Saʻo ma le Sesē: Faavae o Filifiliga a le Toʻatele

E ioe le toʻatele, e iai gaoioiga e matuā iloa lava le saʻo po o le sesē. O se faataʻitaʻiga, e taʻusalaina e le toʻatele gaoioiga e pei o le fasioti tagata, toso faamalosi, ma faigaaiga faamalosi i tamaiti. Ae e latou te fiafia i le agalelei, le tigā alofa, ma le faamasinotonu. Peitaʻi, pe a oo mai i vala o le olaga e pei o feusuaʻiga, le tausia o fanau, ma le faaalia o le faamaoni, e manatu le toʻatele e leai se filifiliga e saʻo pe sesē. E latou te manatu e talafeagai so o se filifiliga. E masani ona faavae filifiliga a tagata i o latou manatu po o manatu o isi e faatatau i se mataupu. Ae pe e atamai le faia faapea?

FILIFILIGA E FAAVAE I O TATOU MANATU

E masani ona fua a tatou filifiliga i o tatou lotofuatiaifo, po o mea e tatou te manatu e saʻo pe sesē. (Roma 2:​14, 15) E oo lava i tamaiti e latou te iloa le sesē o se gaoioiga e faaituʻau, pe lagona foʻi le nofosala pe a faia se mea sesē. A o faagasolo taimi, e tatou te aʻoaʻoina le mea e saʻo ma le mea e sesē mai i tagata o tatou aiga, aumea, faiaʻoga, tagata o le tatou vaipanoa, tatou tapuaʻiga, ma le tatou aganuu. Pe a tatou faia se filifiliga, e faailoa mai e o tatou lotofuatiaifo po o ōgatusa la tatou filifiliga, ma mea ua tatou aʻoaʻoina e saʻo pe sesē.

O o tatou manatu ma faalogona i le mea e saʻo ma le mea e sesē, e uunaʻia ai i tatou e faaalia le tigā alofa, lotofaafetai, faamasinotonu, ma le alofa mutimutivale i isi. E mafai foʻi ona taofia ai i tatou mai i le faia o se gaoioiga e faatigā ai iā i latou e tatou te alolofa i ai, po o se gaoioiga foʻi e lagona ai le nofosala ma le faalumaina.

Pe e taulau i taimi uma filifiliga e faavae i o tatou manatu? A o talavou Garrick, na ia ola i se olaga lea na ia faamatalaina e faapea, “Na ou faia so o se mea ou te manaʻo ai.” Peitaʻi na ia iloa mulimuli ane, e lē iʻu lelei le faia o mea na manatu o ia e saʻo. Na iʻu atu ai lona olaga i le “faia o amioga lē mamā, faaaogāina o fualaau faasāina, onā, ma le sauā.”

FILIFILIGA E FAAVAE I MANATU O ISI

E ese mai i o tatou lava manatu, e masani foʻi ona taaʻina a tatou filifiliga i manatu o isi. O le faia faapea, e tatou te maua ai aogā mai i tomai ma mea na tutupu iā i latou. E faaaloalogia i tatou e o tatou aiga, uō, ma tagata o lo tatou vaipanoa, pe a tatou faia filifiliga e latou te manatu e saʻo.

Pe e taulau i taimi uma filifiliga e faavae i manatu o isi? A o talavou Priscila, na ia faia ai amioga na faia e le toʻatele o ana uō, ma ia lolo atu ai i le faia o feusuaʻiga lē mamā a o leʻi faaipoipo. Peitaʻi, e na te leʻi maua le fiafia i le faia o mea na manatu isi e saʻo. Na ia faapea mai: “Ou te leʻi maua le fiafia mai i le faia o amioga na faia e le toʻatele, ae pau le mea na iʻu i ai, o loʻu faia o filifiliga lē atamai ma lamatia ai.”

PE E IAI SE AUALA E SILI ATU E FAI AI FILIFILIGA?

E iai le aogā o tatou manatu ma manatu o isi, pe a filifili i le mea e saʻo ma le mea e sesē. Peitaʻi, e lē o taimi uma e iʻu lelei ai se filifiliga e faavae mai i na vala. O nisi taimi atonu e tatou te faatigā ai iā i tatou lava ma isi, ona o le lē mafaufau i iʻuga e oo i ai a tatou filifiliga. (Faataoto 14:12) E tusa foʻi pe tatou te mafaufau e saʻo o tatou manatu po o manatu o isi, ae e mafai a ona iʻu i ni iʻuga lē lelei, pe suia na manatu. E lē gata i lea, ua talia e le toʻatele nisi o amioga sa manatu i ai e sesē, ae teena amioga sa manatu i ai e lelei.

Pe e iai se auala e sili ona lelei, e fua i ai a tatou filifiliga o le mea e saʻo ma le mea e sesē? Pe e iai se tapulaa tauamio e mafai ona fua i ai a tatou filifiliga i le taimi lenei, ma tatou maua ai pea le fiafia e oo i le lumanaʻi?

E tatou te fiafia e iloa, e iai se puna maufaatuatuaina o taʻiala tauamio, lea e aogā mo tagata uma i so o se vaipanoa. O le a talanoaina i le mataupu o sosoo mai, po o fea e tatou te maua ai fautuaga ma taʻiala e sili ona maufaatuatuaina, e iloa ai le mea e saʻo ma le mea e sesē.