“O i Latou e Saʻili iā Ieova, e Leai se Mea Lelei e Matitiva ai i Latou”

1. O le ā le tulaga faigatā na oo iā Tavita?

NA SOLASOLA Tavita ona na lamatia lona ola, ina ua lamalama Saulo le tupu o Isaraelu e fasioti o ia. Ina ua manaʻomia e Tavita le fesoasoani, na alu ai i le aai o Nove ma talosaga mo ni falaoa se lima. (1 Samu. 21:1, 3) Mulimuli ane na lalafi ai Tavita ma lana ʻautau i se ana. (1 Samu. 22:1) Aiseā na tupu ai lenā mea iā Tavita?

2. Aiseā e mataʻutia ai le mea na faia e Saulo? (1 Samuelu 23:16, 17)

² E toʻatele tagata na matuā fiafia iā Tavita ma viiviia o ia, ona o le tele o taua na manumalo ai, o le māfuaaga lenā na matuā lotoleagaina ai o ia e Saulo. Na iloa foʻi e Saulo na teena o ia e Ieova ona o lona lē usiusitaʻi ma ua tofia ai e Ieova Tavita e avea ma tupu. (Faitau le 1 Samuelu 23:16, 17.) Ae ona o loo avea pea Saulo ma tupu o Isaraelu, na ia pulea ai se ʻautau e toʻatele ma e toʻatele foʻi i latou na lagolagoina o ia, o lea na solasola ai Tavita. Pe na manatu Saulo e mafai ona ia taofia le faataunuuina o le finagalo o le Atua mo Tavita? (Isa. 55:11) E lē o taʻua i le Tusi Paia ae e tasi le mea e tatou te mautinoa i ai: E mataʻutia le mea na faia e Saulo, ma o i latou e faasagatau i le Atua e faatoʻilaloina!

3. O ā faalogona o Tavita e ui i mea na tutupu iā te ia?

³ O Tavita e lē o se tagata e fiasili. E lē o se loto o Tavita na filifili ai e avea ma tupu o Isaraelu, ae na filifilia o ia e Ieova. (1 Samu. 16:1, 12, 13) Na matuā ʻinoʻino Saulo iā Tavita. Ae e leʻi tuuaʻia ai e Tavita Ieova ona o lamatiaga na oo iā te ia; e leʻi faitio foʻi Tavita i le lē lava o meaʻai ma le lalafi i se ana. A o lafi Tavita i se ana atonu o inā na ia fatuina ai se pese matagofie o viiga, lea ua filifilia ai sona vaega e fai ma mau autū o lenei suʻesuʻega: “O i latou e saʻili iā Ieova, e leai se mea lelei e matitiva ai i latou.”​—Sala. 34:10.

4. O ā fesili o le a tatou talanoaina, ma aiseā e tāua ai?

⁴ I aso nei ua toʻatele auauna a Ieova o loo feagai ma le utiuti o meaʻai ma isi mea e manaʻomia i le olaga.b O le mea lenā ua tupu talu mai le faamaʻi. A o latalata mai le “puapuaga tele,” e tatou te faatalitalia la e fesagaʻia taimi e sili ona faigatā. (Mata. 24:21) O lea seʻi o tatou taliina ni fesili se fā: O le ā le auala ʻe leai ai se mea lelei na mativa’ ai Tavita? Aiseā e tatau ai ona tatou lotomalilie i mea ua tatou maua? Aiseā e tatou te mautinoa ai e tausia e Ieova i tatou? E faapefea ona tatou sauniuni i le taimi lenei mo le lumanaʻi?

“E LEAI SE MEA OU TE MATIVA AI”

5-6. E faapefea ona fesoasoani le Salamo 23:1-6 e tatou te malamalama ai i le uiga o upu a Tavita, “e leai se mea lelei e matitiva” ai auauna a le Atua?

⁵ O le ā na uiga i ai Tavita ina ua ia faapea mai, “e leai se mea lelei e matitiva” ai auauna a Ieova? E tatou te maua le tali pe a iloiloina upu talitutusa i le Salamo e 23. (Faitau le Salamo 23:1-6.) Na faatomua e Tavita lenā salamo i upu nei: “O Ieova o loʻu Leoleo Mamoe o ia. E leai se mea ou te mativa ai.” O le tele o lenā salamo, na taʻua ai e Tavita mea e sili ona tāua, o le anoanoaʻi o faamanuiaga faaleagaga na ia olioli ai ina ua ia talia Ieova e avea ma ona Leoleo Mamoe. Na taʻitaʻia e Ieova Tavita “i ala o le amiotonu” ma na Ia lagolagoina ma le faamaoni Tavita i taimi lelei ma taimi leaga. Na faailoa mai e Tavita o lona ola ai “i laufanua lauolaola” a Ieova, e lē faapea ai o le a leai ni faafitauli e tutupu iā te ia. E iai taimi atonu e lotovaivai ai o ia, e pei o loo savali i se “vanu e matuā pogisa” ma o le a iai foʻi ona fili. Ae ona o Ieova o lona Leoleo Mamoe, o le a ʻlē fefe ai o ia i se mea leaga.’

⁶ O le tali lenei i le tatou fesili: O le ā le auala ʻe leai ai se mea lelei na mativa’ ai Tavita? I le itu faaleagaga na iā te ia mea uma na ia manaʻomia. E leʻi faalagolago lona mauaina o le fiafia i meafaitino. Na faamalieina Tavita i mea na saunia e Ieova. O le mea e sili ona tāua iā te ia, o le faamanuia ma le puipuiga a lona Atua.

7. I le Luka 21:20-24, o le ā le luʻi na feagai ma Kerisiano na nonofo i Iutaia i le uluaʻi senituri?

⁷ O nei upu a Tavita e tatou te aʻoaʻoina mai ai, e tatau ona iā i tatou se vaaiga saʻo i meafaitino. E mafai ona tatou olioli i so o se meafaitino ua tatou maua, peitaʻi e lē tatau ona faamuamua i o tatou olaga. O se tasi lenā o upu moni e sili ona tāua, sa tatau ona malamalama ai nisi o Kerisiano na nonofo i Iutaia i le uluaʻi senituri. (Faitau le Luka 21:20-24.) Na lapataʻia e Iesu i latou e iai le taimi o le a ʻsiʻomia ai Ierusalema e ʻautau.’ Pe a tupu lenā mea, e tatau loa ona latou “sosola i mauga.” Pe a sosola o le a faasaoina i latou, ae e tatau ona latou tuua le tele o mea. I ni tausaga ua teʻa na taʻua ai e Le Olomatamata e faapea: “Na latou tuua o latou fanua ma fale, e leʻi tau faatali foʻi seʻi aoao uma mai mea totino nai o latou fale. Ona o le mautinoa i le puipuiga ma le lagolagosua a Ieova, na latou faamuamua ai lana tapuaʻiga na i lo se isi lava mea sa ono foliga ane e tāua.”

8. O le ā se lesona tāua e tatou te aʻoaʻoina mai i le mea na tupu i Kerisiano, na nonofo i Iutaia i le uluaʻi senituri?

⁸ O le ā se lesona tāua e tatou te aʻoaʻoina mai i le mea na tupu i Kerisiano, na nonofo i Iutaia i le uluaʻi senituri? Ua faapea mai Le Olomatamata lea sa taʻua muamua: “Atonu la o le a iai ni tofotofoga i le lumanaʻi i le auala tatou te manatu ai i mea faitino; po o mea ea na e sili atu ona tāua, po o sili atu ai ona tāua le faaolataga lea o le a maua e tagata uma o loo i le itu a le Atua? Ioe, o la tatou solaaga atonu e aofia ai ni faigatā ma le faatapulaaina o mea e mafai ona maua. O le a tatau ai ona tatou nofo sauni e fai so o se mea lava e manaʻomia, e pei ona sa faia e o tatou uso o le uluaʻi senituri o ē na sosola ese mai Iutaia.”c

9. O le ā le faalaeiauga e tatou te maua mai i le fautuaga a le aposetolo o Paulo i Kerisiano Eperu?

⁹ Seʻi mafaufau i faigatā na oo i na Kerisiano, ina ua tuua le tele o mea ae amata se olaga fou. Na manaʻomia ona latou faalagolago iā Ieova, e na te tausia o latou manaʻoga faaletino ma na latou maua le fesoasoani. Na avatu e Paulo i Kerisiano Eperu se fautuaga aogā, a o toe lima tausaga siʻomia e ʻautau a Roma Ierusalema: “Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou. Auā na fetalai o ia: ʻOu te lē tuua lava oe, ma ou te lē tuulafoaʻia lava oe.’ Ia tatou lototetele ma faapea atu: ʻO Ieova o loʻu fesoasoani ia; ou te lē fefe lava. O le ā la se mea e mafai ona faia e tagata iā te aʻu?’” (Epe. 13:5, 6) E mautinoa o i latou na faatatauina le fautuaga a Paulo a o leʻi osofaʻi atu le ʻautau a Roma, na faigofie ona faamasani i se olaga faafaigofie i lo latou siʻomaga fou. Na latou mautinoa e tausia e Ieova o latou manaʻoga faaletino. Ua faamautinoa mai e upu a Paulo, e mafai foʻi ona iā i tatou lenā mautinoa.

“IA TATOU LOTOMALILIE I NEI MEA”

10. O le ā le lesona ua faailoa mai e Paulo iā i tatou?

¹⁰ Na avatu foʻi e Paulo se fautuaga talitutusa iā Timoteo, ma e faatatau foʻi iā i tatou. Na ia faapea mai: “O lea, afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.” (1 Timo. 6:8) Po o lona uiga la e lē mafai ona e fiafia i se meaʻai manaia, nofo i se fale lelei pe faatau ni ofu fou mai i lea taimi i lea taimi? E lē o le uiga lenā o le manatu na taʻua e Paulo. Na faapea mai Paulo, e tatau ona tatou lotomalilie i so o se meafaitino ua tatou maua. (Fili. 4:12) O le lesona lenā na aʻoaʻoina e Paulo. O lea la o le mea e sili ona tāua iā i tatou, o lo tatou faiā ma le Atua ae lē o meafaitino ua tatou maua.​—Sapa. 3:17, 18.

11. O le ā le lesona e faatatau i le lotomalie e tatou te aʻoaʻoina mai i upu a Mose i tagata Isaraelu?

¹¹ Atonu e lē tutusa la tatou vaai ma le silasila a Ieova i mea e tatou te manaʻomia. Seʻi manatu i le mea na taʻu atu e Mose iā Isaraelu, ina ua mavae le 40 tausaga o savavali i le toafa: “Ua faamanuia Ieova lou Atua iā te oe i mea uma ua e faia i ou lima. Ua ia silafia lelei lau savaliga i lenei toafa telē. Na iā te oe Ieova lou Atua i tausaga e fā sefulu. E leai se mea na e mativa ai.” (Teu. 2:7) I na tausaga e 40, na saunia ai e Ieova le manai e aai ai tagata Isaraelu. E leʻi pala ofu na latou oofu ai ina ua tuua Aikupito. (Teu. 8:3, 4) Na manatu nisi e lē lava mea na latou mauaina, ae na faamanatu atu e Mose iā Isaraelu ua latou maua mea uma na latou manaʻomia. E faafiafiaina Ieova pe a tatou lotomalilie i mea ua tatou maua, ma talisapaia so o se mea ua ia saunia ma vaai i ai o se faamanuiaga, ma faafetai iā te ia mo le sauniaina o na mea.

IA MAUTINOA E TAUSIA OE E IEOVA

12. E faapefea ona tatou iloa na maufaatuatuaina e Tavita Ieova, ae lē o ia lava?

¹² Na iloa e Tavita e faamaoni ma e matuā manatu mamafa Ieova iā i latou e alolofa iā te ia. E ui ina lamatia lona ola i le taimi na ia fatuina ai le Salamo e 34, ae ona o le faatuatua o Tavita na ia iloa ai le “agelu a Ieova” o loo “siʻosiʻomia” o ia. (Sala. 34:7) Atonu na faatusatusa e Tavita le agelu a Ieova i se fitafita o loo faia se leoleoga, e mataala i taimi uma ina neʻi osofaʻi ane le fili. E ui o Tavita o se tagata tau malosi ma na folafola atu e Ieova o le a avea o ia ma Tupu, ae e leʻi faalagolago ai Tavita i lona tomai i le faaaogāina o le maatā po o le pelu e faatoʻilalo ai ona fili. (1 Samu. 16:13; 24:12) Na maufaatuatuaina e Tavita le Atua, ma na ia mautinoa e mafai e le agelu a Ieova ona ʻlaveaʻiina i latou e matataʻu iā te Ia.’ E tatou te lē faatalitalia e puipuia faavavega e Ieova i tatou i aso nei. Ae e tatou te iloa, e lē mafai ona mafatia e faavavau se tagata e maufaatuatuaina Ieova.

13. Pe a osofaʻia i tatou e Koku o Makoku, aiseā e foliga atu ai e leai so tatou puipuiga, ma aiseā e tatou te mautinoa ai o le a puipuia i tatou? (Tagaʻi i le ata i le faavaa.)

¹³ Ua toeitiiti ona tofotofoina lea o lo tatou maufaatuatuaina o le puipuiga a Ieova iā i tatou. O le a lamatia o tatou ola pe a osofaʻia e Koku o Makoku o se tuufaatasiga o malo, tagata o le Atua. E tatau ona tatou mautinoa e mafai, ma o le a laveaʻiina e Ieova i tatou. O le a vaai malo iā i tatou e pei o ni mamoe e leai se mea e puipui ai, ma e leai foʻi se isi e puipuia i latou. (Eseki. 38:10-12) E leai ni a tatou auupega, e leʻi toleniina foʻi i tatou i ni taua ma o le a manatu malo e faigofie ona latou osofaʻia i tatou. E lē mafai ona iloa e malo mea e tatou te iloa i o tatou mata o le faatuatua, le anoanoaʻi o agelu e siʻosiʻomia tagata o le Atua ma sauni e puipuia i tatou. Aiseā? Talu ai e latou te lē faatuatua i le Atua. O le a matuā faateʻia i latou, pe a latou vaaia o le a tau ʻautau faalelagi mo i tatou!​—Faaa. 19:11, 14, 15.

IA SAUNIUNI NEI LOA MO MEA O LE A TUTUPU I LE LUMANAʻI

14. O le ā e tatau ona tatou faia i le taimi lenei, ina ia sauniuni ai mo mea o le a tutupu i le lumanaʻi?

¹⁴ O le ā e tatou te faia i le taimi lenei ina ia sauniuni ai mo mea o le a tutupu i le lumanaʻi? Muamua, e tatau ona iā i tatou se vaaiga saʻo e faatatau i meafaitino, e iai le taimi o le a tatou tuua ai na mea. E tatau ona tatou lotomalilie i mea ua tatou maua, ma e tatau foʻi ona tatou maua le fiafia sili i le iai o se faiā lelei ma Ieova. O lo tatou iloa lelei o le Atua, o le faateleina foʻi lenā o lo tatou mautinoa i lana puipuiga iā i tatou, pe a osofaʻi mai Koku o Makoku.

15. O ā mea na tutupu iā Tavita a o talavou, na ia mautinoa ai e lē mafai ona tuulafoaʻia o ia e Ieova?

¹⁵ Seʻi iloilo se isi mea na fesoasoani iā Tavita, ma e mafai foʻi ona fesoasoani e sauniunia ai i tatou pe a feagai ma luʻi. Na faapea mai Tavita: ʻIa outou tofotofo ma iloa ai e lelei Ieova; e fiafia foʻi le tagata e sulufaʻi atu iā te ia.’ (Sala. 34:8) Ua faamatala mai i na upu le māfuaaga na iloa ai e Tavita, e mafai ona ia faalagolago atu i le fesoasoani a Ieova. E tele taimi na faalagolago ai Tavita iā Ieova, ma e leʻi tuulafoaʻiina o ia e lona Atua. A o talavou Tavita na ia fesagaʻia ai le sauʻai Filisitia o Koliata. Na faapea atu o ia i lenā tagata tau tinoese: “O le asō e tuuina mai ai oe e Ieova i loʻu lima.” (1 Samu. 17:46) Mulimuli ane, na auauna ai Tavita i le tupu o Saulo lea na taumafai e fasioti o ia i le tele o taimi. Ae na “faatasi Ieova ma Tavita.” (1 Samu. 18:12) Talu ai na tofo Tavita i le fesoasoani a Ieova i le taimi ua teʻa, o lea na ia mautinoa ai e fesoasoani foʻi Ieova iā te ia e feagai ma faafitauli i lenā taimi.

16. O ā auala e tatou te ʻtofo’ ai i le lelei o Ieova?

¹⁶ O le tele lava e tatou te faalagolago ai i le taʻitaʻiga a Ieova i le taimi lenei, o le tele foʻi lenā o lo tatou mautinoa e mafai ona laveaʻiina i tatou e Ieova i le lumanaʻi. E manaʻomia le faatuatua ma le lotomalie e faalagolago ai iā Ieova, ina ia talosaga atu ai i pule o galuega mo se aso mālōlō e auai ai i se fonotaga po se tauaofiaga. Po o le talosaga atu foʻi e toe fetuunaʻi taimi faigaluega, ina ia mafai ai ona auai i sauniga pe faateleina ai foʻi se sao i le galuega talaʻi. Ae faapefea pe a teena e pule o galuega a tatou talosaga pe tuli foʻi i tatou ma le galuega? Pe e te faatuatuaina Ieova e lē mafai ona ia tuulafoaʻiina i tatou, ma o le a ia saunia pea mea e tatou te manaʻomia moni? (Epe. 13:5) O le toʻatele o i latou o loo auauna faataimi atoa, e mafai ona faamatalaina mai mea na tutupu iā i latou, e faailoa mai ai le auala na fesoasoani ai Ieova iā i latou, ina ua latou matuā manaʻomia o ia. E faamaoni Ieova.

17. O le ā le mau o le tausaga mo le 2022, ma aiseā e talafeagai lelei ai?

¹⁷ E leai se māfuaaga e tatou te fefefe ai i mea o le a tutupu i le lumanaʻi, ona o loo faatasi Ieova ma i tatou. E lē mafai ona tuulafoaʻiina i tatou e lo tatou Atua, pe a tatou faamuamuaina le faia o lona finagalo i o tatou olaga. Ina ia sauniunia i tatou mo mea mataʻutia o le a tutupu i le lumanaʻi, ma maufaatuatuaina e lē mafai ona tuulafoaʻiina i tatou e Ieova, ua filifilia ai e le Vaega Pule le Salamo 34:10 e avea ma mau o le tausaga 2022: “O i latou e saʻili iā Ieova, e leai se mea lelei e matitiva ai i latou.”