Ia Faaaʻoaʻo i Agelu Faamaoni

1-2. (a) O ā itu e eseese ai i tatou ma agelu? (e) O ā itu e tutusa ai i tatou ma agelu?

INA ua tosina mai oe e Ieova i le upu moni, na ia valaaulia oe i lona ʻauaiga toʻatele e alolofa iā te ia, lea e aofia ai le faitau miliona o agelu faamaoni. (Tani. 7:​9, 10) Pe a tatou mafaufau i agelu, e tatou te ono manatunatu i mea e eseese ai i latou mai i tagata. O se faaaʻoaʻoga, ua leva ona iai agelu a o leʻi taitai foafoaina tagata. (Iopu 38:​4, 7) E sili atu lo latou malolosi nai lo o i tatou. E sili atu lo latou paia ma amiotonu nai lo o tagata, talu ai o tagata e lē lelei atoatoa.—Luka 9:26.

² E ui lava i mea e eseese ai, ae e tele mea e tutusa ai i tatou ma agelu. O se faaaʻoaʻoga, i le pei o agelu, e mafai ona tatou faaatagia atu uiga matagofie o Ieova. E pei o agelu, e iai foʻi la tatou filifiliga saʻoloto, e iai o tatou igoa, o uiga e ese ai le tasi mai i le isi, ma tiute tauave eseese. E tutusa foʻi i tatou ma agelu, ona e iai lo tatou manaʻoga e tapuaʻi i Lē na foafoaina i tatou.—1 Pete. 1:12.

3. O ā mea e tatou te aʻoaʻoina mai i agelu faamaoni?

³ Talu ai e tele mea e tutusa ai i tatou ma agelu, o a latou faaaʻoaʻoga lelei, ua mafai ona faalaeiauina ai i tatou ma tatou aʻoaʻoina mai ai le tele o lesona tāua. I lenei mataupu, o le a tatou iloiloina ai auala e mafai ona tatou faaaʻoaʻo ai i le lotomaulalo o agelu faamaoni, o lo latou alofa i tagata, tumau, ma a latou taumafaiga e tausisia le mamā o le faapotopotoga.

E LOTOMAULALO AGELU

4. (a) E faapefea ona faaalia e agelu le lotomaulalo? (e) Aiseā e lotomaulalo ai agelu? (Salamo 89:7)

⁴ E lotomaulalo agelu faamaoni. E ui i le tele o lo latou tomai, malosi, ma le atamai, ae e latou te usiusitaʻi lava i faatonuga a Ieova. (Sala. 103:20) A o faataunuu o latou tofiga, e latou te lē gugutu i mea ua latou faataunuuina pe faalialiavale lo latou malosi. E latou te fiafia e faia so o se mea e finagalo i ai Ieova, e ui e lē o taʻua ai o latou igoa.a (Kene. 32:​24, 29; 2 Tu. 19:35) E latou te teena so o se viiga lea e tatau ona avatu iā Ieova. Aiseā e lotomaulalo ai agelu? Talu ai e latou te alolofa iā Ieova ma matuā faaaloalo iā te ia.—Faitau le Salamo 89:7.

5. Na faapefea e se agelu ona faaalia le lotomaulalo a o faasaʻo le aposetolo o Ioane? (Tagaʻi foʻi i le ata.)

⁵ Seʻi mātau se mea na tupu e faaalia ai le lotomaulalo o agelu. Pe tusa o le 96 T.A., na faailoa atu ai e se agelu e lē o taʻua lona igoa se faaaliga ofoofogia i le aposetolo o Ioane. (Faaa. 1:1) O le ā le auala na tali atu ai Ioane i lenā faaaliga? Na taumafai o ia e tapuaʻi atu i le agelu. Peitaʻi, na vave lava ona taofi o ia e lenei agelu faamaoni ma faapea atu: “Ia e faaeteete! Aua neʻi e faia lenā mea! Ua na o aʻu o se uso a pologa, e pei o oe ma ou uso . . . Ia tapuaʻi i le Atua!” (Faaa. 19:10) Maʻeu le lotomaulalo o lenā agelu! E leʻi naunau o ia i le mamalu po o le viiga. Na vave lava ona ia faauaʻi atu Ioane iā Ieova le Atua. I le taimi e tasi, e leʻi vaai maulalo le agelu iā Ioane. E ui i le umi talu ona auauna lenā agelu iā Ieova ma e sili atu lona malosi nai lo o Ioane, ae na ia lotomaulalo e ala i le taʻua o le aposetolo o lona uso a pologa. E ui foʻi na faasaʻo e le agelu Ioane, ae e na te leʻi feutagaʻi ma lenei aposetolo ua matua i se auala ʻinaʻinā pe otegia foʻi o ia. Peitaʻi, na talanoa atu le agelu i se auala agalelei. Atonu na ia mātauina le matuā ofo o Ioane i mea na ia vaaia.

6. E faapefea ona tatou faaaʻoaʻo i le lotomaulalo o agelu?

⁶ E faapefea ona tatou faaaʻoaʻo i le lotomaulalo o agelu? E mafai foʻi ona faia o tatou faaeaga e aunoa ma le gugutu, po o le viiviia o i tatou lava i mea lelei ua tatou faia. (1 Kori. 4:7) E lē gata i lea, e lē tatau ona tatou vaai maulalo i isi, e tusa lava po ua umi ona tatou auauna iā Ieova nai lo o i latou, pe e tatou te maua foʻi ni faaeaga faapitoa. O le mea moni, o le tele o o tatou faaeaga, o le tele foʻi lenā e tatou te faaalia ai le lotomaulalo. (Luka 9:48) I le pei o agelu, e tatou te mananaʻo foʻi e auauna atu i isi. E tatou te lē mananaʻo e faasilisilia i tatou lava.

7. E faapefea ona tatou faaalia le lotomaulalo pe afai e manaʻomia ona faasaʻo pe aʻoaʻia se tasi?

⁷ E mafai foʻi ona tatou faaalia le lotomaulalo pe a manaʻomia ona faasaʻo se tasi, e pei o se uso, se tuafafine, po o se tasi o le fanau. A o avatu se aʻoaʻiga, atonu e manaʻomia ona tuusaʻo. Peitaʻi, i le pei o le agelu na faasaʻoina ma le agalelei Ioane, e mafai foʻi ona tatou avatu se faasaʻoga i se auala e lē lagona ai e le tagata le lotovaivai. Pe afai e tatou te lē manatu e sili i tatou i lo o isi, o le a mafai ona tatou avatu aʻoaʻiga i se auala faaaloalo ma agalelei.—Kolo. 4:6.

E ALOLOFA AGELU I TAGATA

8. (a) E tusa ai ma le Luka 15:​10, e faapefea ona faaalia e agelu le alofa i tagata? (e) O le ā le matafaioi a agelu i le galuega talaʻi? (Tagaʻi foʻi i le ata.)

⁸ E alolofa ma manatu mamafa agelu i tagata. E latou te olioli pe a salamō se tagata agasala. O se faataʻitaʻiga, o se mamoe na leiloa ae ua toe foʻi iā Ieova, po o se tagata ua faia suiga i lona olaga ma talia le upu moni. (Faitau le Luka 15:10.) O loo faia foʻi se sao maelega a agelu i le galuega talaʻi. (Faaa. 14:6) E ui e latou te lē talaʻi tuusaʻo i tagata, ae atonu e latou te taʻitaʻia se tagata talaʻi i se tasi o loo naunau e aʻoaʻo e faatatau iā Ieova. O le mea moni, e lē mafai ona tatou faapea atu ma le mautinoa, o taimi uma e taʻitaʻia ai i tatou e agelu i se tagata patino. E faaaogā foʻi e Ieova isi auala e pei o lona agaga paia, e fesoasoani ai i tagata pe taʻitaʻia ana auauna. (Galu. 16:​6, 7) Peitaʻi, o loo faaauau pea ona faaaogā e Ieova ana agelu i le tele o taimi. O lea, pe a tatou talaʻi atu i isi, e tatou te mautinoa e lagolagoina i tatou e agelu.—Tagaʻi i le pusa “Na Taliina a Latou Tatalo.”b

9. E faapefea ona tatou faaaʻoaʻo i le auala e faaalia ai e agelu le alofa i tagata?

⁹ E faapefea ona tatou faaaʻoaʻo i le auala e faaalia ai e agelu le alofa i tagata? Pe a faasilasila ua toe faaaʻe mai se tasi, e tatou te lagona le fiafia e pei foʻi o agelu. Ia tatou tausolomua e faafeiloaʻi ma le māfana o ia, ma faamautinoa atu e tatou te alolofa iā te ia. (Luka 15:​4-7; 2 Kori. 2:​6-8) E mafai foʻi ona tatou faaaʻoaʻo i agelu, e ala i le faia o so tatou sao maelega i le galuega talaʻi. (Fai. 11:6) E pei lava ona lagolagoina i tatou e agelu a o tatou auai i le galuega talaʻi, e faapena foʻi ona tatou lagolagoina o tatou uso ma tuafāfine a o latou auai foʻi i le galuega talaʻi. O se faataʻitaʻiga, pe e mafai ona tatou faia ni fuafuaga e galulue ma se tagata talaʻi e lē lava le poto masani i le faiva? Pe e mafai ona tatou lagolagoina ē matutua po o uso ma tuafāfine e lē atoatoa le malosi, ina ia faia pea so latou sao i le faiva?

10. O le ā e tatou te aʻoaʻoina mai i le mea na tupu iā Sara?

¹⁰ Ae e faapefea pe afai e lē tele ni mea e mafai ona tatou faia ona o o tatou tulaga? E iai lava auala e tatou te galulue faatasi ai ma agelu i le galuega talaʻi. Seʻi mātau se mea na tupu iā Sara,c o se tuafafine o loo nofo i Initia. E pe tusa ma le 20 tausaga talu ona paeonia Sara ae aafia loa i se gasegase, ma iʻu ai ina faataotolia i le fale. O lea, na ia lagona ai le matuā lotomafatia. Peitaʻi, o le lagolagosua ma le alofa o lona aiga faaleagaga, faatasi ai ma le faitauina e lē aunoa o le Tusi Paia, na toe maua ai e Sara se vaaiga mautinoa. Ae na manaʻomia ona fetuunaʻi lana faiva e fua i lona tulaga ua iai. Talu ai e lē mafai ona ia nofo i luga e tusi ni tusi, e na o le pau le mea e mafai ona ia faia, o le talaʻi e faaaogā ai le telefoni. O lea, na ia vili ai i ana toe asiga, ma na latou taʻu mai iā te ia isi tagata o loo faaalia foʻi le fiafia. O le iʻuga, i ni nai masina, ae ua 70 suʻesuʻega faale-Tusi Paia a Sara, ma e leʻi mafai ona ia faia uma na suʻesuʻega. O lea, na ia tuu atu ai i isi o le faapotopotoga nisi o ana suʻesuʻega. Ua auai foʻi le toʻatele o ana suʻesuʻega i sauniga. Maʻeu le olioli o agelu a o galulue faatasi ma uso ma tuafāfine e pei o Sara, o ē o loo faia le mea sili i le galuega talaʻi!

E TUMAU FAAMAONI AGELU

11. Ua faapefea ona avea agelu ma faaaʻoaʻoga mataʻina o le tumau?

¹¹ Ua avea agelu faamaoni ma faaaʻoaʻoga mataʻina o le tumau. Ua faitau afe tausaga o latou onosaia faiga lē tonu ma amioga leaga. Na latou molimauina le fouvalega a Satani ma le toʻatele o isi foafoaga agaga na latou auauna faatasi iā Ieova. (Kene. 3:1; 6:​1, 2; Iuta 6) O loo taʻua i le Tusi Paia se agelu faamaoni na teena e se temoni malosi. (Tani. 10:13) E lē gata i lea, i le talafaasolopito o tagata, ua molimauina e agelu e toʻalāiti lava i latou o loo saʻilia le tapuaʻiga moni. E ui i na tulaga, o loo faaauau pea ona auauna ma le fiafia ma le maelega nei agelu faamaoni iā Ieova. Ua latou iloa, o le a tafiesea e Ieova faiga lē tonu uma i lana taimi atofaina.

12. O le ā e fesoasoani iā i tatou ina ia tumau ai?

¹² E faapefea ona tatou faaaʻoaʻo i le tumau o agelu? I le pei o agelu, atonu e tatou te molimauina faiga lē tonu. E pei foʻi o i latou, e tatou te mautinoa o le a tafiesea e Ieova le amioleaga i lana taimi atofaina. O lea, ʻe tatou te lē fiu e faia le mea lelei’ e pei o agelu faamaoni. (Kala. 6:9) Ua folafola mai e Ieova, o le a ia fesoasoani mai ina ia tatou tumau. (1 Kori. 10:13) E mafai ona tatou tatalo atu iā Ieova mo lona agaga paia, lea e fesoasoani iā i tatou ina ia onosaʻi ai ma maua pea le olioli. (Kala. 5:22; Kolo. 1:11) Ae e faapefea pe afai e te fesagaʻia teteega? Ia maufaatuatuaina atoatoa Ieova ma aua neʻi atuatuvale. E faaauau pea ona lagolagoina ma faamalosia oe e Ieova.—Epe. 13:6.

E FESOASOANI AGELU E TAUSISIA LE MAMĀ O LE FAAPOTOPOTOGA

13. O le ā le tofiga faapitoa o loo faia e agelu i aso e gata ai? (Mataio 13:​47-49)

¹³ Ua tuuina atu e Ieova i agelu se tofiga faapitoa i nei aso e gata ai. (Faitau le Mataio 13:​47-49.) E faitau miliona tagata mai i vaipanoa eseese o le lalolagi ua talia le feʻau o le tala lelei. Ua faia e nisi o i latou suiga ina ia avea ai ma Kerisiano moni, ae o isi e latou te lē o faia faapea. Ua tofia agelu e “tuueseese tagata amioleaga mai i tagata amiotonu.” O lona uiga, ua tofia i latou e tausisia le mamā o le faapotopotoga. Peitaʻi, e lē faapea ai e lē mafai ona toe foʻi mai i latou ua tuua le faapotopotoga, pe faapea ai foʻi o le a leai lava ni faafitauli i le faapotopotoga. E mautinoa o loo galulue mamafa agelu e tausisia le mamā o faapotopotoga.

14-15. E faapefea ona tatou faaaʻoaʻo i le manatu mamafa o agelu, e tausisia le mamā o le faapotopotoga i le itu tauamio ma le itu faaleagaga? (Tagaʻi foʻi i ata.)

¹⁴ E faapefea ona tatou faaaʻoaʻo i le manatu mamafa o agelu e tausisia le mamā o le faapotopotoga? E ala i lo tatou saosaolaumea e faatumauina le mamā o le faapotopotoga, i le itu tauamio ma le itu faaleagaga. O lea, e tatau ona tatou taumafai malosi e leoleoina o tatou loto, e ala i le filifili lelei o uō ma teena so o se mea e faaleagaina ai i tatou. (Sala. 101:3) E mafai foʻi ona tatou fesoasoani i o tatou uso ma tuafāfine ia tumau faamaoni iā Ieova. O se faaaʻoaʻoga, o le ā e tatou te faia pe afai ua tatou iloa na faia e se uso po o se tuafafine se agasala matuiā? O lo tatou alofa iā te ia, e tatou te faalaeiau ai o ia e talanoa atu i toeaina. Pe a ia lē faia faapea, e manaʻomia la ona tatou faailoa atu i toeaina le mataupu. E tatou te mananaʻo ia vave ona maua e se uso po o se tuafafine ua vaivai faaleagaga le fesoasoani.—Iako. 5:​14, 15.

¹⁵ E mautinoa e tatou te faanoanoa pe a aveesea mai i le faapotopotoga se tasi ona ua ia faia se agasala matuiā. Pe a aveesea la se tasi, “aua le toe faifaimea faatasi” ma i latou.d (1 Kori. 5:​9-13) Ua fesoasoani lenei faatulagaga e faatumauina ai pea le mamā o le faapotopotoga. E lē gata i lea, pe a tatou filifili e lē toe faifaimea faatasi ma i latou ua aveesea, e tusa lenā ua tatou faaalia i ai le agalelei. O lo tatou maumauaʻi e faia le mea saʻo, e ono uunaʻia ai i latou e toe foʻi mai iā Ieova. Pe a latou faia faapea, e lē gata o le a tatou olioli, ae o le a olioli foʻi Ieova ma ana agelu.—Luka 15:7.

16. O ā vala o le a e taumafai malosi ai e faaaʻoaʻo i agelu?

¹⁶ O se faaeaga le faataga o i tatou e Ieova e aʻoaʻo e faatatau i agelu, ma galulue faatasi ma i latou! O lea, ia tatou faaaʻoaʻo i o latou uiga lelei, e pei o le lotomaulalo, alofa i tagata, tumau, ma le manatu mamafa e tausisia le mamā o le faapotopotoga, i le itu tauamio ma le itu faaleagaga. Pe a tatou faaaʻoaʻo i agelu faamaoni, o le a avea foʻi i tatou ma vaega o le ʻauaiga o tagata tapuaʻi o Ieova e faavavau.