E Faapefea Ona Faamalosia lo Tatou Faatuatua i le Folafolaga a Ieova e Faatatau i le Lalolagi Fou?

1-2. O le ā e manaʻomia ona tatou faia a o faatalitali mo le lalolagi fou?

E TAUTELE iā i tatou le folafolaga a Ieova, ina ia suia lenei faiga o mea i se lalolagi fou lea e mau ai tagata amiotonu. (2 Pete. 3:13) E ui e tatou te lē iloa po o afea o le a faataunuuina ai lenā folafolaga, ae ua tatou iloa mai i mea o loo tutupu i le lalolagi, e lē o toe umi ona faataunuuina lea.​—Mata. 24:32-34, 36; Galu. 1:7.

² Po o le ā lava le umi talu ona tatou iai i le upu moni, ae e manaʻomia e i tatou uma ona faamalosia lo tatou faatuatua i lenā folafolaga. Aiseā? Auā po o le ā lava le malosi o lo tatou faatuatua, ae e mafai lava ona faavaivaia. O le mea moni na faamatalaina e le aposetolo o Paulo le leai o se faatuatua, i “le agasala o loo faigofie ona faalavelave mai iā i tatou.” (Epe. 12:1) Ina ia aua neʻi faavaivaia lo tatou faatuatua, e manaʻomia ona tatou iloilo e lē aunoa faamaoniga e iloa ai, e lē o toe umi ona iai lea o le lalolagi fou.​—Epe. 11:1.

3. O ā manatu o le a tatou talanoaina i lenei mataupu?

³ O le a talanoaina i lenei mataupu, auala e tolu e mafai ona faamalosia ai lo tatou faatuatua i le folafolaga a Ieova e faatatau i le lalolagi fou: (1) e ala i le manatunatu loloto i le togiola, (2) e ala i le manatunatu i le mana o Ieova, ma le (3) e ala i le faapisi o lou olaga i gaoioiga faaleagaga. O le a tatou talanoaina foʻi pe faapefea i le feʻau a Ieova iā Sapakuka, ona faamalosia ai lo tatou faatuatua i aso nei. Ae seʻi o tatou iloiloina muamua nisi o mea atonu o loo tatou fesagaʻia i le taimi lenei, lea e manaʻomia ai ona faamalosia lo tatou faatuatua i le folafolaga e faatatau i le lalolagi fou.

O TULAGA E MANAʻOMIA AI LE FAATUATUA MALOSI

4. O ā filifiliga e manaʻomia ai le faatuatua malosi?

⁴ E tatou te faia i aso taʻitasi filifiliga e manaʻomia ai le faatuatua malosi. O se faataʻitaʻiga, e tatou te faia filifiliga e faatatau i aumea, faafiafiaga, aʻoaʻoga, faaipoipoga, fanau, ma galuega totogi. E lelei pe a tatou fesili ifo: ʻPo o atagia atu i aʻu filifiliga o loo oʻu mautinoa e lē tumau lenei faiga o mea, ma ua toeitiiti ona suia lea i le lalolagi fou a le Atua? Po o atagia atu foʻi i aʻu filifiliga o loo taaʻina aʻu i manatu o tagata o ē tau ina ola mo le asō, e peiseaʻī o le oti o le iʻuga lea o mea uma?’ (Mata. 6:19, 20; Luka 12:16-21) E tatou te faia filifiliga e sili ona lelei, pe a faamalosia lo tatou faatuatua ua matuā latalata mai lava le lalolagi fou.

5-6. Aiseā e tatou te manaʻomia ai le faatuatua malosi i taimi o puapuaga? Ia faataʻitaʻi.

⁵ E tatou te fesagaʻia foʻi luʻi lea e manaʻomia ai le faatuatua malosi. Atonu e tatou te feagai ma sauāga, se maʻi tugā, po o isi mea e faavaivaia ai i tatou. I le taimi muamua, atonu e tatou te maumauaʻi e onosaia na luʻi. Ae pe afai e faaauau mo se taimi umi na luʻi e pei ona masani ai, e tatou te manaʻomia le faatuatua malosi ina ia tumau ai ma faaauau ona auauna iā Ieova ma le olioli.​—Roma 12:12; 1 Pete. 1:6, 7.

⁶ Pe a tatou feagai ma se luʻi, atonu e tatou te manatu ai e lē taitai oo mai le lalolagi fou a Ieova. Po o lona uiga la ua vaivai lo tatou faatuatua? E leai. Seʻi manatu i le faataʻitaʻiga lenei: Seʻi faapea o loo tatou nonofo i se nofoaga ua maʻatiʻati ai le tau mālūlū, atonu e tatou te manatu e lē taitai oo mai le tau māfanafana. Peitaʻi, e oo mai lava le tau māfanafana. I se tulaga talitutusa, pe a tatou lagona le matuā lotovaivai, e tatou te ono manatu ai e lē taitai oo mai le lalolagi fou. Ae pe a malosi lo tatou faatuatua, e tatou te mautinoa o le a faataunuuina folafolaga a le Atua. (Sala. 94:3, 14, 15; Epe. 6:17-19) O lenā mautinoa, e tatou te faamuamua ai pea i o tatou olaga le tapuaʻiga iā Ieova.

7. O le ā le uiga e tatau ona tatou faaeteete i ai?

⁷ O le isi vala e tatou te manaʻomia ai le faatuatua malosi, o le galuega talaʻi. E manatu le toʻatele o tagata e tatou te talaʻi i ai, e lē moni le “tala lelei” e faatatau i le lalolagi fou a le Atua. (Mata. 24:14; Eseki. 33:32) E tatou te lē mananaʻo e taaʻina i tatou i o latou uiga masalosalo. Ina ia aua neʻi tupu lenā mea, e manaʻomia ona faamalosia pea lo tatou faatuatua. Seʻi o tatou iloiloina ni auala se tolu e faia ai faapea.

MANATUNATU LOLOTO I LE TOGIOLA

8-9. E faapefea i le manatunatu loloto i le togiola ona faamalosia ai lo tatou faatuatua?

⁸ O le auala muamua e faamalosia ai lo tatou faatuatua, o le manatunatu loloto i le togiola. O le togiola o se faamautinoaga lea o le a taunuu moni lava folafolaga a le Atua. Pe a tatou manatunatu loloto i le māfuaaga na saunia ai le togiola ma mea e aofia ai, e faamalosia ai lo tatou faatuatua o le a taunuu moni lava le folafolaga a le Atua, o le ola e faavavau i se lalolagi e sili ona lelei. Aiseā e tatou te mautinoa ai i lenā mea?

⁹ O ā la mea na aofia ai i le togiola? Na auina mai e Ieova i le lalolagi lona Alo pele e toʻatasi o lē e sili ona vavalalata iā te ia, ina ia fanau mai o se tagata lelei atoatoa. A o iai Iesu i le lalolagi, na ia onosaia so o se faigatā ma na oo iā te ia mafatiaga ma maliu tigā ai. Seʻi mafaufau i le telē o le tau na totogi e Ieova! E leʻi foaʻi mai e lo tatou Atua alofa lona Alo ina ia mafatia ma maliu, e tau lava ina ia tatou maua ai se olaga e sili ona lelei ae e lē tumau. (Ioa. 3:16; 1 Pete. 1:18, 19) O le telē o le tau na totogi e Ieova ua ia faamautinoa mai ai, e mafai ona tatou ola e faavavau i le lalolagi fou.

MANATUNATU I LE MANA O IEOVA

10. E tusa ai ma le Efeso 3:20, o le ā e mafai ona faia e Ieova?

¹⁰ O le auala lona lua e faamalosia ai lo tatou faatuatua, o le manatunatu i le mana o Ieova. E iā te ia le mana e faataunuu ai ana folafolaga uma. E manatu le toʻatele o tagata i aso nei, o le ola e faavavau i se lalolagi fou e lē o se mea e mafai ona tupu. Peitaʻi, o mea uma e folafola mai e Ieova, e lē mafai ona faataunuu e tagata. Aiseā? Auā o Ia o le Atua o Lē e ona le malosi uma lava. (Iopu 42:2; Mare. 10:27) O lea, e lē faateʻia ai i tatou pe a ia folafolaina mai ni mea ofoofogia.​—Faitau le Efeso 3:20.

11. Aumai se faataʻitaʻiga o se folafolaga mataʻina a le Atua. (Tagaʻi i le pusa “Nisi o Folafolaga Mataʻina ua Faataunuuina.”)

¹¹ Seʻi o tatou iloiloina nisi o mea e foliga mai e lē mafai ona tutupu, lea na folafola e Ieova i ona tagata i le taimi ua teʻa. Na ia faamautinoa atu iā Aperaamo ma Sara, o le a la fanauina se tama tama e ui ua la matutua. (Kene. 17:15-17) Na ia fetalai atu foʻi iā Aperaamo, o le a tuuina atu i ē e tupuga mai iā te ia le laueleele o Kanana. Ae atonu na foliga mai e lē mafai ona taunuu lenā folafolaga, ona o le tele o tausaga ia na faapologaina ai i Aikupito le nuu o Isaraelu, o i latou ia na tupuga mai iā Aperaamo. Peitaʻi na taunuu moni lava lenā folafolaga. Mulimuli ane, na faailoa mai e Ieova o le a fanauina e Elisapeta se tama e ui ua matua o ia. Na ia fetalai atu foʻi iā Maria o se tamaʻitaʻi taupou, o le a ia fanauina lona Atalii. O lenā mea ua faataunuuina ai se folafolaga na faia e Ieova i le faatoʻaga o Etena, i le faitau afe o tausaga na muamua atu.​—Kene. 3:15.

12. O le ā ua faamautinoa mai i le Iosua 23:14 ma le Isaia 55:10, 11 e faatatau i le mana o Ieova?

¹² Pe a tatou manatunatu i folafolaga uma na faia e Ieova ma le auala ua ia faataunuuina ai, ua faamalosia ai lo tatou faatuatua i le tele o lona mana e faia ai faapea. O le a faamalosia ai foʻi lo tatou faatuatua i lana folafolaga e faatatau i le lalolagi fou. (Faitau le Iosua 23:14; Isaia 55:10, 11.) O lenā mea ua lava saunia ai i tatou e fesoasoani i isi ina ia iloa o le folafolaga e faatatau i le lalolagi fou, e lē na o se miti ae o le a taunuu moni lava. O Ieova lava ia na fetalai e faatatau i le lagi fou ma le lalolagi fou: “O upu nei e faamaoni ma moni.”​—Faaa. 21:1, 5.

FAAPISI LOU OLAGA I GAOIOIGA FAALEAGAGA

13. E faapefea i sauniga a le faapotopotoga ona faamalosia ai lo tatou faatuatua? Ia faamatala.

¹³ O le auala lona tolu e faamalosia ai lo tatou faatuatua, o le faapisi o o tatou olaga i gaoioiga faaleagaga. O se faataʻitaʻiga, o aogā e tatou te maua mai i sauniga a le faapotopotoga. Ua faapea mai Anna, o sē ua tele tausaga o auai i vala eseese o le auaunaga faataimi atoa: “Ua fesoasoani sauniga e matuā mausalī ai loʻu faatuatua. E tusa lava pe lē lelei le tomai tau aʻoaʻo atu a se failauga pe faailoa mai foʻi se manatu fou, ae e masani lava ona ou aʻoaʻoina mai ai se manatu ou te malamalama atili ai i se upu moni mai i le Tusi Paia. O lenā mea e faamalosia ai loʻu faatuatua.”b E mautinoa e tatou te talisapaia foʻi tali faalaeiau a uso ma tuafāfine i sauniga.​—Roma 1:11, 12; 10:17.

14. E faapefea i le faiva i le fanua ona faamalosia ai lo tatou faatuatua?

¹⁴ E faamalosia foʻi lo tatou faatuatua pe a faia so tatou sao i le faiva i le fanua. (Epe. 10:23) Ua faapea mai Barbara ua silia ma le 70 tausaga o auauna iā Ieova: “O taimi uma lava ou te auai ai i le galuega talaʻi, e faamalosia ai loʻu faatuatua. O le tele lava ou te talanoa ai i isi e faatatau i folafolaga matagofie a Ieova, o le atili faamalosia foʻi lenā o loʻu faatuatua.”

15. E faapefea i suʻesuʻega a le tagata lava ia ona faamalosia ai lona faatuatua? (Tagaʻi foʻi i ata.)

¹⁵ Ia mātau le isi gaoioiga faaleagaga e faamalosia ai lo tatou faatuatua, o suʻesuʻega a le tagata lava ia. Ua iloa e Susan le aogā o le faatulaga o taimi e fai ai ana lava suʻesuʻega. Ua ia faapea mai: “I Aso Sa ou te suʻesuʻeina ai le Olomatamata mo le isi vaiaso. I Aso Gafua ma Aso Lua, ou te sauniuni ai mo le sauniga amata o le vaiaso. Ae i isi aso o loo totoe o le vaiaso, e fai ai aʻu lava suʻesuʻega.” O le tausisia e Susan o lana faasologa masani, ua faamalosia ai pea lona faatuatua. Ua iloa e Irene o sē ua tele tausaga o galue i le ofisa ulu, o le suʻesuʻeina o valoaga o le Tusi Paia ua faamalosia ai lona faatuatua. Ua ia faapea mai: “Ou te maofa ona e oo lava i vala lāiti o valoaga a Ieova, e faataunuuina lava.”c

“E OO MAI LAVA”

16. Aiseā e aogā ai iā i tatou i aso nei le faamautinoaga a Ieova iā Sapakuka? (Eperu 10:36, 37)

¹⁶ Ua leva ona faatalitali nisi o auauna a Ieova mo le iʻuga o lenei faiga o mea. E manatu nisi o tagata atonu ua umi tele o faatalitali le taimi e faataunuu ai le folafolaga a le Atua. Peitaʻi, e silafia e Ieova faalogona o ana auauna, auā na ia faamautinoa atu i le perofeta o Sapakuka: “Ua tuu le faaaliga mo ona aso atofaina, ma o loo faanatinati atu pea seʻia oo i lona iʻuga, ma e lē tala pepelo lava. E tusa pe e tuai mai, ae ia faatalitali pea i ai! Auā e oo mai lava. E lē faatuai mai!” (Sapa. 2:3) Pe e na o Sapakuka na aogā i ai lenā faamautinoaga, pe e aogā foʻi na upu iā i tatou i aso nei? Na faagaeeina le aposetolo o Paulo ina ia tusia na upu, ona e aogā mo Kerisiano o loo faatalitali ma le naunau i le lalolagi fou. (Faitau le Eperu 10:36, 37.) Ioe, e mafai ona tatou mautinoa e tusa lava pe tuai ona faataunuu le folafolaga a Ieova e laveaʻiina i tatou, ae “e oo mai lava. E lē faatuai mai!”

17. Na faapefea ona faatatau e se tuafafine le fautuaga na avatu e Ieova iā Sapakuka?

¹⁷ E toʻatele auauna a Ieova ua latou faatatauina lana fautuaga “ia faatalitali pea i ai,” e tusa lava po o le ā le umi. O se faataʻitaʻiga, ua faapea mai Louise o lē na amata lana auaunaga iā Ieova i le 1939: “I lenā taimi, na ou manatu o le a oo mai Amaketo a o leʻi uma laʻu aʻoga i le kolisi. Ae e lē o le mea lenā na tupu. A o faagasolo tausaga, na fesoasoani iā te aʻu le faitau i tala o loo i le Tusi Paia e faatatau iā i latou na ʻfaatalitali ma le onosaʻi’ e pei o Noa, Aperaamo, Iosefa ma isi, o ē na umi se taimi na faatalitali ai a o leʻi mauaina le taui na folafola mai e Ieova. O le talitonu pea o le a faataunuuina folafolaga, ua fesoasoani iā te aʻu ma isi ina ia mautinoa ai e lē o toe umi ona oo mai lea o le lalolagi fou.” O le talitonuga foʻi lenā o le toʻatele o isi ua tele tausaga o auauna iā Ieova.

18. E faapefea i le mātauina o le foafoaga ona faamalosia ai lo tatou faatuatua i le lalolagi fou?

¹⁸ O le mea moni, e leʻi oo mai le lalolagi fou. Peitaʻi o nisi nei o mea moni o loo iai: o fetu, o laau, o manu, ma tagata. E leai lava se tasi e fesiligia pe e moni na mea, e ui na iai le taimi e leʻi iai na mea. E na o le pau le māfuaaga ua iai na mea, ona na foafoaina e Ieova. (Kene. 1:1, 26, 27) Ua folafola mai foʻi e lo tatou Atua o le a ia faia se lalolagi fou, ma o le a ia faataunuuina lenā folafolaga. I le lalolagi fou, o le a ola e faavavau tagata ma olioli i se olaga soifua mālōlōina lelei atoatoa. I le taimi atofaina a le Atua, o le a iai moni lava le lalolagi fou e pei ona iai moni o le vateatea o loo siʻomia ai i tatou.​—Isa. 65:17; Faaa. 21:3, 4.

19. E faapefea ona e faamalosia lou faatuatua?

¹⁹ I le taimi lenei, ia faaaogā so o se avanoa e faamalosia ai lou faatuatua. Ia faalolotoina lou talisapaia o le togiola. Ia manatunatu i le mana o Ieova. Ia faapisi lou olaga i gaoioiga faaleagaga. O le faia faapea, o le a e aofia ai “iā i latou o ē ua maua le folafolaga ona o lo latou faatuatua ma le onosaʻi.”​—Epe. 6:11, 12; Roma 5:5.