Faafitauli Tau i le Mafaufau ua Aafia ai le Lalolagi Aoao

O faamatalaga na a nisi o loo tauivi ma faafitauli o le mafaufau. Po o e aafia, po o aafia foʻi sē e pele iā te oe i na faalogona?

Ia e mautinoa, e lē na o oe o loo aafia ai. E toʻatele tagata i aso nei ua aafia i faafitauli o le mafaufau, pe aafia ai foʻi ē e pele iā i latou.

O le mea moni, ua tatou ola nei i “aso e sili ona faigatā,” lea ua tatou feagai ai ma le tele o mafatiaga. (2 Timoteo 3:1) Ua iloa mai i se suʻesuʻega na faia, i le lalolagi aoao e pe tusa o le toʻatasi mai i le toʻavalu tagata, o loo tauivi ma faafitauli o le mafaufau. I le 2020, e pe ā ma le 26 pasene na sili atu ai tagata na aafia i le popole nai lo o le 2019, ona o le faamaʻi o le KOVITI 19. I le tausaga lava lenā, e pe ā ma le 28 pasene na sili atu ai tagata na aafia i le lotomafatia, nai lo o le 2019.

E ui e tāua le iloa o le toʻatele o tagata ua aafia i le popole ma le lotomafatia, ae e sili atu ona tāua le iloa o le auala e te maua ai se soifua mālōlōina, faapea ē e pele iā te oe.

O le ā e uiga i ai le soifua mālōlōina o le mafaufau?

O le soifua mālōlōina o le mafaufau, e uiga atu i le lelei o faalogona, ma mafai ona mafaufau lelei. E mafai ona e taulimaina popolega masani o le olaga, galue mamafa, ma maua le faamalieina i le olaga.

O faafitauli o le mafaufau . . .

• E LĒ UIGA ATU i vaivaiga o se tasi.

• O SE aafiaga i le mafaufau lea e māfua ai ona matuā popole, ma aafia ai le auala e mafaufau ai se tasi, o ona faalogona, ma ona uiga.

• E masani ona faigatā ona feutagaʻi ai ma isi, ma faia mea masani o le olaga.

• E mafai ona aafia ai so o se tasi, e tusa lava po o le ā le matua, aganuu, atunuu, tapuaʻiga, aʻoaʻoga, po o tulaga tau tamaoaiga.

Mauaina o le fesoasoani mo faafitauli o le mafaufau

Pe afai o loo e aafia, po o aafia foʻi se tasi e pele iā te oe i ni suiga tetele i uiga, lē lelei le moe po o le taumafa, umi ona mafatia, popole po o le faanoanoa, e te ono manaʻomia la se fesoasoani maufaatuatuaina ina ia iloa ai māfuaaga o na suiga, ma le auala e foʻia ai. Ae o fea e maua ai lenā fesoasoani?

Na fetalai Iesu Keriso o le tagata e sili ona atamai na soifua i le lalolagi: “E lē manaʻomia e tagata malolosi se fomaʻi, ae na o ē mamaʻi.” (Mataio 9:12) O i latou o loo tauivi ma faafitauli tau i le soifua mālōlōina o le mafaufau, ua mafai ona faaitiitia aafiaga iā i latou ma maua ni olaga sologa lelei, ona o le fesoasoani ua latou maua ma togafitiga faafomaʻi talafeagai. O se mea atamai la mo i latou ua aafia le vave saʻilia o togafitiga, pe afai ua faaumiumi po ua tugā foʻi āuga.a

E ui o le Tusi Paia e lē o se tusi faafomaʻi, ae o loo iai manatu aogā mo faafitauli o le mafaufau. E faalaeiauina oe e iloilo mataupu o loo sosoo mai, lea o le a talanoaina ai auala e fesoasoani ai le Tusi Paia i le taulimaina o faafitauli o le mafaufau.