Galulue Soosootauʻau e Talaʻia se Oganuu e Eseese Gagana

E masani ona talilelei mai tagata i le feʻau o le Malo pe a faalogo ai i la latou lava gagana. Atonu o le māfuaaga lea i le Penetekoso 33 T.A., na faatulaga ai e Ieova “tagata Iutaia o ē e matataʻu i le Atua mai i atunuu uma i lalo o le lagi,” e faalogo i le tala lelei i a ʻlatou lava gagana,’ e ui atonu na tautatala i se gagana taatele e pei o le faa-Eperu po o le faa-Eleni. (Ga 2:5, 8) I aso nei, atonu e iai ni faapotopotoga e eseese gagana, ae e tutusa vaipanoa e iai a latou oganuu. E faapefea i tagata talaʻi i na faapotopotoga ona galulue soosootauʻau e avatu se molimau i tagata uma, e aunoa ma le soona galueaʻiina i le taimi e tasi o se oganuu, ma avea ma māfuaaga e lē fiafia ai tagata?

• 

  Fetalanoaaʻi (Fat 15:22): E tatau i ovasia o le auaunaga ona fetalanoaaʻi e saʻili se auala lelei e talaʻia ai le tala lelei. Pe afai e lē tele ni oganuu a se faapotopotoga e talaʻi i isi gagana, atonu la e lē mananaʻo e tou te faia fale i la latou oganuu. Peitaʻi, afai e faigatā iā i latou ona talaʻia uma la latou oganuu ona o le vavamamao, atonu la e sili iā i latou ona outou talaʻia la latou oganuu, ae faailoa atu se tasi e faaalia le fiafia. (od 93-94 ¶37) Pe e latou te talosaga mai foʻi i la outou faapotopotoga e fesoasoani atu e saʻili ni tagata e tautatala i la latou gagana, ma faailoa atu tuatusi po o mea e nonofo ai. (km 5/15 1) Ia manatua, e iai nisi aiga e silia ma le tasi le gagana e tautatala ai. E tatau ona ōgatusa so o se faatulagaga e faia mo le galueaʻiina o le oganuu, ma ni tulafono e faatapulaa ai le faaaogāina o faamatalaga e faatatau i se tasi.

• 

  Felagolagomaʻi (Efe 4:16): Ia mulimuli lelei i so o se taʻiala mai i le ovasia o le auaunaga. Po o e faia se suʻesuʻega faale-Tusi Paia ma se tasi e manaʻo i se isi gagana, e ese mai i le gagana o loo faaaogā e lau faapotopotoga? Atonu e vave le agaʻigaʻi i luma o le tagata suʻesuʻe, pe a tuu lana suʻesuʻega i se tasi mai i se faapotopotoga po o se vaega e lata ane e tautatala i lana gagana.

• 

  Sauniuni (Fat 15:28; 16:1): Pe a e tau i se tagata i lau oganuu e tautala i se isi gagana, ia faia taumafaiga uma e faasoa atu i ai le tala lelei. E mafai ona e sauniuni e ala i le iloa o gagana e tautatala ai tagata i lau oganuu, ma kopi i lau masini faaonapōnei ni faaliliuga o le Tusi Paia ma vitiō i na gagana. E mafai foʻi ona e faaaogā le Polokalame o le JW Language e aʻoaʻo ai ni faafeiloaʻiga i nisi o gagana.