Po o le Avea ma Tagata Lelei, e Mautinoa E te Maua ai se Lumanaʻi Saogalemu?

Mo le faitau selau o tausaga, e toʻatele e manatu o le avea ma tagata lelei o le auala lea e maua ai se lumanaʻi saogalemu. O se faaaʻoaʻoga, e ioe tagata i Sasaʻe Tutotonu i le faamatalaga a Confucius (551-479 T.L.M.), o se faifilosofia taʻutaʻua e faapea: “O mea e te lē manaʻo e faia e isi iā te oe, aua e te faia i isi.”

O SE ALA UA UIA E LE TOʻATELE

O loo talitonu pea le toʻatele pe a latou amiolelei, o le a latou maua la se lumanaʻi saogalemu. E latou te taumafai e faaalia le faaaloalo, le āva fatafata, amanaʻia a latou matafaioi i le olaga, ma tausisia ni lotofuatiaifo lelei. Ua faapea mai Linh o se fafine i Vietiname, “Na ou talitonu pe a ou faaalia le faamaoni, o le a faamanuiaina aʻu.”

O le fafine lava lea o loo ia asu atu meaʻai i tagata matitiva ma tagata ua leai ni fale e nonofo ai.

O nisi ua uunaʻia e o latou talitonuga faalotu ina ia faia mea lelei. Ua faapea mai Hsu-Yun o se tamāloa e nofo i Taiwan e faapea, “Na aʻoaʻoina aʻu pe a faia e se tasi mea lelei o le a ia maua le fiafia pe a mavae le oti, ae pe a ia faia mea leaga o le a mafatia o ia.”

O Ā IʻUGA?

O le fafine ina ua uma le aso ua foliga faanoanoa ma matuā vaivai ma o loo ia opo i lana tama tama.

O le mea moni, e tatou te maua le tele o aogā pe a tatou faia mea lelei i isi. Peitaʻi, o le toʻatele o loo taumafai e faia mea lelei i isi, ua latou iloa e lē o taimi uma e iʻu atu ai i mea na latou faatalitalia. Ua faapea mai Shiu Ping o se fafine e nofo i Hong Kong, “Na ou iloa mai i mea na tutupu iā te aʻu, e lē o taimi uma e faamanuiaina ai i latou e faia mea lelei. Na ou faia le mea sili e tausia ai loʻu aiga ma faia mea lelei. Ae na malepe laʻu faaipoipoga, ma na tuua e laʻu tane i maʻua ma laʻu tama tama.”

Ua iloa e le toʻatele, e lē o tagata lolotu uma e lelei. Ua faapea mai Etsuko, o se fafine e nofo i Iapani, “Na ou auai i se lotu ma na amata ona ou faamaopoopoina mea e fai e le ʻau talavou. Na faateʻia aʻu ina ua ou iloa, o nisi o tagata o le lotu o loo faia amioga lē mamā, faatautavā ina ia maua le pule, ma faaaogāsesē tupe a le lotu.”

“Na ou faia le mea sili e tausia ai loʻu aiga ma faia mea lelei. Ae na malepe laʻu faaipoipoga, ma na tuua e laʻu tane i maʻua ma laʻu tama tama.”—SHIU PING, HONG KONG

Ua faanoanoa nisi tagata mapolotu ona ua lē tauia a latou gaoioiga lelei. E faapena faalogona na oo iā Van o se fafine mai i Vietiname. Na ia faapea mai, “O aso uma ou te faatauina ai fualaau ʻaina, fugālaau, ma meaʻai, ma ofo atu i oʻu tuaa ua maliliu ma le faamoemoe o le a ou mauaina faamanuiaga i le lumanaʻi. E ui i gaoioiga lelei uma ma tū faalelotu na ou faia mo le tele o tausaga, ae na aafia lava laʻu tane i se maʻi tugā. Na oti foʻi laʻu tama teine e 20 tausaga a o aʻoga i se isi atunuu.”

E LĒ LAVA LE TAU INA AVEA MA TAGATA LELEI

E tāua le avea ma tagata lelei, ae e lē lava lea e faamautinoa ai se lumanaʻi saogalemu. Aiseā? Ia mātau manatu nei mai i le Tusi Paia.

E LĒ FILIFILI TAGATA UMA E FAI MEA LELEI.

“E tele mea lelei e faaleagaina e le tagata agasala.”—FAILAUGA 9:18.

E tusa pe e te taumafai malosi e avea ma tagata lelei, ae e mafai ona lamatia lou lumanaʻi ona o gaoioiga manatu faapito a isi. O se faaaʻoaʻoga, a o pepesi le faamaʻi, atonu o loo e utagia fautuaga mai i le malo ma tausisia le vā faatulagaina ma isi. Ae faapefea pe afai e mumusu isi e faia faapea? O a latou gaoioiga e mafai ona aafia ai le soifua mālōlōina o isi o loo taumafai e faia le mea saʻo.

E ONO SESĒ MANATU O TAGATA I LE MEA E LELEI MA LE MEA E LEAGA

“Ua iai le ala e tonu i le manatu o le tagata, a o lona taunuuga o ala ia e oti ai.”—FAATAOTO 14:12.

E tele faaaʻoaʻoga i le talafaasolopito i tagata na uia se ala na manatu e lelei, ae na latou iloa mulimuli ane e lē saʻo. E ui na manatu na latou faia mea lelei, ae na latou mafatia ona o filifiliga lē lelei na latou faia.

E LĒ ILOA MEA E TUTUPU I LE OLAGA

“E tou te lē iloa le mea o le a tupu iā te outou a taeao.”—IAKOPO 4:14.

E oo lava i tagata lelei e mafai ona oo faafuaseʻi i ai le oti. O se faaaʻoaʻoga, a o faagasolo le faamaʻi o le KOVITI-19, na maliliu le toʻatele a o taumafai e fesoasoani i isi. Seʻi manatu foʻi i le mea na tupu iā Liting, o se fafine mai i Saina na maliu lona tamā i se faalavelave tau taavale. Na ia faapea mai, “Ou te lē malamalama pe aiseā ua oti ai se tagata e ese le agalelei. O loʻu tamā o se tagata galue mamafa, lotomaulalo ma faamaoni. E na o ia lava le tagata na oti i le faalavelave.”

Pe afai e lē lava le tau ina avea ma tagata lelei e faamautinoa ai se lumanaʻi saogalemu, e faapefea la ona maua? Ina ia tali lenei fesili, e tatou te manaʻomia se taʻiala maufaatuatuaina, o se puna o faamatalaga e mafai ona taliina a tatou fesili ma taʻitaʻia i tatou i se lumanaʻi saogalemu. O fea e tatou te mauaina ai lenā taʻiala?