Aafiaga o Taua ma Fevaevaeaʻiga i Tagata

E mafai ona tutupu faafuaseʻi taua ma fevaevaeaʻiga i atunuu e leʻi faatalitalia e ono tutupu ai. E oo i tagata e lē o nonofo i atunuu o loo faia ai taua, e aafia ai foʻi. E tusa lava pe ua uma se taua, ae e tumau pea ona iai aafiaga leaga mo se taimi umi. Seʻi o tatou iloiloina nisi o aafiaga:

• 

  Oge. E tusa ai ma le faamatalaga mai i le World Food Programme, “o taua o le māfuaaga sili lea o le fia aai o tagata. E tusa ma le 70 pasene o tagata ua matelāina i le lalolagi, e nonofo i vaipanoa o loo aafia i taua ma faiga sauā.”

• 

  Faafitauli o le tino ma le mafaufau. O faamataʻuga mai i taua, ua māfua ai ona aafia tagata i mafatiaga ma popolega. O i latou o loo nonofo i vaipanoa o loo tutupu ai taua, e telē le avanoa e aafia ai i faafitauli o le tino ma le mafaufau. Peitaʻi, e faigatā ona latou maua fesoasoani faafomaʻi e latou te manaʻomia.

• 

  Sulufaʻi i isi nofoaga. E tusa ai ma se faamatalaga a le Komesina Sili o Malo Aufaatasi mo Tagata Sulufaʻi, e oo ane iā Setema 2023 ua silia ma le 114 miliona tagata i le lalolagi aoao ua sulufaʻi atu i isi nofoaga. O le māfuaaga autū o le sosola ese o nei tagata, ona o taua ma fevaevaeaʻiga.

• 

  Faafitauli tau tamaoaiga. Ua aafia tagata i faafitauli tau tamaoaiga e pei o le siitia o le tau o le soifuaga, ona o taua. E latou te aafia pe a faaaogā e le malo i taua tupe na faaagaga mo auaunaga tau soifua mālōlōina ma aʻoaʻoga. Pe a uma se taua, e matuā taugatā le toe fausiaina ma le toe faaleleia o mea na faaleagaina.

• 

  Faafitauli i le siʻosiʻomaga. E aafia tagata pe a faaleagaina punaʻoa faalenatura o loo latou faalagolago i ai. O le faaleagaina o vai, le ʻea ma le laueleele, e faapogaia ai maʻi faaumiumi. E tusa lava po ua leva ona uma se taua, ae e matuā lamatia ola o tagata i pomu o loo tatao i le eleele.