100 Tausaga o Faalauiloa le Malo!
1. O le ā na faalaeiauina tagata o Ieova e fai, i le pe ā ma le 100 tausaga ua mavae?
1 “Faauta, ua pule le Tupu! O outou o ona sui. O lea ia faalauiloa, faalauiloa, faalauiloa, le Tupu ma lona malo.” O na upu faagaeeloto a le uso o Rutherford pe toetoe 100 tausaga ua mavae, na faalaeiau ai tagata o Ieova ina ia faalauiloa le feʻau o le Malo i le lalolagi atoa. O le mea lenā ua tatou faataunuuina! E pei o uluaʻi Kerisiano, ua tatou talaʻia le tala lelei o le Malo i “foafoaga uma i lalo o le lagi.” (Kolo. 1:23) Pe a toe tepa i tua i le 100 tausaga ua mavae, o ā mea na tatou faataunuuina ina ia faalauiloa atu ai le Malo o le Atua? E faapefea ona faaauau ona tatou faalauiloa atu le Malo, a o lata atu i le atoaga o le 100 tausaga talu ona faavaeina?
2. Ua faapefea ona faaauiluma e a tatou lomiga le Malo o le Atua?
2 Toe Tepa i Tua: Ua loa tausaga o faaauilumaina e a tatou lomiga le Malo o le Atua. Talu mai le 1939, o le ulutala o la tatou mekasini autū: o Le Olomatamata Faasilasilaina le Malo o Ieova. Ua talanoaina i lenei lomiga, le Malo o le Atua ma mea o le a ia faataunuuina. Ua faamatilatila foʻi e le Ala Mai!, o le Malo o le Atua e na o le pau lea o le faamoemoe o tagata. E maʻeu le talafeagai ona avea o nei lomiga, ma lomiga ua sili ona tele gagana ua faaliliuina ai, ma ua tufatufaina atu i le lalolagi atoa!—Faaa. 14:6.
3. O ā ni auala ua tatou faaaogāina e faalauiloa ai le Malo?
3 Ua faaaogā e tagata o Ieova auala eseese e faalauiloa atu ai le Malo. I aso ua mavae sa tatou faaaogā ai taavale na tāina ai lauga, ālaleo faasalalau, ma laau e tā ai lauga (phonographs). Na fesoasoani na auala iā i tatou e faasalalau atu ai le tala lelei i le toʻatele o tagata, a o toʻaitiiti le ʻautalaʻi. (Sala. 19:4). Talu ai nei, ua maua ai a tatou lomiga i luga o la tatou tuatusi i le initaneti o le jw.org, ina ia faalauiloa ai le Malo i le faitau miliona o tagata, e aofia ai i latou o loo nonofo i oganuu e faasā ai la tatou galuega.
4. O ā ni auala faapitoa ua tatou faaaogā e molimau atu ai?
4 Ua faaaogā foʻi e tagata o Ieova ni auala faapitoa e faasalalau atu ai le feʻau o le Malo. O se faataʻitaʻiga, i le amataga o le 1996, na tatou faia ai se taumafaiga e faalautele atu la tatou galuega talaʻi i le fale i le fale, e ala i le molimau atu i paka e tafafao ai, paka o taavale, ma nofoaga o pisinisi. Talu ai nei na tatou faatulaga ai se talaʻiga faapitoa i nofoaga faitele i aai tetele o le lalolagi. E lē gata i lea, o loo auai foʻi le tele o faapotopotoga i le galuega talaʻi i nofoaga faitele i a latou lava oganuu, e ala i le faaaogā o fata e iai uili e toso ai po o laulau foʻi e faaali ai a tatou lomiga, ia e faatutū i mea e toʻatele ai tagata. Peitaʻi, o loo tumau pea ona avea le galuega i le fale i le fale o la tatou auala autū e molimau atu ai.—Galu. 20:20.
5. O ā avanoa ua ofo mai e le tausaga faaleauaunaga fou mo le toʻatele o i tatou?
5 Vaai Mamao: E toʻatele o le a auauna o ni paeonia sauatoa i le amataga o le tausaga faaleauaunaga fou iā Setema. Pe e mafai ona e paeonia sauatoa? Afai e leai, pe mafai la ona e paeonia lagolago mai i lea taimi i lea taimi? E tusa lava pe e mafai ona e paeonia pe leai, ae e faamanuia pea oe e Ieova ona o faataulaga ua e faia, ina ia faia ai se sao atoatoa i le faalauiloaina o le Malo.—Mala. 3:10.
6. Aiseā e faapitoa ai le masina o Oketopa 2014?
6 O le masina o Oketopa 2014 e atoa ai le 100 tausaga talu ona faavaeina le Malo. Ua talafeagai lelei ai la ona taulaʻi atu Le Olomatamata mo le lautele o lenā masina i le Malo o le Atua. Pe e mafai ona fai ni au taumafaiga ina ia tufa atu lenā lomiga i le toʻatele e mafai ai? A o tatou tepa taulaʻi atu i le lumanaʻi, seʻi o tatou faaauau ona “folafola atu le tala lelei o le malo o le Atua,” iā i latou uma o loo fia faalogo.—Galu. 8:12.