E Fesoasoani le Aʻoga o le Faiva Faatiokarate 2015 e Faaleleia ai la Tatou Aʻoaʻo Atu

¹ Na tusi le faisalamo o Tavita: “Ia mālie iā te oe upu a loʻu gutu ma manatunatuga o loʻu loto Ieova e, loʻu Papa ma Lē e togiolaina aʻu.” (Sala. 19:14) E tatou te mananaʻo foʻi ia mālie iā Ieova a tatou upu, ona e tāua tele lo tatou faaeaga o le talanoa atu i le faapotopotoga ma le talaʻiga, e faatatau i le upu moni. O le Aʻoga o le Faiva Faatiokarate o se tasi lea o auala ua toleni ai i tatou e Ieova mo le talaʻiga. O lenei toleniga e faia i vaiaso taʻitasi i faapotopotoga e silia i le 111,000 i le lalolagi aoao. Ua fesoasoani i uso ma tuafāfine i atunuu eseese, ina ia avea ma tagata talaʻi o le tala lelei e matuā agavaa, ma e mafai ona aʻoaʻo atu ma le naunautaʻi, faautauta ma le lototele.—Galu. 19:8; Kolo. 4:6.

² O le a aofia ai i le faasologa o le aʻoga mo le 2015 mataupu mai i le tamaʻi tusi “Se Faatomuaga o le Afioga a le Atua,” le faaopoopoga “Le Uiga o Upu” lea e maua i le Faaliliuga a le Lalolagi Fou, faapea mataupu mai i isi lomiga. E lē gata i lea, ua iai fetuunaʻiga i le taimi faatulagaina mo manatu tāua mai i le Tusi Paia ma le Lauga Nu. 1. O loo taʻua nei suiga ma auala e faatino ai vaega i le aʻoga, i palakalafa o loo mulimuli mai.

³ Manatu Tāua Mai i le Tusi Paia: E lua minute ua tuuina atu i uso ua tofia i ai lenei vaega, ina ia iloilo ai se manatu e aogā se tasi mai le faitau Tusi Paia o le vaiaso. O le lelei o sauniuniga e mafai ai ona faasoa atu se manatu e aogā i le faapotopotoga, i totonu o le taimi faatulagaina. Pe a uma, e tuu atu i le faapotopotoga minute e 6 e fai mai ai ni o latou sao e taʻi 30 sekone le umi pe itiiti ifo, i manatu ua latou talisapaia mai i le faitau Tusi Paia. E manaʻomia sauniuniga ma le pulea ina ia mafai ai ona taʻua se manatu aogā i totonu o le 30 sekone. Peitaʻi o le faia faapea o se toleniga mo i tatou. O le a tuu ai le avanoa i isi ina ia fai so latou sao i manatu na aʻoaʻoina mai i a latou lava saʻiliʻiliga.

⁴ Lauga Nu. 1: Ua faaitiitia le taimi faatulagaina mo le faitau Tusi Paia, i le tolu minute pe itiiti ifo, ma ua faaitiitia foʻi fuaiupu e faitau. E tatau i ē o le a tofia i ai lenei lauga ona faataʻitaʻi soo, e ala i le faitau leotele ma uaʻi atu ia saʻo le faaleoga o upu ma ia sologa lelei, ina ia malamalama le auala e faaoo atu ai manatu. E tatau i tagata uma o Ieova ona taumafai ia lelei le faitau, auā o se vala e tāua i la tatou tapuaʻiga. E tatou te matuā fiafia ona o le toʻatele o a tatou fanau e lelei le faitau, ma e faamālō atu ai i mātua mo taumafaiga lelei ina ia fesoasoani i fanau ia lelei le faitau.

⁵ Lauga Nu. 2: O lenei lauga e tofia atu i se tuafafine ma e lima minute e fai ai. E tatau i le failauga ona faaaogā le matua ua tofia atu. Pe afai e faavae le lauga mai i le tamaʻi tusi Se Faatomuaga o le Afioga a le Atua, po o se fesili e masani ona lāgā i le talaʻiga, e ao ona faatatau i se vala o le auaunaga o le fanua e fetaui lelei ma aogā i le oganuu a le faapotopotoga. Pe afai o le lauga e faatatau i se tagata o loo taʻua i le Tusi Paia, e tatau i le failauga ona iloilo totoʻa faamatalaga e faatatau i lenā tagata, ia filifili lelei mau e talafeagai, ma taʻua lesona e aʻoaʻoina mai i lea tagata. E ono mafai foʻi ona faaaogā ni mau faaopoopo e fesootaʻi atu i le matua. O le a tofia e le ovasia o le aʻoga se fesoasoani se toʻatasi.

⁶ Lauga Nu. 3: O lenei lauga e lima minute e fai ai ma e mafai ona tofia i se uso po o se tuafafine. Pe a tofia atu i se tuafafine, e tatau ona taulima e pei o le Lauga Nu. 2. Pe a tofia atu i se uso ma e faavae mai i se tagata o le Tusi Paia, ia faia o se lauga e aogā mo le aofia atoa. Ia faaaogā e le failauga le matua ua tofia atu, ia filifili lelei mau e talafeagai, ma taʻua lesona e aʻoaʻoina mai i lea tagata o le Tusi Paia.

⁷ Se Vala Fou o le Lauga Nu. 3 mo Uso: Pe afai o le lauga e iai se faafetu (*), e tatau ona taulima e pei o loo fai le tapuaʻiga a le aiga pe talaʻi atu. E tofia atu e le ovasia o le aʻoga se fesoasoani ma se faatulagaga. E tatau ona faaaogā se sui o le aiga po o se uso i le faapotopotoga e fai ma fesoasoani. E ono mafai foʻi ona faaaogā ni mau faaopoopo o loo faamatilatila ai mataupu silisili e fesootaʻi atu i le matua. O nisi taimi e tofia atu lenei lauga i se toeaina, ma e ono filifili lava e le toeaina lana fesoasoani ma le faatulagaga. E mautinoa o se faalaeiauga i le faapotopotoga le vāai atu i toeaina o loo faamatilatila se tomai e aʻoaʻo atu ai, faatasi ma se sui o lona aiga po o se isi uso.

⁸ Fautuaga: Pe a māeʻa lauga taʻitasi, e faaaogā e le ovasia o le aʻoga minute e lua e faamālō atu ai i le tagata aʻoga, ma avatu ni fautuaga aogā e faavae mai i le tusi Mauaina o Aogā Mai i le Aʻoga o le Faiva Faatiokarate. Pe a faailoa atu e le ovasia o le aʻoga le lauga, e na te lē faailoaina atu le suʻesuʻega o loo galue ai le tagata aʻoga. Peitaʻi, pe a māeʻa le lauga ma faamālō atu i le failauga, e ao i le ovasia o le aʻoga ona faailoa atu le suʻesuʻega na galue ai le failauga, faamatala atu nisi o itu lelei e fesootaʻi i le suʻesuʻega na galue ai, pe faamatala atu ma le agalelei le māfuaaga e tāua ai ona uaʻi atili atu i lenā suʻesuʻega.

⁹ E maua le pepa mo le faatonutonuina mo le tagata aʻoga i lana tusi Aʻoga o le Faiva, itulau e 79 e oo i le 81. Pe a uma se lauga, e fai e le ovasia o le aʻoga ni faamaumauga talafeagai i le tusi a le failauga, ma fesili i ai a o iai na o i laʻua, pe sa ia faia mea e ao ona fai i le suʻesuʻega na galue ai. E mafai ona faamālō ma avatu nisi fautuaga aogā i le failauga, pe a uma le sauniga po o se isi taimi. E tatau ona manatu i fautuaga ia e avatu i failauga taʻitasi i le taimi o le aʻoga, o se avanoa e fesoasoani iā te ia e agaʻigaʻi ai i luma faaleagaga.—1 Timo. 4:15.

¹⁰ Pe afai e ovataimi se failauga, e tatau i le ovasia o le aʻoga po o sē e fesoasoani ona fai se faailoilo, e pei o le tā o se logo pe faapaʻō se isi mea, ina ia faailoa atu ai ma le faautauta i le failauga ua uma lana taimi. E tatau i le failauga ona amanaʻia le faailoilo, e ala i le faamuta o lana fuaiupu ma tuua loa le pulelaa.—Tagaʻi i le tusi Aʻoga o le Faiva, itu. 282, pala. 4.

¹¹ E faalaeiauina i latou uma ua ausia agavaa manaʻomia, ina ia auai i le Aʻoga o le Faiva Faatiokarate. (Tagaʻi i le tusi Aʻoga o le Faiva, itu. 282, pala. 6.) O le toleniga ua saunia mai i lenei aʻoga, ua mafai ai e tagata o Ieova ona talaʻi ma aʻoaʻo atu le tala lelei o le Malo, i se auala mautinoa, faaaloalo ma alofa. E mautinoa le faafiafiaina o Ieova ona ua viiviia e i latou uma o loo maua le tele o aogā mai i lenei toleniga mai iā te Ia.—Sala. 148:12, 13; Isa. 50:4.