Ia Aʻoaʻo ni Manatu Fou pe a Faia ni Au Saʻiliʻiliga

A o tatou sauniuni e faia ni a tatou saʻiliʻiliga, atonu e tatou te fesili ifo, ʻO ā ni mea o le a ou aʻoaʻoina?’ Peitaʻi, e manaʻomia ona tatou manatua e tusa lava pe e tatou te manatu o le a iai se mea patino e tatou te aʻoaʻoina, ae e lē faapea ai e lē o iai ni manatu fou e finagalo Ieova e tatou te aʻoaʻoina. E faapefea la ona tatou aʻoaʻoina ni manatu fou pe a faia ni a tatou saʻiliʻiliga?

Ia tatalo mo le atamai. Ia talosaga atu iā Ieova e fesoasoani mai ina ia e malamalama i manatu o loo ia finagalo e te aʻoaʻoina i le taimi lenei. (Iako. 1:5) Aua le faamalieina oe i mea na e aʻoaʻoina i le taimi ua teʻa.—Faata. 3:​5, 6.

Ia faataga le mana o le Afioga a le Atua e taʻitaʻia lou olaga. “O loo ola le afioga a le Atua.” (Epe. 4:12) E eseese auala e mafai ai e le “afioga” a le Atua ona taaʻina o tatou olaga. Ae e faatoʻā mafai ona tupu lenā mea, pe afai e tatou te talia ma faatatau lesona e tatou te aʻoaʻoina mai ai.

Ia talisapaia mea uma ua laulauina mai e Ieova i lana laoai faaleagaga. Ua faatusaina meaʻai faaleagaga mai iā Ieova i “se faigaʻai o mea taumafa e sili ona lelei.” (Isa. 25:6) Aua e te ʻalofia “mea taumafa” e te manatu e te lē fiafia i ai. O le faia faapea, e lē gata o le a aogā iā te oe, ae o le a e matuā fiafia ai foʻi i mea ua saunia mai e Ieova.