Po o Faafofoga le Atua i a Tatou Tatalo?

O LOO FAAFOFOGA MAI LE ATUA.

“Le Faafofoga tatalo e, e ō atu iā te oe ituaiga uma o tagata.”—Salamo 65:2.

E tatalo nisi ona e latou te manatu e lelei ai o latou faalogona, e ui lava e latou te talitonu e lē o faafofoga mai se tasi. Ae o le tatalo, e lē na o se mea e tau ina lelei ai o tatou faalogona ina ia onosaia ai faafitauli. O loo faamautinoa mai e le Tusi Paia, “E latalata Ieovaa iā i latou uma e valaau atu iā te ia, o i latou uma e valaau atu iā te ia ma le faamaoni. . . . E faafofoga foʻi o ia i a latou alaga mo se fesoasoani.”—Salamo 145:18, 19.

O lea e mafai ona tatou mautinoa, e faafofoga Ieova le Atua i tatalo a ona tagata tapuaʻi. Ua ia faapea mai: “E tou te valaau mai iā te aʻu, ma ō mai ma tatalo mai iā te aʻu, ona ou faalogo atu ai lea iā te outou.”—Ieremia 29:12.

E FINAGALO LE ATUA E TATALO ATU IĀ TE IA.

“Ia finafinau i le tatalo.”—Roma 12:12.

Ua faalaeiauina i tatou e le Tusi Paia, ina ia “tatalo e lē aunoa” ma ia ʻfaaauau ona tatalo i taimi uma.’ E manino mai, e finagalo Ieova le Atua e tatou te tatalo atu iā te ia.—Mataio 26:41; Efeso 6:18.

Aiseā e finagalo ai le Atua e tatou te tatalo atu iā te ia? Ia mātau: E fiafia se tamā pe afai e fesili atu sona atalii iā te ia mo se fesoasoani. E mautinoa ua iloa e le tamā manaʻoga ma faalogona o lona atalii, peitaʻi pe a faalogo atu i na upu, ua faailoa atu ai le maufaatuatuaina ma le māfana atu o lona atalii iā te ia. I se tulaga talitutusa, pe a tatou tatalo atu iā Ieova le Atua, e faailoa atu ai tatou te maufaatuatuaina o ia, ma tatou te mananaʻo e māfana atu iā te ia.—Faataoto 15:8; Iakopo 4:8.

E MANATU MAMAFA LE ATUA IĀ TE OE.

“[Ia] lafo atu o outou popolega uma iā te ia, auā o loo manatu mamafa mai o ia iā te outou.”—1 Peteru 5:7.

E finagalo le Atua ia tatou tatalo atu iā te ia, ona e manatu mamafa mai ma alofa iā i tatou. E na te silafia lelei o tatou faafitauli ma popolega, ma e finagalo o ia e fesoasoani iā i tatou.

I le olaga o Tavita, na ia tatalo atu ai iā Ieova le Atua mo se fesoasoani, ma taʻu atu iā te ia ona manatu ma ona faalogona. (Salamo 23:1-6) O ā faalogona o le Atua e faatatau iā Tavita? Na alofa le Atua iā Tavita, ma faafofoga i le tele o ana tatalo. (Galuega 13:22) E faafofoga mai foʻi le Atua i a tatou tatalo, ona e manatu mamafa mai o ia iā i tatou.

“OU TE ALOFA IĀ IEOVA, AUĀ E FAAFOFOGA MAI O IA I LOʻU LEO”

O upu na na fatuina e se faisalamo o loo i le Tusi Paia. Na ia mautinoa na faafofoga mai le Atua i ana tatalo, ma na matuā fesoasoani lenā mea iā te ia. Na ia māfana atu ai i le Atua, ma maua le malosi e onosaia ai.—Salamo 116:1-9.

Pe a tatou mautinoa o loo faafofoga le Atua i a tatou tatalo, o le a faaauau ai ona tatou tatalo atu iā te ia. Mātau le mea na tupu iā Pedro mai i Sepania, o lē na maliu lona atalii e 19 tausaga i se faalavelave tau taavale. Na faailoa atu e Pedro ona faalogona moni i le Atua, ma tatalo atu pea mo faamāfanafanaga ma le fesoasoani. O le ā le mea na tupu? Ua faapea mai Pedro: “Na tali mai Ieova i aʻu tatalo, e ala i faamāfanafanaga ma le fesoasoani na ma maua ma laʻu avā mai uso Kerisiano.”

E ui e leʻi toe ola le atalii o Pedro, ae na fesoasoani tele le tatalo iā te ia ma lona aiga. Na faapea mai lana avā o María Carmen: “Na fesoasoani le tatalo e onosaia ai oʻu mafatiaga. Na ou iloa o loo malamalama lelei Ieova iā te aʻu, auā pe a ou tatalo iā te ia ou te lagona le toʻafilemu.”

Ua faaalia i le Tusi Paia ma mea na tutupu i olaga o tagata, e faafofoga le Atua i tatalo. Peitaʻi, ua faaalia mai ai foʻi, e lē o tatalo uma e faafofogaina e le Atua. Ae aiseā la ua lē talia ai e le Atua isi tatalo?