Faafeiloaʻi i Latou!
1. O le ā se avanoa lelei e avatu ai se molimau, ma aiseā?
1 O le Faamanatuga o se avanoa e sili ona lelei e molimau atu ai. E silia ma le 10 miliona tagata valaaulia o loo faatalitalia e auai i le Faamanatuga i lenei tausaga. O le a latou faalogologo i faamaoniga silisili se lua o le alofa, e ala mai i le taulaga togiola. (Ioa. 3:16; 15:13) E latou te aʻoaʻoina ai faamanuiaga e latou te maua, ona o lenei meaalofa mai iā Ieova. (Isa. 65:21-23) Peitaʻi, e lē na o le failauga o le a avatuina se molimau i lea sauniga faapitoa. E avatu foʻi e uso ma tuafāfine se molimau lelei, e ala i le faafeiloaʻia ma le māfana o tagata valaaulia.—Roma 15:7.
2. E faapefea ona tatou faafeiloaʻia ma le māfana tagata valaaulia?
2 Nai lo le nofonofo ma faatalitali i le taimi e amata ai le Faamanatuga, aiseā e te lē tausolomua ai e faafeiloaʻi tagata valaaulia? Atonu e latou te matamumuli. Peitaʻi, o le faafeiloaʻi atu ma le māfana e latou te lagona ai le talileleia o i latou. E te ono fesili atu i se tagata valaaulia, po o le taimi muamua lea ua auai ai i se sauniga, ma pe e masani foʻi i se tasi o le faapotopotoga. Pe a talafeagai, ia valaaulia o ia e lua te nonofo faatasi ina ia mafai ona oulua faaaogā faatasi lau Tusi Paia ma le tusi pese. E mafai foʻi ona faamatala i ai vaega eseese o le Maota mo Sauniga. Pe a māeʻa le Faamanatuga, ia faaavanoa lou taimi e tali ai ana fesili. Pe afai e tatau ona vave ō ese la outou faapotopotoga ona e faaaogā e se isi faapotopotoga le maota, e te ono faapea atu: “O le ā sou manatu e tusa ai o le polokalame? Faamata e iai se auala e mafai ona faafesootaʻi ai oe?” Ona faia lea o fuafuaga e toe asia ai lea tagata. E tāua i toeaina ona uaʻi faapitoa atu iā i latou ua lē o toe talaʻi o loo auai i le Faamanatuga.
3. Aiseā e tāua ai le tausolomua e faafeiloaʻi tagata valaaulia i le Faamanatuga?
3 O le toʻatele o tagata valaaulia, o le taimi muamua lea e latou te vaaia ai le olioli, filemu ma le autasi o auauna a Ieova i le parataiso faaleagaga. (Sala. 29:11; Isa. 11:6-9; 65:13, 14) O ā ni vala o le a manatua e tagata valaaulia mai le Faamanatuga? O nisi taimi e faalagolago lenā tulaga i lo tatou tausolomua e faafeiloaʻia ma le māfana i latou.