O Fetauaiga a Tupu i le Taimi o le Iʻuga
O Fetauaʻiga a Tupu i le Taimi o le Iʻuga O nisi o valoaga o loo i lenei siata o loo faamatalaina ai mea e tutupu i le taimi e tasi. E tele auala ua faamaonia ai e nei valoaga, o loo tatou ola “i le taimi o le iʻuga.”—Tani. 12:4.
Mau Faaa. 11:7; 12:13, 17; 13:1-8, 12
Valoaga Ua faitau afe tausaga o pule le “manufeʻai.” I le taimi o le iʻuga, na faamanuʻalia ai lona ulu lona fitu. Mulimuli ane, na pē lona manuʻa ma na mulimuli “le lalolagi uma” iā te ia. Ua faaaogā e Satani le manufeʻai e “tau le taua ma ē o totoe.”
Faataunuuga Ina ua māeʻa le Lolo, na puleaina e malo na avea ma fili o Ieova ona tagata. E silia ma le 3,000 tausaga mulimuli ane ai, na vaivai ai le pulega a Peretania o se tasi o malo malosi, i le taimi o le Taua Muamua a le Lalolagi. Ae na toe malosi ina ua ʻau faatasi ma le Iunaite Setete o Amerika. Ua faaaogā e Satani lana faiga o mea faapolotiki uma e sauāina tagata o le Atua, aemaise lava i lenei taimi o le iʻuga.
Mau Tani. 11:25-45
Valoaga O fetauaʻiga a tupu o le itu i mātū ma le tupu o le itu i saute i le taimi o le iʻuga.
Faataunuuga Na fetauaʻi Siamani ma le malo malosi o Peretania ma Amerika. I le 1945, na avea le Soviet Union faatasi ai ma malo na lagolagoina o ia ma tupu o le itu i mātū. Ae na faataapeapeina le Soviet Union i le 1991, ma mulimuli ane avea Rusia faatasi ai ma malo o loo lagolagoina o ia ma tupu o le itu i mātū.
Mau Isa. 61:1; Mala. 3:1; Luka 4:18
Valoaga Na auina mai e Ieova lana “avefeʻau” e ʻsaunia se ala’ a o leʻi faavaeina le Malo faa-Mesia. Na amata ona ia “folafola atu le tala lelei i ē e agamalu.”
Faataunuuga Talu mai le 1870 ma faasolo mai ai, na galulue maelega C. T. Russell ma ana aumea e suʻesuʻe le Tusi Paia ina ia iloa aʻoaʻoga moni o loo iai. I le 1881, na latou iloa ai e matuā tāua i auauna a le Atua ona talaʻi. Na latou lomiaina mataupu e pei o le “Wanted 1,000 Preachers” ma le “Anointed to Preach.”
Mau Mata. 13:24-30, 36-43
Valoaga Ua lūlūina e se fili vao leaga i se fanua o loo ola ai saito. Na ola le vao leaga ma natia ai saito. I le taimi o le seleselega, o le a tuueseese ai vao leaga ma saito.
Faataunuuga E amata mai i le 1870, na matuā manino ai le eseesega o Kerisiano moni mai i Kerisiano pepelo. I le taimi o le iʻuga, o le a aoaoina ai Kerisiano moni ma tuuese mai i Kerisiano pepelo.
Mau Tani. 2:31-33, 41-43
Valoaga O se faatagata e faia i mea eseese, o ona vae e fai i le uʻamea ma le omea.
Faataunuuga O le omea e faaāta ai tagata tetee o loo pulea e le Malo Malosi o Peretania ma Amerika. O na tagata tetee, ua lē mafai ai e nei malo malolosi ona pule e pei o le malosi o le uʻamea.
Mau Mata. 13:30; 24:14, 45; 28:19, 20
Valoaga Ua ao mai “le saito” ma tuu i le “fale saito” ma tofia le “pologa faamaoni ma le faautauta” e ʻvaavaaia le ʻaufaigaluega.’ Ua oo atu le talaʻiina o le “tala lelei o le malo i le lalolagi atoa.”
Faataunuuga I le 1919, na tofia ai le pologa faamaoni ma le faautauta e vaavaaia tagata o le Atua. Na faaauau le galuega talaʻi a Tagata Aʻoga o le Tusi Paia i lenā taimi ma faasolo mai ai. I aso nei, o loo talaʻi Molimau a Ieova i le silia ma le 200 atunuu, ma saunia lomiga faale-Tusi Paia i le silia ma le 1,000 gagana.
Mau Tani. 12:11; Faaa. 13:11, 14, 15
Valoaga O loo tausolomua se manufeʻai e lua ona seu i le faia o “se faatusa o le manufeʻai,” ma “mānava atu i le faatusa.”
Faataunuuga Na tausolomua le Malo Malosi o Peretania ma Amerika i le faavaeina o Malo Sosoo. Na lagolagoina e isi malo lenei faalapotopotoga. Na iʻu ina lagolagoina foʻi e le tupu o le itu i mātū Malo Sosoo mai i le 1926 i le 1933. Na pei lava Malo Sosoo o Malo Aufaatasi na sosoo atu i ai, na ia fāoa le viiga e na o le Malo o le Atua e tatau i ai.
Mau Tani. 8:23, 24
Valoaga O se tupu e mata paū o le a ia aumaia le “matuā faafanoina.”
Faataunuuga Ua matuā faaleagaina ma fasiotia e le Malo Malosi o Peretania ma Amerika le tele o tagata ma meafaitino. O se faaaʻoaʻoga, i le taimi o le Taua Lona Lua a le Lalolagi, na faapaʻū ai e le Iunaite Setete ni pomu atomika se lua i se malo na avea ma o la fili ma Peretania. Na matuā faaleagaina e na pomu le tele o mea, nai lo o se isi lava pomu na pā i se taimi muamua atu.
Mau Tani. 11:31; Faaa. 17:3, 7-11
Valoaga Ua alu aʻe mai i le tō le “manufeʻai e lanu mūmū sesega” e sefulu ona seu ma o le tupu lona valu. O loo taʻua e le tusi o Tanielu lenei tupu o “le mea e inosia ua faatafuna aʻi.”
Faataunuuga Na faalēaogāina Malo Sosoo i le taimi o le Taua Lona Lua a le Lalolagi. Ina ua māeʻa le taua, na “faatūina” ai Malo Aufaatasi. I le pei o Malo Sosoo lea na iai muamua, ua maua e Malo Aufaatasi le viiga lea e tatau i le Malo o le Atua. O le a faaumatia e Malo Aufaatasi lotu.
Valoaga O le a alaga e malo le ʻfilemu ma le saogalemu,’ ma o le a osofaʻia e “seu e sefulu” ma le “manufeʻai” “le fafine talitane” ma faaumatia ai o ia. Pe a uma lenā, o le a faaumatia loa malo.
Faataunuuga O le a faapea mai malo ua latou ausia le filemu ma le saogalemu. Ona faaumatia lea e malo o loo lagolagoina Malo Aufaatasi ia faalapotopotoga o lotu sesē uma. O le amataga lenā o le puapuaga tele. E māeʻa le puapuaga tele pe a faaumatia e Iesu malo uma o le lalolagi iā Amaketo.
Mau Eseki. 38:11, 14-17; Mata. 24:31
Valoaga E osofaʻia e Koku le laueleele o tagata o le Atua. Ona aoaoina ai lea e agelu o “ē ua filifilia.”
Faataunuuga E auaufaatasi le tupu o le itu i mātū ma malo uma o le lalolagi e osofaʻia tagata o le Atua. Pe a mavae se taimi talu ona amata lenei osofaʻiga, o le a aoaoina ai i le lagi le vaega totoe o le ʻaufaauuina.
Mau Eseki. 38:18-23; Tani. 2:34, 35, 44, 45; Faaa. 6:2; 16:14, 16; 17:14; 19:20
Valoaga O “lē o loo tiʻetiʻe” i le “solofanua paʻepaʻe” e “manumalo aʻiaʻi” ina ua ia faaumatia Koku ma lana ʻautau. O le a ʻlafoina i le lepa afi’ “le manufeʻai,” ma o le a nutipalaina le faatagata telē.
Faataunuuga O le a laveaʻiina tagata o le Atua e Iesu, le Tupu o le Malo o le Atua. O Iesu, lana 144,000 ma ana ʻautau o agelu, o le a faaumatiaina le tuufaatasiga o malo e osofaʻia tagata o le Atua. O le iʻuga lenā o le lalolagi a Satani.