Po o E Mātauina Uiga Lē Vaaia o le Atua?

Pe a e vaai i se fugālaau felanulanuaʻi, le fepulafi mai o fetu po o le paʻū ifo o se āfu tele, po ua e iloa ai le silisili ese o Lē na foafoaina mea? Ua faailoa manino mai e le foafoaga uiga lē vaaia o Ieova. (Ro 1:20) Pe a mafaufau i mea ua tatou vaai i ai, e mafai ona tatou mātauina ai le malosi o le Atua, o lona alofa, atamai, faamasinotonu faapea lona aaofoaʻi.​—Sl 104:24.

O ā ni galuega o le foafoaga a Ieova o loo e vaaia i aso taʻitasi? E tusa po o loo tatou nonofo i se taulaga pisi, e tatou te vaaia lava manulele ma laau. O le vaavaai lelei i foafoaga nei a Ieova e mafai ona fesoasoani iā i tatou e faaitiitia ai popolega, uaʻi atu ai i mea e sili ona tāua i le olaga, ma faateleina ai lo tatou maufaatuatuaina o le tomai o Ieova e tausia i tatou e oo i le faavavau. (Mat 6:25-32) Pe afai e iai sau fanau, fesoasoani iā i latou ina ia mātauina uiga e lē mafaatusalia o Ieova. A o faateleina lo tatou talisapaia o le foafoaga, o le a atili ai ona tatou vavalalata atu i Lē na foafoaina mea.​—Sl 8:3, 4.

MAIMOA I LE VITIŌ UA FAAILOA MAI LE MAMALU O LE ATUA I LE MATAGOFIE O FOAFOAGA—MALAMALAMA MA LANU, ONA TALI LEA O FESILI NEI:

• O le ā e māfua ai ona tatou vaaia lanu eseese?

• O le ā e māfua ai ona fesuisuiaʻi lanu e fua i le itu o loo e vaai atu ai?

• Aiseā e fesuisuiaʻi ai lanu e tatou te vaaia i le lagi?

• O ā ni lanu mananaia o loo e vaaia i lou siʻosiʻomaga?

• Aiseā e tatau ai ona faaalu se taimi e tatou te vaavaai lelei ai i le foafoaga?