Pe e Mautinoa e Maua se Lumanaʻi Lelei Ona o Aʻoga ma Tupe?

E toʻatele e manatu o i latou e lelei aʻoga ma tele tupe, e maua se lumanaʻi manuia. E latou te talitonu o le a manuia kamupani, aiga ma nuu pe a maua e tagata faailoga mai i iunivesite. E latou te talitonu foʻi o le lelei o aʻoaʻoga o le a maua ai galuega e lelei totogi, ma o i latou e tele tupe o le a maua le fiafia.

SE FILIFILIGA UA FAIA E LE TOʻATELE

Seʻi mātau faamatalaga a Zhang Chen mai i Saina. Na ia faapea mai, “Na ou talitonu e manaʻomia soʻu faailoga mai i se iunivesite ina ia aua ai neʻi oʻu ola mativa, ma o le iai o se galuega e lelei le totogi, o le a faamautinoa ai le mauaina o se olaga fiafia ma faamalieina.”

Ina ia maua se olaga lelei, e toʻatele ua mananaʻo e aʻoʻoga i iunivesite iloga, atonu i nisi atunuu. Na matuā taatele lenei faiga, seʻia oo mai i le taimi na faigatā ai femalagaaʻiga i le vā o atunuu ona o le KOVITI-19. Na taʻua i se lipoti i le 2012 mai i le Organisation for Economic Co-operation and Development e faapea: “O le 52% o tagata o loo aʻoʻoga i isi atunuu, o tagata Asia.”

E masani ona tele faataulaga e faia e mātua ina ia mafai ai ona aʻoʻoga a latou fanau i iunivesite i isi atunuu. Ua faapea mai Qixiang mai i Taiwan: “E lē tele ni tupe a oʻu mātua, ae na la aauina atu la matou fanauga e toʻafā i aʻoga maualuluga i le Iunaite Setete.” E tele aitalafu na faia e lona aiga e pei foʻi o isi ina ia totogi ai nei aʻoga.

PE E MAFAI E AʻOGA ONA AUMAIA SE LUMANAʻI SAOGALEMU?

O se tasi o teine talavou ua vaivai ma popole a o nofo i luma o lana komepiuta i le leva o le pō. — O le toʻatele na saʻilia aʻoaʻoga maualuluga ma le tamaoaiga ua iʻu ina mafatia ai

E mafai e aʻoga ona faaleleia nisi vala o le olaga, ae e lē o taimi uma e maua ai e tagata aʻoga iʻuga na latou faatalitalia. O se faaaʻoaʻoga, o le toʻatele na galulue mamafa mo le tele o tausaga ma aitalafu le tele o tupe e totogi ai aʻoga, ae e lē o mauaina galuega na latou mananaʻo i ai. Ua faapea mai le lipoti a Rachel Mui i le Business Times a Sigapoa: “Ua faatupulaʻia tagata na faauu mai i iunivesite ua lē maua ni galuega.” Ua faapea mai Jianjie o se tagata e tele ona faailoga e nofo i Taiwan, “E toʻatele ua lē maua ni galuega e fetaui ma a latou faailoga.”

A o i latou na maua galuega na mananaʻo i ai, atonu e latou te lē o maua le olaga na latou moomoo i ai. Ina ua toe foʻi Niran i Taialani mai i lana aʻoga i se iunivesite i Peretania, na ia maua se galuega e fetaui lelei ma lona faailoga. Na ia faapea mai, “E pei ona ou faatalitalia, na fesoasoani loʻu faailoga ou te maua ai se galuega e telē le totogi. Peitaʻi, o le telē o le totogi o le tele foʻi na o galuega ma le taimi e alu ai. Na oo lava ina faamālōlō e le kamupani le toʻatele o tagata faigaluega e aofia ai ma aʻu. O i inā na ou iloa ai, e leai lava se galuega e mafai ona ou maua ai se lumanaʻi saogalemu.”

E oo lava foʻi iā i latou e tele tupe ma e foliga mai o loo taulau manuia, o loo feagai pea ma faafitauli i le aiga, maʻi, ma le popole i tupe. Ua taʻutino mai Katsutoshi mai i Iapani, “Na tele aʻu tupe ae ou te leʻi maua le fiafia, ona na lotoleaga ma agaleaga mai isi iā te aʻu.” Ua faapea mai Lam, o se fafine e nofo i Vietiname, “E toʻatele ua taumafai e maua le tele o tupe ona e latou te manatu o le a aumaia ai le saogalemu, ae e masani lava e na o le faateteleina ai o le popole, ma oo atu lava ina mamaʻi ma maua ai i le lotomafatia.”

E LĒ LAVA LE TAU INA IAI O AʻOAʻOGA MA TUPE

E mautinoa e manaʻomia ona aʻoʻoga tagata, ma maua tupe ina ia tausia ai i latou ma o latou aiga. Peitaʻi, e lē lava le tau ina iai o nei mea e maua ai se lumanaʻi saogalemu. Aiseā? Ia mātau manatu nei mai i le Tusi Paia.

E LĒ O TAIMI UMA E AUMAIA AI E AʻOGA MAUALULUGA LE TAULAU MANUIA.

“E lē manumalo pea i le tausinioga o ē e saosaoa, . . . pe e maua e ē ua malamalama le tamaoaiga, pe e aloaʻia foʻi i latou ua popoto; auā e tutupu faafuaseʻi mea iā i latou uma i le taimi e leʻi faatalitalia.”—FAILAUGA 9:11.

E oo lava foʻi iā i latou e sili ona lelei aʻoaʻoga, e ono lē taulau o latou olaga ona o le tele o mea e lē mafai ona latou puleaina. O faafitauli tau tamaoaiga, o faiga lē tonu ma le faailoga tagata, ua lē mafai ai e i latou e matuā lelei aʻoaʻoga ona faia mea e latou te mananaʻo i ai.

E ONO MOU ATU LE TAMAOAIGA.

“Aua e te galue mamafa ina ia maua ai le tamaoaiga. Aua e te faalagolago i lou lava malamalama. Pe e tulimataʻi ea e ou mata le mea e mou atu? Auā e mautinoa e fai ona apaʻau e pei o apaʻau o le aeto ma lele atu i le lagi.”—FAATAOTO 23:4, 5.

E lē tumau le saogalemu lea e maua mai i tupe. E pei lava o le emo o le mata le mou atu o au tupe. O mala faalenatura e pei o mafuiʻe, mū tetele, ma afā, e mafai ona mou atu ai tupe a se tasi ma leai ai se mea e nofo ai.

E MASANI ONA FAAPOGAIA E TUPE FAAFITAULI.

“O le tele o mea a le tagata mauʻoa e lē mafai ai ona moe o ia.”—FAILAUGA 5:12.

Na tofo Franklin e nofo i Hong Kong i le moni o nei upu atamai. Na lelei lona tulaga tauaʻoaʻoga ma na iai sana galuega e lelei le totogi. Na siitia lona tulaga ma avea ma pule. Na ia faapea mai, “O loʻu popole tele na aafia ai loʻu soifua mālōlōina ma na lē mafai ai ona ou moe.” Na oo lava ina lē mafai ona ia toe faaauauina le galuega. Na ia faapea atili mai, “Na ou tuufesili pe aiseā na ou faia ai lenei mea, ma iʻu ai ina ou mafaufau atili pe e iai se fuafuaga o le olaga.”

“Aua e te galue mamafa ina ia maua ai le tamaoaiga.”—FAATAOTO 23:4

E pei o Franklin, ua iloa e le toʻatele e iai isi mea e sili atu ona tāua i le olaga nai lo o le saʻilia o aʻoaʻoga maualuluga ma le tamaoaiga. Nai lo o le taulaʻi o o latou olaga i meafaitino, o isi ua saʻilia se lumanaʻi lelei e ala i le taumafai e avea ma tagata lelei, ma faia mea lelei i isi. Ae po o le saʻilia o lenā ituaiga olaga o le a faamautinoa ai se lumanaʻi saogalemu? O le a tali lenā fesili i le mataupu o loo sosoo mai.