O le ā e Uunaʻia ai i Tatou e Talaʻi?
1. O le ā le fesootaʻiga o le alofa i la tatou galuega talaʻi?
1 O le talaʻia o le tala lelei o le Malo o le Atua, o se galuega e sili ona tāua e tatau ona tatou faia i aso nei. O le mea moni, o lenei galuega ua faaalia ai lo tatou usitaʻia o poloaʻiga silisili e lua, ia alolofa iā Ieova ma alolofa i tuaoi. (Mare. 12:29-31) O le alofa e uunaʻia ai i tatou ia aʻoaʻo atu ma le maelega.—1 Ioa. 5:3.
2. E faapefea i le galuega talaʻi ona faaalia ai lo tatou alolofa mo Ieova?
2 Alofa mo Ieova: O le alolofa i la tatou Uō pele o Ieova, e uunaʻia ai i tatou e taʻu atu i isi upu moni e uiga iā te ia. E tusa ma le 6,000 tausaga o taufaaleaga Satani e uiga iā Ieova. (2 Kori. 4:3, 4) O lea ua talitonu ai tagata e faapuapuagatia e Ieova tagata agasala i le afi i seoli, o ia o se tolutasi e lē mailoa, ma e lē manatu mamafa mai i tagata. Ua iʻu lava ina manatu le toʻatele e leai se Atua. Maʻeu lo tatou naunau e faailoa atu upu moni e uiga i lo tatou Tamā faalelagi! O a tatou taumafaiga filigā i le galuega talaʻi, o le a matuā faafiafiaina ai Ieova, ae o le a lilivau ai Satani.—Faata. 27:11; Epe. 13:15, 16.
3. E faapefea i le galuega talaʻi ona faaalia ai lo tatou alolofa i tuaoi?
3 Alofa i Tuaoi: E faaalia lo tatou alolofa e ala i le talaʻi atu i isi. O le tulaga pagatia ua tatou iai ua matuā naunau ai tagata e fia faalogo i se tala lelei. E toʻatele ua pei o tagata Nineva i aso o Iona, e latou te “lē iloa le eseesega o o latou lima taumatau ma o latou lima tauagavale.” (Iona 4:11) O la tatou galuega talaʻi ua aʻoaʻoina ai tagata e ola i se olaga fiafia, taulau manuia ma maua ai le faamoemoe. (Isa. 48:17-19; Roma 15:4) O le a “faaolaina” i latou pe afai e faalogo ma ola e tusa ai ma mea ua latou aʻoaʻoina.—Roma 10:13, 14.
4. O le ā le mea o le a lē faagaloina e Ieova?
4 O fanau lelei, e taumafai lava e alolofa i o latou mātua i taimi uma. I se tulaga talitutusa, o le malosi o lo tatou alofa mo Ieova ma tuaoi, o le a uunaʻia ai i tatou e mataalia i avanoa uma e avatu ai se molimau e aunoa ma le faavaivai. (Galu. 5:42) O le a lē faagaloina e Ieova na galuega ma lo tatou alofa mo ia ma tuaoi.—Epe. 6:10.