Ia Faaauau Pea Ona Tatou Mataala i Faaosoosoga

1-2. (a) O le ā le lapataʻiga na avatu e Iesu i ona soo? (e) Aiseā na tuulafoaʻia ai e le ʻausoo Iesu? (Tagaʻi foʻi i ata.)

“UA NAUNAU i ai le loto, ae ua vaivai le tino.”a (Mata. 26:41e) Na manino mai i le fetalaiga a Iesu, na ia malamalama lelei i lo tatou tulaga lē lelei atoatoa. Peitaʻi, e iai foʻi ma le lapataʻiga: Ia faaeteete i le mautinoa naʻuā. A o leʻi faia le fetalaiga a Iesu, na muamua ona faamautinoa atu e ona soo iā te ia, e latou te lē tuua lava o ia. (Mata. 26:35) E ui na lelei le uunaʻiga na latou faia ai na faamatalaga, ae na lilo i o latou manatu, o le a vave mou atu lo latou faanaunauga e faia le mea saʻo. O lea, na lapataʻia ai e Iesu i latou: “Ia faaauau ona mataala ma tatalo e lē aunoa, ina ia aua neʻi outou lolo atu i faaosoosoga.”—Mata. 26:41a.

² O le mea e faanoanoa ai, e leʻi faaauau ona mataala soo o Iesu. I le taimi na puʻea ai Iesu, pe na faaosoosoina soo e sosola ese, pe na latou lototetele e nonofo pea ma ia? E aunoa ma lo latou iloaina, na latou faia le mea na latou taʻutino mai e lē tupu, o le tuulafoaʻia lea o Iesu.—Mata. 26:56.

3. (a) Ina ia faaauau pea ona tatou faamaoni iā Ieova, aiseā e tatau ai ona ʻalofia le mautinoa naʻuā? (e) O ā manatu o le a talanoaina i lenei mataupu?

³ Ia ʻalofia le mautinoa naʻuā. E mautinoa e tatou te maumauaʻi e aua le faia so o se mea e faatigā ai iā Ieova. Peitaʻi, o i tatou o ni tagata e lē lelei atoatoa, ma e faigofie ona tatou lolo atu i faaosoosoga. (Roma 5:12; 7:​21-23) E ono faafuaseʻi foʻi ona faaosoosoina i tatou e faia se mea sesē. Ina ia faaauau ona tatou faamaoni iā Ieova ma lona Alo, ia tatou mulimuli i le fautuaga a Iesu, ia mataala pea i faaosoosoga e faia le agasala. O le a fesoasoani lenei mataupu iā i tatou e faia faapea. Muamua, o le a tatou aʻoaʻoina po o ā tulaga e manaʻomia ona tatou mataala ai. Lua, o le a tatou talanoaina pe e faapefea ona tatou mataala i faaosoosoga. Tolu, o le a tatou tilofaʻia le auala e faaauau ai pea ona tatou mataala.

O Ā TULAGA E MANAʻOMIA ONA TATOU MATAALA AI?

4-5. Aiseā e tatau ai ona tatou mataala pea e tusa lava po o ni mea sesē lāiti?

⁴ E oo lava i mea sesē lāiti e mafai ona faavaivaia ai la tatou faiā ma Ieova. O na mea sesē e mafai ona taʻitaʻia atu ai i le faia o agasala matuiā.

⁵ E mautinoa o i tatou uma lava e feagai ma faaosoosoga e faia le agasala. O i tatou uma lava e iai vaivaiga, e pei o le faia o se agasala matuiā, faia o amioga lē mamā, po o le lolo atu i manatu o le lalolagi. O se faaaʻoaʻoga, atonu o loo tauivi se tasi ma faaosoosoga e faia amioga lē mamā taufeusuaʻiga. O le isi atonu e lologofie i le faia o amioga lē mamā, e pei o le taaloalo i totogasā po o le matamata i ata matagā taufeusuaʻiga. Ae atonu foʻi o loo taumafai malosi se tasi e manumalo mai i le fefe i tagata, o le fia tutoʻatasi, o le itaitagofie, po o isi faaosoosoga. E pei ona taʻua e Iakopo, “ua faaosoosoina tagata taʻitoʻatasi ona ua tosina ma maileia i ona lava tuʻinanau.”—Iako. 1:14.

6. O le ā se iloiloga faamaoni e manaʻomia ona tatou faia?

⁶ O le ā se tulaga e faigofie ona faaosoosoina ai oe? E lē atamai le manatu e faapea, e lē mafai ona tatou lolo atu i o tatou vaivaiga, pe manatu e lava lo tatou malosi faaleagaga e teena ai le faia o se mea sesē. (1 Ioa. 1:8) Na faapea mai Paulo e oo lava iā i latou “ua agavaa faaleagaga,” e ono lolo atu i faaosoosoga pe afai e latou te lē mataala. (Kala. 6:1) E tatau ona faia se iloiloga faamaoni o i tatou lava, ma tatou amanaʻia tulaga e ono faaosoosoina ai i tatou.—2 Kori. 13:5.

7. O ā tulaga e tatau ona tatou matuā mataala ai? Ia faataʻitaʻi.

⁷ Pe afai e tatou te mātauina tulaga e faigofie ona faaosoosoina ai i tatou, o le ā e tatau ona tatou faia? Ia atiaʻe le malosi e tetee atu ai. O se faaaʻoaʻoga, i taimi o le Tusi Paia, o le vaega e sili ona faigofie ona osofaʻia o se aai, o ona faitotoʻa. O lea, e toʻatele fitafita na leoleoina faitotoʻa o le aai. I se tulaga talitutusa, e manaʻomia ona tatou mataala aemaise lava i o tatou vaivaiga.—1 Kori. 9:27.

E FAAPEFEA ONA TATOU MATAALA I FAAOSOOSOGA?

8-9. Na ono mafai faapefea e le tauleʻaleʻa o loo taʻua i le Faataoto mataupu e 7 ona ʻalofia le faia o se agasala matuiā? (Faataoto 7:​8, 9, 13, 14, 21)

⁸ E faapefea ona tatou mataala? Seʻi tatou tilofaʻia po o le ā e tatou te aʻoaʻoina mai i le tauleʻaleʻa lea na taʻua i le Faataoto mataupu e 7. Na ia faia feusuaʻiga lē mamā ma se fafine e amio lē mamā. Ua faapea mai le fuaiupu e 22, ona “faafuaseʻi” lea ona mulimuli atu o lea tauleʻaleʻa i le fafine. E pei ona taʻua i fuaiupu na muamua atu, e iai isi gaoioiga na ia muaʻi faia, lea na faasolosolo ona taʻitaʻiina atu ai o ia e faia le agasala.

⁹ O ā gaoioiga na ia muaʻi faia lea na taʻitaʻia atu ai i le faia o le agasala? Muamua, i le afiafi, “na ia ui ane i le ala e latalata i le tulimanu e nofo ai le fafine.” Ona ia agaʻi atu lea i le fale o le fafine. (Faitau le Faataoto 7:​8, 9.) Ina ua ia vaai atu i le fafine, e leʻi alu ese o ia. Nai lo o lenā, ua ia faataga le fafine e sogi iā te ia ma faalogologo atu a o ia faamatala mai taulaga faifaatasi na ia ofoina atu, atonu ina ia faafoliga atu ai o ia o se tagata e amio lelei. (Faitau le Faataoto 7:​13, 14, 21.) Pe ana faapea e ʻalofia e le tauleʻaleʻa gaoioiga ia na iʻu ai i le agasala, semanū e lē lolo atu i na faaosoosoga ma le faia o le agasala.

10. O ā auala e ono taʻitaʻisesēina ai se tasi i aso nei e pei o le tauleʻaleʻa na taʻua i le Faataoto?

¹⁰ Ua faamaonia mai i le tala na iloiloina, le mea e mafai ona tupu i so o se auauna a Ieova. E ono faia e se tasi se agasala matuiā ma mulimuli ane faapea mai, na “faafuaseʻi” pe “na teʻi lava ua tupu.” Peitaʻi, pe afai e toe mafaufau i le mea moni na tupu, e na te iloa ai gaoioiga sesē na ia faia, ia na taʻitaʻia atu ai i le faia o le agasala. O nisi o na gaoioiga e aofia ai aumea leaga, o faafiafiaga lē mamā, o le fai ma masani le alu i nofoaga e lē talafeagai mo se Kerisiano, po o le faaaogāsesē o le Initaneti. Pe atonu foʻi ua lē toe tatalo pe faitau le Tusi Paia, pe faia se sao i le galuega talaʻi. E pei o le tauleʻaleʻa na talanoaina i le Faataoto, o lona faia o le agasala, atonu e lē o se mea na “faafuaseʻi” ona tupu.

11. O le ā e tatau ona tatou faia ina ia ʻalofia ai le faia o le agasala?

¹¹ O le ā le lesona mo i tatou? E lē gata ia tatou ʻalofia le faia o le agasala, ae o gaoioiga foʻi e taʻitaʻia atu ai i le faia o le agasala. O le manatu tonu lenā na faamatilatila e Solomona, ina ua uma ona ia taʻua le tauleʻaleʻa ma le fafine amio lē mamā. Na ia faapea mai e faatatau i le fafine agasala: ʻAua neʻi e sē i ona ala.’ (Faata. 7:25) Na ia faapea atili mai: “Ia matuā faamamao ese mai i lea fafine; aua e te faalatalata atu i le faitotoʻa o lona fale.” (Faata. 5:​3, 8) E mafai ona leoleoina i tatou mai i le faia o le agasala, e ala i le faamamao mai i tulaga e taʻitaʻia atu ai i le faia o le agasala.b E aofia ai gaoioiga ma tulaga e lē faapea e leaga mo Kerisiano, ae e ono faigofie ona faaosoosoina ai i tatou.—Mata. 5:​29, 30.

12. O le ā na maumauaʻi Iopu e fai, ma na faapefea ona fesoasoani iā te ia e mataala ai i faaosoosoga? (Iopu 31:1)

¹² Ina ia ʻalofia tulaga e taʻitaʻiina atu ai i le agasala, e manaʻomia ona tatou maumauaʻi e faia se filifiliga. O le mea lenā na faia e Iopu. Na ia “osia le feagaiga ma [ona] mata,” ina ia aua lava neʻi vaavaai atu ma le manaʻonaʻo i isi fafine. (Faitau le Iopu 31:1.) O lona maumauaʻi i lana filifiliga na fai, na ia ʻalofia ai le faia o le mulilua. E mafai foʻi ona tatou maumauaʻi e ʻalofia so o se mea e ono faaosoosoina ai i tatou.

13. Aiseā e tatau ai ona leoleoina o tatou mafaufauga? (Tagaʻi foʻi i ata.)

¹³ E tatau foʻi ona leoleoina o tatou mafaufauga. (Eso. 20:17) O isi e manatu e lē o se mea leaga le faaata i le mafaufau le faia o amioga lē mamā, pe afai e latou te lē o faatinoina. Ae e sesē na ituaiga o mafaufauga. O le mafaufau pea lava pea i amioga lē mamā, o le atili foʻi lenā ona malosi o lona faanaunauga e faatino na amioga. O lona faia faapea, o le a atili ai ona faigatā ona ia tetee atu i faaosoosoga. O le mea moni, e iai lava taimi e tatou te mafaufau ai i mea e lē mamā. Peitaʻi, o le manatu tāua, ia vave ona teena na mafaufauga ae sui i mafaufauga e mamā. O le faia faapea, e taofia ai le avea o mafaufauga lē mamā ma tuʻinanauga malosi, lea e ono iʻu ai i le faia o se agasala matuiā.—Fili. 4:8; Kolo. 3:2; Iako. 1:​13-15.

14. O le ā se isi mea e tatou te faia ina ia mataala ai i faaosoosoga?

¹⁴ O le ā se isi mea e tatou te faia ina ia mataala ai i faaosoosoga? E tatau ona tatou matuā mautinoa, o taimi uma lava e usitaʻia ai tulafono a Ieova, e tatou te maua ai aogā. E iai taimi e faigatā ai ona faaōgatusa o tatou mafaufauga ma faanaunauga i tapulaa a Ieova le Atua. Peitaʻi o le faia faapea, o le a tatou maua ai le faamalieina ona o le filemu o le mafaufau.

15. E faapefea i le atiaʻe o ni faanaunauga lelei ona fesoasoani e tatou te mataala ai i faaosoosoga?

¹⁵ E manaʻomia ona tatou atiaʻe ni faanaunauga lelei. Pe a fai ma a tatou masaniga le “ʻinoʻino i le leaga ae naunau i le lelei,” e faamalosia ai lo tatou faanaunauga e faia le mea saʻo, ma ʻalofia tulaga e ono faaosoosoina ai i tatou e faia le agasala. (Amo. 5:15) Pe afai e lelei o tatou faanaunauga, o le a tatou maumauaʻi e faia le mea saʻo, e tusa lava pe faafuaseʻi ona faaosoosoina i tatou.

16. E faapefea i le iai o se faasologa faaleagaga ona fesoasoani iā i tatou e mataala ai? (Tagaʻi foʻi i ata.)

¹⁶ O le ā e fesoasoani iā i tatou ia atiaʻe ni faanaunauga lelei? E ala i le pisi i la tatou faasologa faaleagaga. Pe a tatou auai i sauniga ma le faiva i le fanua, o le a faamalosia ai lo tatou faanaunauga e faafiafia Ieova, ma faigatā ai ona faaosoosoina i tatou e faia ni mea sesē. (Mata. 28:​19, 20; Epe. 10:​24, 25) O le faitauina ma le suʻesuʻeina o le Tusi Paia ma manatunatu loloto i ai, e faamalosia ai lo tatou faanaunauga e faia mea lelei ae ʻinoʻino i mea leaga. (Iosua 1:8; Sala. 1:​2, 3; 119:​97, 101) Ia manatua le fetalaiga a Iesu i ona soo: “[Ia] tatalo e lē aunoa, ina ia aua neʻi outou lolo atu i faaosoosoga.” (Mata. 26:41) O le tatalo e lē aunoa iā Ieova, o se avanoa lelei lenā e maua ai lana fesoasoani, ma e faamalosia ai lo tatou faanaunauga e faafiafia o ia.—Iako. 4:8.

IA FAAAUAU PEA ONA TATOU MATAALA

17. O le ā le vaivaiga na faigatā ona manumalo mai ai Peteru?

¹⁷ E ono mafai ona tatou manumalo mai i se vaivaiga. Ae e iai vaivaiga e faigatā ona tatou manumalo mai ai. Seʻi mātau le mea na tupu i le aposetolo o Peteru. Na ia lolo atu i le fefe i tagata, ma e faatolu ona ia faafitia Iesu. (Mata. 26:​69-75) E foliga mai na manumalo Peteru i le fefe i tagata, auā na ia lototele e faia se molimau i luma o le Faamasinoga Sili. (Galu. 5:​27-29) Peitaʻi i tausaga mulimuli ane, ʻona o le fefe o Peteru i tagata ua peritomeina,’ na iai se taimi e leʻi toe aai ai ma Kerisiano mai i Nuu Ese. (Kala. 2:​11, 12) O lea, ua toe lolo atu Peteru i le fefe i tagata. Atonu e leʻi manumalo o ia mai i lenā vaivaiga.

18. O le ā e tupu pe a tatou lē taumafai malosi e teena faaosoosoga?

¹⁸ E ono tutusa o tatou tulaga ma Peteru. I le ā le itu? Atonu e iai se vaivaiga na tatou manatu ua tatou manumalo mai ai, ae mulimuli ane ua toe faaosoosoina ai i tatou. O se faataʻitaʻiga, na taʻutino mai se uso: “Ou te leʻi toe matamata i ata matagā mo le sefulu tausaga, ma na ou manatu ai ua ou manumalo mai i loʻu vaivaiga. Peitaʻi, na iai pea iā te aʻu lenā masaniga leaga, lea e pei o se manufeʻai o loo faapuga e osofaʻi aʻu i le taimi talafeagai.” O le mea sili e leʻi faavaivai le uso. Na malamalama o ia na manaʻomia ona ia faia pea taumafaiga malolosi i aso taʻitasi e manumalo ai i lenā vaivaiga, atonu mo lona olaga atoa. O le fesoasoani a lana avā ma toeaina o le faapotopotoga, na ia faia ai isi taumafaiga malolosi e teena ai le matamata i ata matagā taufeusuaʻiga.

19. E faapefea ona tatou teena se vaivaiga o loo faaauau ona tatou tauivi e manumalo ai?

¹⁹ E faapefea ona tatou teena se vaivaiga o loo faaauau ona tatou tauivi e manumalo ai? E ala i le faatatauina o le fetalaiga a Iesu: “Ia faaauau ona mataala.” E tusa lava pe e te manatu e mafai ona e manumalo i se vaivaiga, ae ia ʻalofia pea tulaga e ono faaosoosoina ai oe. (1 Kori. 10:12) Ia faaauau pea ona faia mea na fesoasoani iā te oe e teena ai faaosoosoga. Ua faapea mai le Faataoto 28:14: “E fiafia le tagata e mataala i taimi uma.”—2 Pete. 3:14.

O AOGĀ E TATOU TE MAUA PE A MATAALA PEA

20-21. (a) E faapefea ona tauia i tatou pe a faia pea taumafaiga e mataala ai i faaosoosoga? (e) Pe a fai la tatou vaega, o le ā o le a faia e Ieova mo i tatou? (2 Korinito 4:7)

²⁰ E mafai ona tatou mautinoa, pe a tatou mataala pea i faaosoosoga, e sili atu aogā e tatou te maua nai lo o le “fiafia puupuu” i tuʻinanauga o le agasala. E sili atu le fiafia e tatou te maua pe a tatou ola e tusa ai ma tapulaa a Ieova. (Epe. 11:25; Sala. 19:8) O le māfuaaga, ona na foafoaina i tatou e ola e tusa ai ma ona ala. (Kene. 1:27) O le faia faapea, o le a tatou olioli ai i le mauaina o se lotofuatiaifo mamā, ma maua le avanoa e ola ai e faavavau.—1 Timo. 6:12; 2 Timo. 1:3; Iuta 20, 21.

²¹ E ui ʻe vaivai le tino,’ ae e lē faapea ai e lē mafai ona tatou manumalo mai i o tatou vaivaiga. E nofosauni Ieova e foaʻi mai le malosi e tatou te manaʻomia. (Faitau le 2 Korinito 4:7.) Ia manatua, o le mana lea e foaʻi mai e Ieova e sili atu i le malosi o le tagata. O le malosi faaletagata, po o a tatou lava taumafaiga i aso taʻitasi e mataala ai i faaosoosoga, o la tatou matafaioi lenā. Pe a fai la tatou vaega, e tatou te mautinoa e tali mai Ieova i a tatou tatalo, e ala i le foaʻi mai o le malosi faaopoopo i taimi e tatou te manaʻomia ai. (1 Kori. 10:13) Ioe, o le fesoasoani a Ieova, o le a mafai ai ona tatou mataala i faaosoosoga.