Fesili Mai le ʻAufaitau
Po o uiga o loo lisiina mai i le Kalatia 5:22, 23, ua na o le pau na o vala o “le fua o le agaga”?
O loo lisiina mai i lenei mau uiga faa-Kerisiano e iva: “A o le fua o le agaga, o le alofa, o le olioli, o le filemu, o le faapalepale, o le agalelei, o le mataalofa, o le faatuatua, o le agamalu, ma le amio pulea.” Peitaʻi, e lē tatau ona manatu e na o le pau ia o uiga lelei e mafai e le agaga o le Atua ona fesoasoani iā i tatou e atiaʻe.
Seʻi mātau faamatalaga a Paulo na taʻua i fuaiupu na muamua atu: ʻO galuega a le tino, o le faitaaga, o le amio lē mamā, o le amio matagā, o le ifo i tupua, o faiga faaagaga, o le feitagaʻi, o le femisaaʻi, o le lotoleaga, o le lotoa, o le finauvale, o fevaevaeaʻiga, o le mulimuli i aʻoaʻoga a tagata, o le matauʻa, o onāga, o patī lē taupulea, ma mea faapena.’ (Kala. 5:19-21) O lea, sa ono mafai ona taʻua e Paulo isi mea e aofia ai i “galuega a le tino” e pei o mea o loo taʻua i le Kolose 3:5. I se tulaga talitutusa, ina ua uma ona taʻua e Paulo uiga lelei e iva, ona ia faapea mai lea: “E lē faatulafonoina mea faapena.” O lea, e leʻi taʻua e Paulo uiga lelei uma e mafai ona tatou atiaʻe, e ala i le fesoasoani a le agaga paia.
E faamaonia lenei mea pe a tatou faatusatusa lenei lisi ma upu a Paulo na tusi atu ai i le faapotopotoga i Efeso: “O le fua o le malamalama o mea lelei uma lava, ma le amiotonu ma le upu moni.” (Efe. 5:8, 9) Ioe, o“mea lelei,” o le amiotonu ma le upu moni o ni vaega o le “fua o le malamalama,” ae o vala foʻi o le “fua o le agaga.”
I se tulaga taitutusa, na apoapoaʻi atu Paulo iā Timoteo ina “ia saʻili le amiotonu, le faamaoni i le Atua, le faatuatua, le alofa, le tumau ma le agamalu,” o ni uiga lelei se ono. (1 Timo. 6:11) E na o le tolu o na uiga (faatuatua, alofa, ma le agamalu) o loo taʻua o ni vala o “le fua o le agaga.” Peitaʻi, na manaʻomia foʻi e Timoteo le fesoasoani a le agaga paia, ina ia atiaʻe ai isi uiga e pei o le amiotonu, faamaoni i le Atua ma le tumau.—Faatusatusa i le Kolose 3:12; 2 Peteru 1:5-7.
O lea la, e lē o taʻua i le Kalatia 5:22, 23 uiga faa-Kerisiano uma e tatau ona tatou atiaʻe. E mafai ona fesoasoani le agaga o le Atua iā i tatou ina ia atiaʻe uiga po o vala e iva o “le fua o le agaga.” Ae e iai isi uiga e manaʻomia foʻi ona atiaʻe ina ia avea ai i tatou ma Kerisiano taʻumatuaina, ma oofu ai i le “tagata fou na foafoaina e tusa ma le finagalo o le Atua, i le amiotonu moni ma le faamaoni.”—Efe. 4:24.