Ia Faaaʻoaʻo i le ʻAuperofeta—Nauma
1. O le ā e tatou te aʻoaʻoina mai i le tusi o Nauma?
1 O toega o mea i Nineva anamua ua faamaonia ai le faaumatiaina e Ieova o ona fili, ma e leai se ʻautau malosi e mafai ona faasagatau atu iā te ia, e pei ona valoia e le perofeta o Nauma. (Nau. 1:2, 6) O le iloilo totoʻa o le valoaga a Nauma, o le a tatou aʻoaʻoina mai ai ni lesona e aogā i la tatou faiva.
2. E faapefea ona faamautinoa o loo uaʻi atu pea la tatou feʻau i tala lelei?
2 Ofo Atu se Faamāfanafanaga ma se Faamoemoe: I le taimi muamua e tatou te faitau ai i le tusi o Nauma, e foliga mai e pau le mea o loo faamatala ai o le faalauiloaga o le faaumatiaga o Nineva, le aai taʻutaʻua o Asuria anamua. (Nau. 1:1; 3:7) Peitaʻi, o lenā faalauiloaga na avea o se tala lelei mo tagata o Ieova. O le uiga o le igoa o Nauma o “Lē e Faamāfanafana,” ma na faamautinoa atu ai i tagata Iutaia o le a lē toe iai o latou fili! Na faamautinoa atili atu e Nauma e faapea o Ieova “o le lafitaga malosi i aso o le puapuaga.” (Nau. 1:7) I aso nei e ao foʻi ona tatou faasoa atu ni tala lelei i le talaʻiga, ma faalaeiau tagata ina ia avea Ieova ma o latou lafitaga.—Nau. 1:15.
3. E faapefea ona tatou faaaʻoaʻo iā Nauma i le faaaogā o faataʻitaʻiga?
3 Faaaogā Faataʻitaʻiga: Na faagaeeina e Ieova ia Nauma e faatusa le faaumatiaga o Nineva i le iʻuga o le aai o Aikupito o Tese (Noamoni), lea na faaumatia e Asuria. (Nau. 3:8-10) A o tatou faamatala atu i tagata le iʻuga o lenei faiga o mea amioleaga, e mafai foʻi ona tatou faamatilatila atu nisi o valoaga o le Tusi Paia o loo faamaonia ai, e faataunuu e Ieova ana afioga uma e oo lava i nai mea lāiti. O se faataʻitaʻiga, o le taimi lea na faasagatau ane ai Papelonia ma Metai i le aai o Nineva i le 632 T.L.M. O le mamafa o timuga na māfua ai ona malosi le tatafe o le vaitafe o Tikarise, ma solo ai se vaega o le pā malupuipuia o Nineva. O i inā na osofaʻia ma faatoʻilaloina ai loa Nineva, e pei lava ona valoia mai e Ieova.—Nau. 1:8; 2:6.
4. E faapefea ona faamautinoa e manino ma malamalamagofie la tatou talaʻiga?
4 Ia Manino ma Malamalamagofie: Na tusia e Nauma ana faamatalaga i se auala auʻiliʻili, e tosina i ai le faitau ma manino lelei. (Nau. 1:14; 3:1) I se tulaga taitutusa, e tatou te mananaʻo foʻi e faaaogā se gagana e malamalamagofie. (1 Kori. 14:9) Pe a feiloaʻi ma se tasi i le talaʻiga, ia faamatala manino atu iā te ia le māfuaaga na e asiasi atu ai. Pe a faia se suʻesuʻega faale-Tusi Paia, ia fesoasoani i le tagata e atiaʻe le faatuatua iā Ieova ma lana Afioga, aemaise ia iloa le auala e faatatau ai na manatu iā te ia lava.—Roma 10:14.
5. O le ā se faamautinoaga ua tatou maua mai i le valoaga a Nauma?
5 I le tusi o Nauma, o loo faaalia manino mai ai le maufaatuatuaina e Nauma o valoaga a Ieova ma e taunuu moni lava. A o lata mai le iʻuga o lenei lalolagi amioleaga a Satani, e tatou te maua se faamāfanafanaga i le fetalaiga lenei mai i le Atua: “E lē tupu faalua mai le puapuaga.”—Nau. 1:9.