Po ua Suia le Afioga Tusia a le Atua?

E taumānatu nisi tagata po ua suia le Afioga tusia a le Atua. Na taʻua e le perofeta o Isaia o le afioga a le Atua “e tumau lea e faavavau.” (Isaia 40:8) E faapefea ona tatou mautinoa na faasaoina ma le saʻo aʻiaʻi folafolaga a le Atua?

E iai le mana o le Atua e faasaoina ai lana Afioga ma puipuia ina neʻi suia le feʻau o loo iai. I aso anamua, pe a tusilima ni kopi o tusitusiga paia, e iloilo lelei e i latou o loo faia kopi mataʻitusi taʻitasi o tusitusiga paia, ina ia faamautinoa e leai se mea o faaopoopo, suia pe aveesea. E ui i lea, o nei tane e lē lelei atoatoa, ma o nisi na latou faia ni nai mea sesē.

E FAAPEFEA ONA TATOU MAUTINOA O LOO IAI I LE AFIOGA A LE ATUA I ASO NEI LANA ULUAʻI FEʻAU?

E faitau afe kopi o manusikulipi anamua o Tusitusiga Paia. Pe a iai se kopi e iai sina eseesega laʻitiiti, e mafai ona faatusatusa ma isi kopi ina ia faamaonia ai le mea moni.—Ina ia aʻoaʻo atili, tagaʻi i le mataupu “Has the Bible Been Changed or Tampered With?” i le jw.org.

Seʻi mātau se faaaʻoaʻoga i ni faamaumauga anamua e taʻua o Tusi Tāʻai o le Sami Mate, ia na maua i ana e latalata i le Sami Mate i le 1947. O nei tusitusiga mai anamua o loo iai ni vaega o Afioga a le Atua na tusia i le lua afe tausaga ua mavae. Na faatusatusa e i latou e atamamai nei manusikulipi anamua, ma le Afioga a le Atua o loo iai i aso nei. O le ā na latou mauaina?

Na iloa ai e le ʻaufaitofā e tutusa lelei le feʻau na iai i uluaʻi tusitusiga, ma le feʻau o loo iai i le Afioga a le Atua i aso nei.a O le iloiloina ma le faaeteete o manusikulipi tuai, na faamaonia ai o mea o loo tatou faitau ai i le Afioga a le Atua, o le feʻau lava lea a le Atua mai i le amataga. E mafai ona tatou mautinoa, na faasaoina ma le saʻo aʻiaʻi e le Atua lana Afioga mo i tatou i aso nei.

O lea, ua mafai ona tatou faitauina le Afioga a le Atua ma maufaatuatuaina atoatoa lona saʻo aʻiaʻi. E tusa ai ma lenā tulaga, seʻi o tatou iloiloina po o le ā e tatou te aʻoaʻoina mai i le Atua, e ala mai i ana perofeta.