Ia Faaōgatusa o Tatou Manatu ma Manatu o Ieova ma Iesu

1-2. O ā mea e aofia ai i le alofa iā Ieova ma na faapefea ona faamaonia mai e Iesu?

“IA E alofa atu iā Ieova lou Atua ma lou lotoatoa, ma lou ola atoa, ma lou malosi atoa, ma lou mafaufau atoa.” (Luka 10:27) Na faailoa manino mai e Iesu o le poloaʻiga lea e sili ona tāua i le Tulafono a Mose. Ia mātau, o lo tatou alofa mo Ieova e aofia ai o tatou loto, lea e faasino atu i o tatou faanaunauga ma faalogona. E aofia ai foʻi ma o tatou ola atoa ma lo tatou malosi. Peitaʻi, o le alofa iā Ieova e aofia ai foʻi ma o tatou mafaufau, lea e faasino atu i le auala e tatou te mafaufau pe manatu ai i se mataupu. O le mea moni, e lē mafai ona tatou malamalama atoatoa i manatu o Ieova. Ae e mafai ona tatou malamalama i ona manatu, e ala i le iloiloina o “le finagalo o Keriso,” ona na silafia lelei e Iesu manatu o lona Tamā, ma na atagia mai i ana gaoioiga.—1 Kori. 2:16.

² Na alofa Iesu iā Ieova ma lona mafaufau atoa. Na ia silafia le finagalo o le Atua mo ia, ma na ia maumauaʻi ai e gaoioi e ōgatusa ma le finagalo o le Atua, e ui lava o le a mafatia ai. O le uaʻi atu o Iesu i le faia o le finagalo o lona Tamā, na ia lē faataga ai so o se mea e faalavelavea ai o ia.

3. O le ā na aʻoaʻoina e le aposetolo o Peteru mai iā Iesu, ma o le ā na ia faalaeiauina isi Kerisiano e fai? (1 Peteru 4:1)

³ Na maua e Peteru ma isi aposetolo le faaeaga e faatasitasi ai ma Iesu, ma aʻoaʻoina le auala e mafaufau ai o ia. Ina ua tusi e Peteru lana uluaʻi tusi faagaeeina, na ia faalaeiau Kerisiano ina ia faaauupegaina i latou i mafaufauga sa iai foʻi i le Keriso. (Faitau le 1 Peteru 4:1.) Na faaaogā e Peteru se faaupuga faavaegaʻau ina ua ia tusi, “ia faaauupegaina” outou. O lea, pe a faaaʻoaʻo Kerisiano i le auala e mafaufau ai Iesu, o le a faaauupegaina ai i latou e tau faasaga i faanaunauga agasala, ma le lalolagi o loo pulea e Satani.—2 Kori. 10:​3-5; Efe. 6:12.

4. O le a faapefea ona fesoasoani lenei suʻesuʻega iā i tatou ina ia utagia le fautuaga a Peteru?

⁴ O le a tatou iloiloina le auala e mafaufau ai Iesu, ma pe e faapefea ona tatou faaaʻoaʻo i ai. O le a tatou iloiloina ai pe e faapefea ona (1) faaōgatusa o tatou manatu ma manatu o Ieova, lea e fesoasoani ina ia autasi ai o tatou manatu, (2) tatou faaalia le lotomaulalo, ma le (3) tatou mafaufau lelei e ala i le faalagolago iā Ieova i le tatalo.

IA ŌGATUSA O TATOU MANATU MA MANATU O IEOVA

5. Na faapefea ona lē ōgatusa manatu o Peteru ma manatu o Ieova i se tasi o mataupu?

⁵ Seʻi mātau se tasi o taimi e leʻi ōgatusa ai manatu o Peteru ma manatu o Ieova. Na faamatala atu e Iesu i ona aposetolo o le a alu atu i Ierusalema, ma o le a tuuina atu o ia i taʻitaʻi lotu ina ia faapuapuagatia ma fasiotia. (Mata. 16:21) Atonu na faigatā iā Peteru ona talitonu, o le a faataga e Ieova le fasiotia o Iesu, le faamoemoega o Isaraelu ma o le Mesia folafolaina. (Mata. 16:16) Ona taʻitaʻi ese lea o ia e Peteru ma faapea atu: “Le Alii e, ia e alofa iā te oe lava, e lē tutupu na mea iā te oe.” (Mata. 16:22) Talu ai e leʻi ōgatusa manatu o Peteru ma Ieova i lenei mataupu, e leʻi autasi foʻi la ona manatu ma manatu o Iesu.

6. Na faapefea ona faaalia e Iesu o loo ōgatusa ona manatu ma manatu o Ieova?

⁶ Na ōgatusa lelei manatu o Iesu ma manatu o lona Tamā i le lagi. Na fetalai atu Iesu iā Peteru: “Satani e, inā alu ese ia oe! Ua fai oe ma mea ou te tautevateva ai, auā e lē o manatu o le Atua ua e manatu ai, a o manatu o tagata.” (Mata. 16:23) Na silafia e Iesu o le faia o le finagalo o Ieova o le a oo ai iā te ia puapuaga ma fasiotia ai. O lea na teena ai e Iesu le fautuaga a Peteru, e ui lava atonu na lelei le faanaunauga o Peteru. O lenei mea na tupu, na aʻoaʻoina ai e Peteru e ao ona faaōgatusa ona manatu ma le auala e mafaufau ai Ieova. O se lesona tāua foʻi lea mo i tatou.

7. Na faapefea ona faaalia e Peteru i se taimi mulimuli ane o loo naunau e faaōgatusa ona manatu ma manatu o Ieova? (Tagaʻi i le ata.)

⁷ Mulimuli ane, na faaalia e Peteru lona faanaunauga ia faaōgatusa ona manatu ma manatu o Ieova. Ina ua oo i le taimi a Ieova e faaaofia ai tagata o Nuu Ese e leʻi peritomeina e avea ma ona tagata, na tofia Peteru e talaʻi atu i le tagata o Nuu Ese o Konelio. O Konelio o se tasi o tagata muamua mai i Nuu Ese na avea ma Kerisiano. Talu ai e seāseā faifaimea faatasi tagata Iutaia ma tagata o Nuu Ese, e mautinoa la na manaʻomia e Peteru se fesoasoani e sauniunia ai o ia mo lenei tofiga. Ina ua malamalama Peteru i le finagalo o le Atua i lenei mataupu, na sui loa ona manatu. O le iʻuga, na “lotomalie” o ia e alu e faataunuu lona tofiga. (Galu. 10:​28, 29) Na talaʻi atu o ia iā Konelio ma lona aiga, ma na papatisoina i latou.—Galu. 10:​21-23, 34, 35, 44-48.

8. E faapefea ona iloa o loo ōgatusa o tatou manatu ma manatu o Ieova? (1 Peteru 3:8)

⁸ I tausaga mulimuli ane, na faalaeiau e Peteru Kerisiano ina ʻia autasi o latou manatu.’ (Faitau le 1 Peteru 3:8.) I le avea ai ma tagata o Ieova, e mafai ona autasi o tatou manatu pe a ōgatusa ma manatu o Ieova o loo i lana Afioga. O se faaaʻoaʻoga, na faalaeiauina e Iesu ona soo ina ia faamuamua le Malo i o latou olaga. (Mata. 6:33) O lea, atonu e filifili se tagata talaʻi i le faapotopotoga e auai i se tasi o vala o le auaunaga faataimi atoa. Nai lo o le fai atu o ni tala e faalotovaivai ai o ia, ae e ao ona fai atu ni tala e faalaeiau ai ina ia ausia lona sini.

IA LOTOMAULALO

9-10. Na faapefea ona faaalia e Iesu le lotomaulalo i se auala e sili ona mataʻina?

⁹ Na aʻoaʻo e Iesu Peteru ma isi aposetolo i le tāua o le lotomaulalo, i le pō a o leʻi fasiotia o ia. I se taimi na muamua atu, na auina atu ai e Iesu Peteru ma Ioane e sauniunia mea mo la latou talisuaga mulimuli a o leʻi maliu. E foliga mai o na sauniuniga e aofia ai le faamautinoa o loo iai se tanoa, ma ni solo e fufulu ai vae o mālō a o leʻi aai. Ae faamata o ai o le a faia lenā gaoioiga faatauvaa?

¹⁰ E leʻi faatalatū Iesu e faaalia le lotomaulalo, i se auala e sili ona mataʻina. Na matuā faateʻia ona aposetolo ina ua ia faia se galuega e na o auauna e latou te faia. Na tuu ese e Iesu lona ofu tele, fusi lona puimanava i le solo, sasaa vai i le tanoa, ma amata ona ia fufuluina vae o ona aposetolo. (Ioa. 13:​4, 5) Atonu na umi se taimi na alu i le fufuluina o vae o aposetolo uma e toʻa 12, lea e aofia ai ma Iuta o le a faalataina Iesu. E ui i lea, na lotomaulalo Iesu e faia lenā galuega, ma na ia fetalai e faapea: “Po ua outou malamalama i le mea ua ou faia iā te outou? Ua outou taʻua aʻu o le ʻAʻoaʻo’ ma o le ʻAlii,’ ma e saʻo outou auā o aʻu lava lenā. O le mea lea, pe afai o aʻu o le Alii ma o le Aʻoaʻo, ae ua ou fufuluina o outou vae, e tatau foʻi la iā te outou ona fufulu e le tasi vae o le isi.”—Ioa. 13:​12-14.

11. Na faapefea ona faaalia e Peteru le lotomaulalo? (1 Peteru 5:5) (Tagaʻi foʻi i le ata.)

¹¹ Na aʻoaʻoina e Peteru le lotomaulalo mai iā Iesu. Ina ua toe foʻi Iesu i le lagi, na faamālōlōina e Peteru se tamāloa na fanau mai lava o pipili. (Galu. 1:​8, 9; 3:​2, 6-8) O lenei mea na māfua ai ona lolofi ane se motu o tagata. (Galu. 3:11) Peitaʻi, e leʻi manaʻo Peteru i viiga mai i tagata, e ui lava na ola aʻe i se vaipanoa na faatāua e tagata tulaga taualoa ma aloaʻia. Ae na faaalia e Peteru le lotomaulalo i lona avatu o le viiga uma iā Ieova ma Iesu, e ala i lona faapea mai: “Ona o lona [Iesu] suafa ma lo ma faatuatua i lona suafa, ua malosi ai lenei tagata, o lē ua outou vāai i ai ma iloa.” (Galu. 3:​12-16) O faaupuga na faaaogā e Peteru i sana tusi i Kerisiano e faatatau i le manaʻomia ona atiaʻe o le lotomaulalo, atonu e faamanatu mai ai le taimi na fusi ai e Iesu se solo i lona puimanava ma fufulu vae o ona aposetolo.—Faitau le 1 Peteru 5:5 ma le faamatalaga pito i lalo.

12. E faapefea ona tatou atiaʻe pea le lotomaulalo e pei o Peteru?

¹² E mafai foʻi ona tatou mulimuli i le faaaʻoaʻoga a Peteru e ala i le atiaʻe o le lotomaulalo. O le lotomaulalo moni, e lē na o le tau ina fai atu o ni faaupuga e atagia atu ai le lotomaulalo. O le faaupuga o loo faaaogā i inei e Peteru mo le “lotomaulalo,” e aofia ai le auala e tatou te mafaufau ai iā i tatou lava faapea ma isi. E tatou te faia galuega mo isi ona e tatou te alolofa iā Ieova ma tagata, ae e lē ina ia viia ai i tatou. E faaalia lo tatou lotomaulalo pe a tatou fiafia e auauna iā Ieova ma o tatou uso, e tusa lava pe e lē o iloa mai e tagata mea o loo tatou faia.—Mata. 6:​1-4.

IA “MAFAUFAU LELEI”

13. Ia faamatala mea e aofia ai i le “mafaufau lelei.”

¹³ O le ā e aofia ai i le “mafaufau lelei”? (1 Pete. 4:7) O se Kerisiano e mafaufau lelei, e taumafai malosi e faia filifiliga lelei e atagia mai ai manatu o Ieova. E iloa e lenā Kerisiano, e leai se isi mea e sili atu ona tāua i le olaga, nai lo o le la faiā ma Ieova. E na te amanaʻia foʻi e iai mea e gata mai ai lona malosi, ma e na te lē iloa mea uma. E faaalia foʻi lona lotomaulalo, e ala i le fai ma masani ona faalagolago i le Atua e ala i le tatalo.a

14. Na faapefea ona lē taulau Peteru e faalagolago iā Ieova?

¹⁴ I le pō mulimuli o Iesu a o leʻi maliu, na ia lapataʻia ai ona soo e faapea: “O le a outou tuulafoaʻia aʻu i lenei pō.” Ae na tali atu ma le mautinoa Peteru: “E tusa lava pe tuulafoaʻia oe e i latou uma, ae ou te lē tuulafoaʻia lava oe!” I lenā lava pō, na fautua atu ai Iesu i isi o ona soo, “ia faaauau ona mataala ma tatalo e lē aunoa.” (Mata. 26:​31, 33, 41) Pe ana utagia e Peteru lenā fautuaga, semanū e na te maua le lototele e faailoa atu ai o ia o se soo o Iesu. Nai lo o lea, na ia faafitia lona Matai, ma na matuā faanoanoa ai.—Mata. 26:​69-75.

15. Na faapefea ona faaalia pea e Iesu le mafaufau lelei i le pō mulimuli a o leʻi maliu?

¹⁵ Na faalagolago atoatoa Iesu iā Ieova. E ui i lona tulaga lelei atoatoa, ae na ia tatalo e lē aunoa ma na ia maua ai le lototele e gaoioi ai ia ōgatusa ma le finagalo o Ieova. (Mata. 26:​39, 42, 44; Ioa. 18:​4, 5) E mautinoa e leʻi galo iā Peteru le tele o taimi na tatalo ai Iesu, i le pō mulimuli a o leʻi maliu.

16. Na faapefea ona iloa ua atiaʻe e Peteru le mafaufau lelei? (1 Peteru 4:7)

¹⁶ A o faagasolo taimi, na aʻoaʻo e Peteru le tāua o le faalagolago iā Ieova i le tatalo. Ina ua toe faatūina aʻe Iesu, na ia faamautinoa atu iā Peteru ma isi aposetolo o le a latou maua le agaga paia, ina ia faataunuu ai lo latou tofiga e talaʻi. Peitaʻi, na faatonuina i latou e Iesu ina ia faatali pea i Ierusalema, seʻia oo i le taimi e na te faia ai faapea. (Luka 24:49; Galu. 1:​4, 5) O le ā na faia e Peteru i le taimi na faatalitali ai? Na latou “finafinau i le tatalo” ma isi Kerisiano. (Galu. 1:​13, 14) Mulimuli ane, i le tusi muamua a Peteru, na ia faalaeiauina ai Kerisiano ina ia mafaufau lelei ma faalagolago iā Ieova i le tatalo. (Faitau le 1 Peteru 4:7.) Na aʻoaʻoina e Peteru le tāua o le faalagolago iā Ieova, ma na avea o ia o se poutū i le faapotopotoga.—Kala. 2:9.

17. E tusa pe e iai ni o tatou tomai faapitoa, ae o le ā e manaʻomia ona tatou faia pea? (Tagaʻi foʻi i le ata.)

¹⁷ Ina ia mafaufau lelei, e ao ona fai ma a tatou masani le tatalo iā Ieova. E manaʻomia ona tatou tatalo pea iā Ieova, e tusa pe e iai ni o tatou tomai faapitoa e fai ai se mea. O lea, pe a tatou faia ni filifiliga aemaise lava i filifiliga tāua, e manaʻomia ona tatou tatalo iā Ieova mo le taʻitaʻiga, ma maufaatuatuaina e na te silafia le mea e sili mo i tatou.

18. O le ā ua e maumauaʻi e fai?

¹⁸ Maʻeu lo tatou lotofaafetai ona ua foafoaina i tatou e Ieova i se auala e mafai ona faaatagia atu ai ona uiga! (Kene. 1:26) O le mea moni, e lē mafai ona tatou faaaʻoaʻo atoatoa iā Ieova. (Isa. 55:9) Ae e pei o Peteru, e mafai ona faatutusa le auala e tatou te mafaufau ai ma manatu o Ieova, e ala i le faaauau ona faaōgatusa o o tatou manatu ma manatu o Ieova, ia lotomaulalo, ma ia mafaufau lelei.