʻatele, e aogā e faamasani lelei ai i tagata o aiga ma atiaʻe lo latou faatuatua. A o talaʻi i lau oe lava oganuu, po o fesoasoani iā te oe ma lou aiga e faia ai ma le māeʻaeʻa la outou faiva?—2 Timo. 4:5.