LE AUALA E TAOFIA AI LE FEITAGAʻI

4 | Faatoʻilalo le Feitagaʻi e Ala i le Fesoasoani a le Atua

Aʻoaʻoga a le Tusi Paia:

“O le fua o le agaga, o le alofa, o le olioli, o le filemu, o le faapalepale, o le agalelei, o le mataalofa, o le faatuatua, o le agamalu, ma le amio pulea.”—KALATIA 5:22, 23.

Le Uiga:

E mafai ona taofia le feitagaʻi e ala i le fesoasoani a le Atua. E mafai ona fesoasoani lona agaga paia iā i tatou e atiaʻe uiga atonu e lē mafai ona atiaʻe i so tatou lava malosi. O lea, nai lo o le taumafai e taofia le feitagaʻi i lo tatou lava malosi, e manaʻomia ona tatou faalagolago i le fesoasoani ua saunia mai e le Atua. O le faia faapea, o le a mafai foʻi ona oo iā i tatou faalogona na oo i le aposetolo o Paulo, lea na tusi: “O mea uma lava, ua ou maua le malosi mai iā te ia o lē na foaʻi maia iā te aʻu le mana.” (Filipi 4:13) O le a mafai foʻi ona tatou faapea atu: “O loʻu fesoasoani e mai iā Ieova lea.”—Salamo 121:2.

Mea e Mafai Ona E Faia:

“Ua suia aʻu e Ieova mai i se tagata sauā i se tagata e filemu.”—WALDO

Ia tatalo iā Ieova ma talosaga atu ma le faamaoni mo lona agaga paia. (Luka 11:13) Ia talosaga atu iā te ia e fesoasoani iā te oe ia atiaʻe uiga lelei. Ia suʻesuʻe i manatu o le Tusi Paia e faatatau i uiga e aveesea ai le ita, e pei o le alofa, filemu, faapalepale ma le amio pulea. Ia saʻili avanoa e atiaʻe ai na uiga i lou olaga, ma faifaimea faatasi ma i latou o loo taumafai e atiaʻe na uiga. O i latou na e mafai ona fesoasoani e faatupu iā te oe le alofa ma galuega lelei.—Eperu 10:24.

Se Mea Moni na Tupu—WALDO

Na Manumalo Mai i le Ita Leaga

Ona o le leaga o le olaga na tausia aʻe ai Waldo, na avea ai o ia o se tagata e ita leaga. Na ia faapea mai: “E tele ina matou fufusu ma tagata e faatauina fualaau faasāina . . . I se tasi taimi, na totogi tupe ai e se kegi se tamāloa ua iloga i le fasioti tagata e fasiotia aʻu, ae na ou sao mai i lenā faalavelave ma ni manuʻaga.”

E leʻi fiafia Waldo ina ua suʻesuʻe e lana avā le Tusi Paia ma Molimau a Ieova. Na ia faapea mai: “Sa ou ʻinoʻino i Molimau a Ieova, ma o le tele o taimi ou te lafo iā i latou upu masoā. Peitaʻi e latou te tali mai lava ma le filemu.”

I se taimi mulimuli ane, na amata ai foʻi ona suʻesuʻe e Waldo le Tusi Paia. Na ia fai mai: “E ui lava i mea na ou aʻoaʻoina, ae sa faigatā mo aʻu ona faatatauina. Sa ou manatu e lē mafai ona ou pulea loʻu uiga o le ita leaga.” Ae e iai se mea na ia aʻoaʻoina mai i le Tusi Paia, na matuā suia ai ona manatu.

Na ia faapea mai: “I se tasi aso, na faapea mai ai lē na faia laʻu suʻesuʻega o Alejandro ina ia faitau le Kalatia 5:22, 23. . . . Na ia faapea mai ina ia mafai ona ou atiaʻe nei uiga, e manaʻomia ona ou faalagolago i le agaga paia o le Atua ae lē o loʻu lava malosi. O lenā mea moni, na matuā suia atoa ai le auala ou te mafaufau ai.”

O le faalagolago o Waldo i le fesoasoani a le Atua, na mafai ai ona ia manumalo mai i lona uiga o le ita leaga. Na ia fai mai: “E matuā lē talitonu oʻu tauaiga ma aʻu uō i suiga ua ou faia i loʻu olaga.” Na ia taʻua atili: “Ua suia aʻu e Ieova mai i se tagata sauā i se tagata e filemu.”