Faamagaloina Agasala ua Mavae

E mafai ona faamagaloina a tatou agasala i le taulaga togiola a Iesu, lea na totogiina e ala i lona toto. (Efe. 1:7) Peitaʻi ua faapea mai le Tusi Paia: “O le faapalepale o le Atua, na ia faamagaloina ai agasala ua mavae,” o lona uiga, a o leʻi saunia e Iesu le togiola. (Roma 3:25) Na faapefea ona faamagaloina e Ieova agasala a o leʻi saunia le togiola, ae i le taimi e tasi e tausisi pea i ana tapulaa amiotonu?

I le silafaga a Ieova, na aogā le togiola i le taimi lava na ia filifili ai e saunia se “fanau,” o lē o le a faasaoina i latou e faatuatua iā te ia. (Kene. 3:15; 22:18) Na mautinoa atoatoa le Atua, o le a lotomalie lona Alo e toʻatasi e saunia le togiola i Lana taimi atofaina. (Kala. 4:4; Epe. 10:​7-10) A o iai Iesu i le lalolagi, na iā te ia le pule e faamagalo ai agasala a o ia leʻi saunia le togiola. Sa mafai e Iesu ona faamagaloina agasala a i latou na faatuatua, auā na ia silafia o le taulaga lea o le a ia faia, o le a totogiina ai a latou agasala.—Mata. 9:​2-6.