Fesili Mai le ʻAufaitau
O ai o le a toe faatutūina i le lalolagi, ma o le ā le ituaiga toetū o le a latou mauaina?
Mātau tali o nei fesili i le Tusi Paia.
I le Galuega 24:15 o loo taʻua ai o le a “toetutū mai tagata amiotonu ma tagata amiolētonu.” O ē amiotonu o i latou ia na faaalia le usiusitaʻi i le Atua, a o leʻi maliliu. O lea, ua tusia o latou igoa i le tusi o le ola. (Mala. 3:16) O ē e amiolētonu e aofia ai i latou na maliliu, ae e leʻi maua se avanoa e aʻoaʻo ai e faatatau iā Ieova. O lea la, e lē o tusia o latou igoa i le tusi o le ola.
O loo faasino atu le Ioane 5:28, 29 i ni vaega se lua, lea o loo taʻua foʻi i le Galuega 24:15. Na fetalai Iesu: “O ē na faia mea lelei e toetutū i le ola, a o ē na faia mea leaga e toetutū i le faamasinoga.” O ē amiotonu, o i latou ia na faia mea lelei a o leʻi maliliu. O le a latou maua le toetutū i le ola, ona o loo tusia pea o latou igoa i le tusi o le ola. Peitaʻi o ē amiolētonu, o i latou ia na faia mea leaga a o leʻi maliliu, ma e latou te maua le toetutū i le faamasinoga. E leʻi oo i le taimi e tusia ai o latou igoa i le tusi o le ola, ma e iai le taimi o le a faamasinoina pe mātaʻitūina ai i latou. I lenā taimi, o le a latou maua le avanoa e aʻoaʻoina ai e faatatau iā Ieova, ma tusia o latou igoa i le tusi o le ola.
O loo taʻua i le Faaaliga 20:12, 13 e tatau i ē uma o le a faatutūina mai ona usitaʻia ʻmea ua tusia i tusi tāʻai,’ po o tulafono fou lea o le a faaaogāina i le lalolagi fou. O i latou e lē usitaʻia na tulafono, o le a faaumatia.—Isa. 65:20.
Ua faamatalaina i le Tanielu 12:2 o nisi o i latou o loo momoe i le oti, o le a feala “i le ola e faavavau a o isi i le faalumaina ma le inosia e faavavau.” O loo uiga atu le fuaiupu lenei i le taunuuga o lo latou toetutū, a lē o “le ola e faavavau” po o “le inosia e faavavau.” O lea i le iʻuga o le 1,000 tausaga, o le a maua e nisi le ola e faavavau a o nisi o le a faaumatia e faavavau.—Faaa. 20:15; 21:3, 4.
Mātau mai le faataʻitaʻiga lenei. E mafai ona faatusaina nei vaega e lua, i tagata ese e fia aumau i se isi atunuu. O ē amiotonu, e pei i latou o ni ē ua maua ni visa faigaluega po o ni visa nofo mau, ma maua ai nisi o faamanuiaga ma sina saʻolotoga. I se faaeseesega, o ē amiolētonu e pei i latou o ni tagata ese ua maua ni visa nofo lē tumau, po o ni visa mo tagata tafafao. E tatau i nei tagata ese ona faamaoni, ina ia nonofo ai pea i le atunuu fou. I se uiga talitutusa, e tatau i ē amiolētonu o le a faatutūina mai ona usitaʻia tulafono a Ieova, ma ia faamaonia atu o i latou o ni ē amiotonu ina ia tumau ai pea i le Parataiso. Po o le ā lava le visa e maua e tagata ese e ulufale ai i isi atunuu, ae e iai lava nisi e ono maua le sitiseni a o isi e ono toe faafoʻi i lo latou atunuu. E fua lenā iʻuga i o latou uiga ma amioga faaalia i le atunuu fou. E faapena foʻi i latou uma e toe faatutūina mai, e fua lo latou iʻuga i lo latou faamaoni ma amioga faaalia i le lalolagi fou.
E lē gata o Ieova o se Atua e alofa mutimutivale, ae o ia foʻi o se Atua e faamasinotonu. (Teu. 32:4; Sala. 33:5) O lona alofa, o le a ia faatutūina mai ai ē e amiotonu ma ē e amiolētonu. I le taimi e tasi, e tausisi pea o ia i ana tapulaa maualuluga tauamio. E na o i latou e alolofa iā te ia ma tausia ana tapulaa, o le a mafai ona ola e faavavau i le lalolagi fou.