“E fua mai lava e le laueleele ona fua; e faamanuia foʻi i matou e le Atua, o lo matou Atua.”—SALAMO 67:6

Olioli i Faamanuiaga e Faavavau a Lē na Foafoaina i Tatou

Na folafola mai e le Atua i le perofeta o Aperaamo, o le a maua e “nuu uma o le lalolagi” faamanuiaga i sē e tupuga mai iā te ia. (Kenese 22:18) O ai la lenei tagata na tupuga mai iā Aperaamo?

I le toetoe 2,000 tausaga talu ai, na avatu e le Atua iā Iesu o lē na tupuga mai iā Aperaamo le mana ina ia faia ai vavega ofoofogia. O na vavega na faailoa mai ai, o le a faataunuuina e ala iā Iesu le folafolaga lea na faia iā Aperaamo, e faatatau i faamanuiaga o le a maua e nuu uma.—Kalatia 3:14.

O vavega ia na faia e Iesu, na faailoa mai ai o ia lea na filifilia e le Atua e aumaia faamanuiaga i tagata, ma o loo faataʻitaʻi mai ai le auala o le a faaaogā ai e le Atua Iesu e aumaia faamanuiaga e faavavau i tagata. Mātau pe faapefea i vavega a Iesu ona faamatilatila mai ai nisi o ona uiga matagofie.

Faapelepele—Na faamālōlōina e Iesu ē e mamaʻi.

O le taimi lava na ʻaiʻoi atu ai se lepela iā Iesu e faamālōlō iā te ia, na paʻi atu i ai Iesu ma fetalai atu: “Ou te loto i ai.” Ona teʻa ai lea o lona lepela i le taimi lava lenā.—Mareko 1:40-42.

Limafoaʻi—Na fafagaina e Iesu ē na fia aai.

E leʻi manaʻo Iesu ia fia aai tagata. E lē tasi se taimi na fafagaina faavavega ai e Iesu le faitau afe o tagata i nai falaoa ma nai tamaʻi iʻa. (Mataio 14:17-21; 15:32-38) Ina ua uma ona aai, ua latou maoona ma e tele foʻi meaʻai na totoe.

Alofa Mutimutivale—Na faatūina e Iesu ē na maliliu.

O le “tigā alofa” o Iesu na ia faatūina ai le tama e toʻatasi a se fafine ua oti lana tane, o sē ua leai se tasi e tausia o ia.—Luka 7:12-15.

FAAMANUIAGA E FAAVAVAU I LE LALOLAGI

Ua uma ona faataʻitaʻi mai e Iesu e iai i le Atua le mana e na te aumaia ai faamanuiaga i tagata. Ua toeitiiti ona toe afio mai lea o Iesu e pei ona ia folafola mai, ma o le a faia e Lē e ona le malosi uma lava vavega e sili atu i le lalolagi atoa, e ala iā te ia.

O le ā le ituaiga olaga o le a iai le lalolagi pe a faataunuuina e le Atua lana folafolaga na faia iā Aperaamo? O ē e alolofa ma faaaloalo i le Atua, o le a “fai mo i latou le lalolagi” ma o le a “matuā faafiafiaina foʻi i latou ona o le tele o le filemu.” (Salamo 37:11) “E lē toe iai se oti, po o se faanoanoa, po o se tagiauē, e lē toe iai foʻi se tigā.”—Faaaliga 21:4.

Maʻeu se faamanuiaga o le ola e faavavau i se lalolagi filemu! E tele isi faamanuiaga ua toeitiiti ona aumaia lea e le pulega a le Atua. E matou te valaaulia oe ia aʻoaʻo atili e faatatau i lenei mataupu i le www.jw.org.