Pe E te Manatua?
Pe na e faitau māeʻaeʻa i lomiga taʻitasi o Le Olomatamata o lenei tausaga? O lea, pe mafai ona e taliina fesili o loo mulimuli mai?
O le ā le faamautinoaga o loo aumaia i le Iakopo 5:11 i le faapea mai, e “alofa faapelepele” ma “alofa mutimutivale” Ieova?
E tatou te iloa o le alofa mutimutivale o Ieova, o le māfuaaga lenā e finagalo ai o ia e faamagalo a tatou mea sesē. Ua faamautinoa mai i le Iakopo 5:11, e alofa faapelepele foʻi Ieova ma e na te saunia le fesoasoani mo i tatou. E tatou te mananaʻo e faaaʻoaʻo iā te ia.—w21.01, itu. 21.
Aiseā na faavae ai e Ieova le tulaga ulu?
Na faavae e Ieova le tulaga ulu ona o lona alofa. O le faatulagaga ulu, ua faigofie ai ona faagaoioi le ʻauaiga faamaoni o Ieova i se auala filemu ma maopoopo. O tagata taʻitasi o le aiga e faatatauina lenei faatulagaga, e latou te iloa lelei po o ai e tatau ona faia faaiʻuga, ma po o ai e tatau ona taulamua i le faatinoina o na faaiʻuga.—w21.02, itu. 3.
Aiseā e tatau ai i Kerisiano ona faaeteete i le faaaogāina o polokalame e fetalanoaaʻi ai?
Pe a filifili se tasi e faaaogā nei polokalame, e tāua tele le filifili lelei o ana uō. E faigatā tele ona faia faapea, pe a toʻatele ni tagata e fetalanoaaʻi ai i luga o nei polokalame. (1 Timo. 5:13) E iai foʻi lamatiaga o le faasalalau atu o ni mataupu e leai ni faamaoniga, ma le faaaogāina o tatou uso e suʻe ai tupe.—w21.03, itu. 31.
O ā nisi o māfuaaga na faataga ai e le Atua Iesu e puapuagatia ma maliu?
Muamua, e ala i le faatautau o Iesu i se laau e faapuapuagatia ai, ua ia faasaʻoloto ai tagata Iutaia mai i se malaia. (Kala. 3:10, 13) Lona lua, na toleniina e Ieova Iesu mo lona tofiga o le avea ma Ositaulaga Sili. Lona tolu, o le tumau faamaoni o Iesu seʻia oo i le oti, na ia faamaonia atu ai e mafai e tagata ona tumau faamaoni e ui i tofotofoga ogaoga. (Iopu 1:9-11)—w21.04, itu. 16-17.
O le ā e te faia pe a faigatā ona maua tagata i le talaʻiga?
Ia taumafai e faafesootaʻi i latou i le taimi e maua ai i le fale. E mafai foʻi ona e talaʻi i nofoaga eseese. Ia taumafai e faafesootaʻi i latou i auala eseese e pei o le faia o tusi.—w21.05, itu. 15-16.
O le ā na uiga i ai le aposetolo o Paulo ina ua ia faapea mai: “Na ou oti i le tulafono ona o le tulafono”? (Kala. 2:19)
O le Tulafono a Mose, na faailoa mai ai le lē lelei atoatoa o tagata ma taʻitaʻia ai Isaraelu i le Keriso. (Kala. 3:19, 24) O le māfuaaga lenā na talia ai e Paulo le Keriso. O le faia faapea, na ʻoti ai Paulo i le tulafono’ ua lē o toe saisaitia o ia i le tulafono.—w21.06, itu. 31.
Ua faapefea ona faataatia e Ieova se faaaʻoaʻoga mo i tatou i le faaalia o le onosaʻi?
O loo onosaʻia e Ieova le taʻuleagaina o lona suafa, le luʻia o lana pule silisili ese, le fouvalega a nisi o lana fanau, o pepelo faifai pea a Satani, o mafatiaga o ana auauna pele, misia o ana uō ua maliliu, le sauāina o tagata ma le faaleagaina o ana galuega o le foafoaga.—w21.07, itu. 9-12.
O le ā le faaaʻoaʻoga mataʻina o le onosaʻi na faataatia e Iosefa?
Na ia onosaʻia faiga lē tonu a ona uso. O lea, na tuuaʻia sesē ai o ia ma faafalepuipui ai i Aikupito mo le tele o tausaga.—w21.08, itu. 12.
O le ā le lūlūina faafaatusa na valoia i le Hakai 2:6-9, 20-22?
Na teena e atunuu le talaʻia o le Malo, ae e toʻatele tagata ua tosina mai i le upu moni. Ua toeitiiti ona feagai lea o atunuu ma le lūlūina mulimuli, pe a faaumatia i latou.—w21.09, itu. 15-19.
Aiseā e lē tatau ai ona tatou fiu e talaʻi?
E silafia e Ieova a tatou taumafaiga, ma e faafiafiaina ai o ia. Pe a tatou lē fiu ma lē faavaivai, o le a tatou maua ai le ola e faavavau.—w21.10, itu. 25-26.
E faapefea ona fesoasoani le Levitiko mataupu 19 iā i tatou e faatatau ai le fautuaga, ʻia paia outou uma i a outou amio’? (1 Pete. 1:15)
Na ono sii mai lenā fuaiupu i le Levitiko 19:2. O loo aumaia i le Levitiko mataupu 19 le tele o faaaʻoaʻoga, i le auala e tatou te faatatauina ai le 1 Peteru 1:15 i aso faisoo.—w21.12, itu. 3-4.