Uso Talavou, po o Outou Aapa Atu?
1. O le ā le taimi e tatau ai i se uso ona amata faatatau le taʻiala o loo i le 1 Timoteo 3:1?
1 ʻAfai e fia aapa atu se tasi, e naunau o ia i galuega lelei.’ (1 Timo. 3:1) O na upu faagaeeina ua faalaeiau ai uso e aapa atu ina ia agavaa mo faaeaga i le faapotopotoga. Pe e tatau ona avea oe o se tagata matua ina ia faia ai faapea? Leai. Peitaʻi, e lelei pe a amata ona aapa atu a o e talavou pea. O le faia faapea o le a e maua ai ni toleniga ma iloa ai po ua e agavaa e avea ma auauna o le faiva pe a e matua. (1 Timo. 3:10) Pe afai o oe o se uso talavou ua papatiso, e faapefea ona e aapa atu?
2. E faapefea ona atiaʻe ma faaalia atu le uiga faataulaga?
2 Ia Faataulaga: Ia manatua, o loo e aapa atu mo galuega lelei ae lē mo ni faaeaga. O lea, ia atiaʻe se faanaunauga e fesoasoani atu i uso ma tuafāfine. O se tasi o auala e faia ai faapea, o le manatunatu loloto lea i le faaaʻoaʻoga lelei a Iesu. (Mata. 20:28; Ioa. 4:6, 7; 13:4, 5) Talosaga iā Ieova e fesoasoani mai ina ia e naunau i isi. (1 Kori. 10:24) Pe mafai ona e fesoasoani i ē matutua pe mamaʻi o loo i lau faapotopotoga? Pe e te faaavanoa lou taimi ina ia moa ma vele le vao, pe faaleleia foʻi nisi vaega o le Maota mo Sauniga? Pe mafai ona e faia se lauga tauofo i le Aʻoga mo le Faiva Faatiokarate? O le a e maua le olioli pe a faia mea lelei ma fesoasoani i isi.—Galu. 20:35.
3. Aiseā e tāua ai le malosi faaleagaga, ma e faapefea ona atiaʻe?
3 Malosi Faaleagaga: E sili atu ona tāua le tulaga faaleagaga o se auauna nai lo o ni ona tomai faapitoa. O se tane faaleagaga e taumafai e vaai i le tulaga o mea e pei ona silasila i ai Ieova ma Iesu. (1 Kori. 2:15, 16) O ia o sē e maelega e faamuamua le talaʻia o le Malo, ma faaalia “le fua o le agaga.” (Mata. 6:33; Kala. 5:22, 23) E mafai ona e atiaʻe uiga faaleagaga e ala i le iai o se faasologa lelei mo au oe lava suʻesuʻega. E aofia ai le faitau o le Tusi Paia i aso taʻitasi, Le Olomatamata ma le Ala Mai!, ma le sauniuni lelei ma auai pea i sauniga. (Sala. 1:1, 2; Epe. 10:24, 25) Ina ua faalaeiau e Paulo Timoteo ia agaʻigaʻi i luma faaleagaga, na ia faapea atu: ʻIa uaʻi totoʻa i lau aʻoaʻo atu.’ (1 Timo. 4:15, 16) O lea, ia filigā e fai au lauga i le Aʻoga o le Faiva Faatiokarate, sauniuni lelei mo le talaʻiga, ma ia talaʻi e lē aunoa. Ia faatutū ni sini ma taumafai e ausia, e pei o le paeonia, auaunaga i le Peteli, pe auai i le Aʻoga Faale-Tusi Paia mo Uso Nofofua. E mafai ona e “sola ese mai i tuʻinanauga masani o talavou” pe afai e te malosi faaleagaga.—2 Timo. 2:22.
4. Aiseā e tāua ai le faamaoni ma le maufaatuatuaina?
4 Faamaoni ma Maufaatuatuaina: Talu ai sa “agavaa,” faamaoni ma maufaatuatuaina uso na tofia e tufatufa atu meaʻai mo Kerisiano matitiva i le uluaʻi senituri, sa mautinoa la e le ʻauaposetolo o le a faataunuu ma le māeʻaeʻa lenā galuega. Sa mafai ai foʻi ona uaʻi atu le ʻauaposetolo i isi mataupu e sili ona tāua. (Galu. 6:1-4) O lea, ia faia ma le lotoatoa so o se faaeaga e te maua i le faapotopotoga. Ia faaaʻoaʻo iā Noa o lē na mulimuli i faatonuga uma na tuu atu iā te ia mo le fausiaina o le vaa. (Kene. 6:22) E tautele iā Ieova le faamaoni ma e faaalia ai le matua faaleagaga.—1 Kori. 4:2; tagaʻi i le pusa “Aogā o Toleniga.”
5. Aiseā e tatau ai ona aapa atu uso talavou?
5 O loo faavave ona aoaoina e Ieova tagata. (Isa. 60:22) I se fua faatatau, e silia i le 250,000 tagata e papatiso i tausaga taʻitasi. Ona ua toʻatele tagata ua ō mai i le upu moni, ua manaʻomia ai ni tane agavaa faaleagaga e faatinoina tiute tauave i faapotopotoga. Ua sili atu nei ona tele galuega e manaʻomia ona faia i le auaunaga iā Ieova nai lo o se isi lava taimi. (1 Kori. 15:58) O lea la, uso talavou, po o outou aapa atu? Pe afai o loo e faia faapea, o loo e naunau la i galuega lelei!
[Faamatalaga faaopoopo i le itulau 2]
Ona ua toʻatele tagata ua ō mai i le upu moni, ua manaʻomia ai ni tane agavaa faaleagaga e faatinoina tiute tauave i faapotopotoga
[Pusa i le itulau 3]
Aogā o Toleniga
E maua e uso talavou aogā pe a tuu i ai e toeaina ni faaeaga ma toleni i latou. Ina ua māeʻa le sauniga a se tasi faapotopotoga, sa nofo le ovasia matagaluega i le pulelaa ma faalaeiau i se tasi o tagata talaʻi. Ae sa ia vaaia se uso talavou o tū latalata ane, ona fesili atu lea i ai pe iai se mea e fia talanoa ai. Na tali ane le talavou, ua tuu atu iā te ia le faaeaga e salu le pulelaa pe a uma sauniga taʻitasi. E ui sa faatali ona mātua ua tatau ona ō, ae sa leʻi manaʻo lenei talavou e alu ae leʻi faataunuuina lona faaeaga. Sa alu ese ma le fiafia le ovasia mai i le pulelaa ma na ia taʻua: “Na mataalia toeaina o lenā faapotopotoga i avanoa e toleni ai uso talavou, e ala i le tuu atu i ai o ni faaeaga e fai i le faapotopotoga. O lea, o so o se taimi ou te asia ai la latou faapotopotoga, sa leʻi faigatā i toeaina ona faailoa mai se uso talavou ua agavaa e avea ma auauna o le faiva.”