Fesili Mai le ʻAufaitau

O ai e faia le faailogaina lea e taʻua i le 2 Tesalonia 3:14? Pe e faia e toeaina po o Kerisiano taʻitoʻatasi?

Na tusi atu Paulo i Kerisiano i Tesalonia e faapea: “Ae afai e lē usiusitaʻi se tasi i la matou upu o loo i lenei tusi, ia faailogaina lea tagata.” (2 Tesa. 3:14) I le taimi ua teʻa, na tatou manatu o lenei faatonuga na avatu i toeaina. O lea, e faia e se toeaina se lauga e lapataʻia ai le faapotopotoga, pe afai e iai se tasi e faaauau ona ia lē amanaʻia mataupu silisili o le Tusi Paia, ma fautuaga a toeaina. O lona uiga, e lē toe faifaimea faatasi sui o le faapotopotoga ma lē ua faailogaina.

Peitaʻi, ua iai se fetuunaʻiga i lo tatou malamalamaga. E foliga mai o le fautuaga a Paulo na faasino atu i le filifiliga e faia e Kerisiano taʻitoʻatasi, pe a tulaʻi mai ni tulaga patino. O lea, e lē manaʻomia la e toeaina ona faia se lauga lapataʻi. Aiseā? Ia mātau le siʻomaga o upu a Paulo.

Na iloa e Paulo na iai nisi i le faapotopotoga na “faalogogatā.” Na latou lē amanaʻia fautuaga mai i le Afioga a le Atua. I lana asiasiga talu ai, na ia avatu ai le faatonuga: “Afai e lē fia galue se tasi, aua neʻi ʻai o ia.” Peitaʻi, e iai nisi na faaauau ona mumusu e galulue e tausia i latou lava, e ui lava na mafai ona latou faia faapea. E lē gata i lea, na latou isuisu fua i mataupu e fitoitonu i isi. O le ā le auala na tatau ona feutagaʻi ai Kerisiano ma tagata faalogogatatā faapena?—2 Tesa. 3:​6, 10-12.

Na faapea mai Paulo, “ia faailogaina lea tagata.” O le upu Eleni o loo faaaogāina i inei, e maua ai le manatu ia mātau ma mataalia i tagata faapena. Na fai atu e Paulo lenei faatonuga i le faapotopotoga atoa, ae e lē na o toeaina. (2 Tesa. 1:1; 3:6) O lea, pe a mātauina e Kerisiano taʻitoʻatasi se uso po o se tuafafine e lē o usitaʻia fautuaga mai i le Tusi Paia, e ono filifili la le Kerisiano e “aua neʻi toe auaumea” ma lenā tagata faalogogatā.

Po o lona uiga la e tatou te feutagaʻi ma lenā tagata e pei o sē ua aveesea mai i le faapotopotoga? E leai, auā na faapea atili mai Paulo: “Ae ia apoapoaʻi atu pea iā te ia e pei o se uso.” O lea, e mafai e se Kerisiano ona auai faatasi i sauniga ma talaʻiga ma le tagata ua faailogaina, ae e filifili e lē faifaimea faatasi ma ia i taimi o faatasiga faasamasamanoa. Aiseā? Na faapea mai Paulo, “ina ia māsiasi ai o ia.” O le faailogaina o se Kerisiano faalogogatā, atonu o le a ia lagona ai le māsiasi mai i ana amioga ma suia ai ona ala.—2 Tesa. 3:​14, 15.

E faapefea ona faatatauina e Kerisiano i aso nei, lenei fautuaga? Muamua, e ao ona tatou faamautinoa o loo faaalia e se tagata le uiga “faalogogatā,” e pei ona taʻua e Paulo. E leʻi faasino atu Paulo iā i latou e ese a latou filifiliga pe a oo i mataupu e fua i le lotofuatiaifo o se Kerisiano, po o i latou foʻi e ese mea e fiafia ai mai iā i tatou. E leʻi faasino atu foʻi o ia iā i latou atonu na faia se mea e faatigā ai iā i tatou. Nai lo o lea, na talanoa patino lava Paulo e faatatau iā i latou o loo filifili ma le loto i ai, e lē usitaʻia fautuaga mai i le Atua.

I aso nei, pe a tatou mātauina se uso po o se tuafafine o loo faaalia se uiga lē usiusitaʻi,a e mafai ona filifili le tagata lava ia e lē faifaimea faatasi ma lenā tagata i faatasiga faasamasamanoa, po o evaevaga. Talu ai o le filifiliga lea e fitoitonu i le tagata lava ia, e lē tatau la ona faailoa atu fua la tatou filifiliga i isi e ese mai i sui o lo tatou aiga o loo tatou nonofo faatasi. Ae e mafai ona tatou auai faatasi pea ma lenā tagata, i taimi o sauniga ma talaʻiga. Pe a suia ona uiga ma amioga, e mafai ona tatou toe faifaimea faatasi ma ia e pei ona masani ai.