Ia Talia ma le Lotomaulalo e Gata Mai lo Tatou Iloa

1. O ā tomai na tuu e Ieova iā i tatou, ma aiseā?

NA FOAFOAINA i tatou e Ieova ma le tomai e mafaufau ai, aʻoaʻoina mea fou, ia malamalama, ma iloa le auala e faatatau ai. Aiseā na ia foafoaina ai i tatou i lenā auala? Talu ai e finagalo ia tatou “maua . . . le poto i le Atua” ma auauna iā te ia ma le mafaufau lelei.—Faata. 2:​1-5; Roma 12:1.

2. (a) O le ā e tatau ona tatou iloa e faatatau iā i tatou lava? (Iopu 37:​23, 24) (Tagaʻi foʻi i le ata.) (e) O ā aogā o lo tatou lotomaulalo e talia e iai le mea e gata mai ai lo tatou iloa?

² E ui e mafai ona tatou aʻoaʻoina le tele o mea, ae e iai lava mea e gata ai lo tatou iloa. (Faitau le Iopu 37:​23, 24.) Seʻi mātau le faaaʻoaʻoga a Iopu. Na fesiligia o ia e Ieova i le tele o fesili, ma ia iloa ai le tele o mea e na te lē o iloa. O lenā mea na fesoasoani iā te ia e faaalia ai le lotomaulalo ma faasaʻo ona manatu. (Iopu 42:​3-6) E mafai foʻi ona tatou maua aogā, pe a tatou lotomaulalo e talia e iai le mea e gata mai ai lo tatou iloa. O lenā lotomaulalo e uunaʻia ai i tatou e maufaatuatuaina Ieova, o le a ia faailoa mai mea e manaʻomia moni ona tatou iloa ina ia faia ai ni filifiliga atamai.—Faata. 2:6.

3. O le ā o le a tatou talanoaina i lenei suʻesuʻega?

³ I lenei suʻesuʻega, o le a tatou talanoaina ai nisi o mea e tatou te lē o iloa, ma luʻi e tatou te ono fesagaʻia ai. O le a tatou talanoaina foʻi po o le ā le māfuaaga e lelei ai lo tatou lē iloaina o nisi o mea. O le iloiloina o na manatu, o le a faamalosia ai lo tatou maufaatuatuaina o Ieova o “Lē e atoatoa lona poto,” e na te faailoa mai mea e manaʻomia moni ona tatou iloa.—Iopu 37:16.

E TATOU TE LĒ ILOA LE TAIMI E OO MAI AI LE IʻUGA

4. E tusa ai o le Mataio 24:​36, o le ā se mea e tatou te lē o iloa?

⁴ Faitau le Mataio 24:36. E tatou te lē iloa po o le ā le taimi e oo mai ai le iʻuga o lenei faiga o mea. E oo lava iā Iesu a o iai i le lalolagi, e na te leʻi iloa “lea aso ma lea itula.”a Mulimuli ane na ia faapea atu i ona aposetolo, ua tuu e le Tausi Taimi Sili o Ieova “i lana lava pule” le taimi e faataunuuina ai nisi o mea. (Galu. 1:​6, 7) Ua uma ona faatulaga e Ieova le taimi e oo mai ai le iʻuga o lenei faiga o mea, ma e leai sa tatou aiā e iloa ai le taimi tonu e tupu ai lenā mea.

5. Atonu o ā ni aafiaga o lo tatou lē iloa o le taimi tonu e oo mai ai le iʻuga?

⁵ Pe a fua i le fetalaiga a Iesu, e tatou te lē iloa po o le ā le umi e tatou te faatalitali ai ona oo mai lea o le iʻuga. O lea, e tatou te ono lagona ai le lē onosaʻi ma le lotovaivai, aemaise pe afai ua umi se taimi o tatou faatalitali mo le aso o Ieova. Pe atonu foʻi ua faigatā ona tatou onosaia tauemuga mai i o tatou tauaiga ma isi. (2 Pete. 3:​3, 4) E tatou te ono manatu, pe afai e tatou te iloa tonu le aso e oo mai ai le iʻuga, o le a faigofie la ona tatou tumau ma onosaia tauemuga.

6. Aiseā e lelei ai lo tatou lē iloaina o le taimi e oo mai ai le iʻuga?

⁶ O le mea moni, o le lē faailoaina mai e Ieova o le aso e oo mai ai le iʻuga, ua ia tuu mai ai le avanoa e faailoa atu ai e tatou te auauna atu iā te ia, ona e tatou te alolofa ma maufaatuatuaina o ia. E tatou te auauna iā Ieova e oo i le faavavau, ae e lē seʻia oo mai le iʻuga. Nai lo o le soona uaʻi atu i le taimi e oo mai ai “le aso o Ieova,” e tatau ona uaʻi atu i mea o le a faataunuuina i lenā aso. O le faia faapea, o le a faamalosia ai lo tatou faamaoni iā Ieova, ma tatou faia ai mea uma ina ia faafiafia ai o ia.—2 Pete. 3:​11, 12.

7. O ā mea ua tatou iloa?

⁷ E tāua ona tatou uaʻi atu i mea ua tatou iloa. O se faataʻitaʻiga, ua tatou iloa na amata mai aso e gata ai i le 1914. Ua saunia mai e Ieova valoaga o le Tusi Paia e faamaonia ai na amata aso e gata ai i le 1914, faapea faamatalaga auʻiliʻili o mea na tutupu talu mai lenā tausaga. O le iʻuga, ua tatou mautinoa ai ua “latalata mai le aso tele o Ieova.” (Sefa. 1:14) Ua tatou iloa foʻi le galuega ua finagalo Ieova e tatou te faia, o le taʻu atu lea i le toʻatele e mafai ai e faatatau i le “tala lelei o le Malo.” (Mata. 24:14) Ua folafolaina atu lenei feʻau i atunuu e pe ā ma le 240, ma i le silia i le 1,000 gagana. E lē manaʻomia ona tatou iloa tonu “lea aso ma lea itula,” ina ia faia ai so tatou sao maelega i lenei galuega tāua.

E TATOU TE LĒ ILOA AUALA E ONO GAOIOI AI IEOVA

8. O le ā e tatou te aʻoaʻo mai i le Failauga 11:5?

⁸ Faitau le Failauga 11:5. Ua tatou aʻoaʻoina mai i lenei mau, e lē o taimi uma e tatou te iloa ai gaoioiga po o “galuega a le Atua moni.” E tatou te lē malamalama foʻi po o ā mea e na te faatagaina e tutupu, ina ia faataunuu ai lona finagalo. O lea, e tatou te lē iloa tonu pe aiseā e ono faataga ai e Ieova se mea e tupu, po o se auala patino foʻi e gaoioi ai o ia e fesoasoani mai iā i tatou. (Sala. 37:5) E lē mafai ona tatou malamalama atoatoa i na mea, e pei lava ona lē mafai ona tatou malamalama i le auala e tuputupu aʻe ai se pepe i le manava o se tinā, o se mea e lē o malamalama atoatoa ai foʻi saienitisi.

9. O ā ni luʻi e tatou te fesagaʻia, ona e tatou te lē iloa tonu auala e ono gaoioi ai Ieova e fesoasoani mai?

⁹ O lo tatou lē iloaina o le auala tonu e gaoioi ai Ieova e fesoasoani mai, e tatou te ono faatalatū ai e faia ni filifiliga patino. E tatou te ono faatalatū e faia faataulaga ina ia faalautele atu la tatou faiva, e pei o le faafaigofie o o tatou olaga pe siitia atu i se vaipanoa o loo tele ai le manaʻoga mo tagata talaʻi. E tatou te ono taumānatu foʻi po o tatou maua le finagalo malie o le Atua, pe afai e tatou te lē ausia ni sini faaleagaga, leai ni iʻuga lelei o a tatou galuega fitā i le faiva, pe feagai foʻi ma faigatā i se poloketi o le auaunaga o loo tatou galulue ai.

10. O ā nisi o uiga tāua e mafai ona tatou atiaʻe ona o lo tatou lē iloa o auala e gaoioi ai Ieova e fesoasoani mai?

¹⁰ O lo tatou lē iloa o auala e gaoioi ai Ieova e fesoasoani mai, e mafai ona tatou atiaʻe ai uiga e pei o le lotomaulalo ma le amanaʻia o le mea e gata ai lo tatou iloa. O le a tatou iloa ai e sili atu ona maualuga manatu ma ala o Ieova nai lo o i tatou. (Isa. 55:​8, 9) O le a atili ai ona tatou maufaatuatuaina Ieova, ma faalagolago i lana fesoasoani ina ia taulau manuia ai. O le a tatou avatu ai foʻi iā Ieova le viiga pe a iai ni iʻuga lelei o la tatou faiva, po o se poloketi o loo tatou galulue ai. (Sala. 127:1; 1 Kori. 3:7) Ae pe a lē taunuu foʻi mea e pei ona tatou faatalitalia, e tatau ona tatou manatua o loo silafia e Ieova mea uma. (Isa. 26:12) E tatou te faia mea e mafai ona tatou faia, ma maufaatuatuaina pea o le a gaoioi Ieova e fesoasoani mai. E tatou te mautinoa o le a ia saunia mai le taʻitaʻiga e tatou te manaʻomia, e tusa pe e lē i se auala mataʻina e pei ona ia faia i nisi o taimi i aso ua mavae.—Galu. 16:​6-10.

11. O ā mea ua tatou iloa lea e fesoasoani iā i tatou?

¹¹ Ua tatou iloa o Ieova o se Atua e alofa, faamasinotonu ma atamai. E tatou te iloa e matuā tāua iā te ia mea o loo tatou faia mo ia ma o tatou uso talitonu. E tatou te iloa foʻi e na te tauia i latou e faamaoni iā te ia.—Epe. 11:6.

E TATOU TE LĒ ILOA LE MEA E TUPU TAEAO

12. E tusa ai o le Iakopo 4:​13, 14, o ā mea e tatou te lē iloa?

¹² Faitau le Iakopo 4:​13, 14. O le mea moni, e tatou te lē iloa po o le ā le mea e tupu iā i tatou a taeao. I lenei faiga o mea, “e tutupu faafuaseʻi mea . . . i le taimi e leʻi faatalitalia.” (Fai. 9:11) O le iʻuga, e tatou te lē māiloa pe e taunuu a tatou fuafuaga, pe maua foʻi le ola ma le malosi e faataunuu ai na fuafuaga.

13. O ā aafiaga o lo tatou lē māiloa o mea o le a tutupu?

¹³ O se luʻi lo tatou lē māiloa o mea o le a tutupu iā i tatou. Aiseā? O le soona popole i se mea e ono tupu, e iʻu ina mou ese ai lo tatou fiafia. O faalavelave ma mea e tutupu faafuaseʻi, e tatou te ono lagona ai le mafatia ma le lē fiafia. Pe a lē taunuu foʻi se mea na tatou faamoemoe i ai, e ono oo ai iā i tatou le faanoanoa ma le lotovaivai.—Faata. 13:12.

14. O le ā e faalagolago i ai lo tatou mauaina o le fiafia e tumau? (Tagaʻi foʻi i ata.)

¹⁴ Pe a tatou tumau e ui i faigatā, e faamaonia atu ai e tusa lava po o ā mea e tutupu, ae e tatou te auauna i lo tatou Tamā i le lagi ona o le alofa, ae e lē o ni faanaunauga manatu faapito. Ua tatou iloa mai i tala o le Tusi Paia, e lē tatau ona tatou faatalitalia e puipuia e Ieova i tatou mai i faafitauli uma, ma e na te lē tuupōina mea e tutupu i o tatou olaga. E na te silafia, e lē faalagolago lo tatou mauaina o le fiafia i lo tatou iloaina o mea o le a tutupu, ae e faalagolago i le saʻilia o lana taʻitaʻiga ma usiusitaʻi iā te ia. (Iere. 10:23) O lo tatou saʻili atu mo lana taʻitaʻiga pe a faia filifiliga, e tai pei lenā ua tatou faapea atu: “Pe a finagalo i ai Ieova, o le a tatou maua le ola, ma faia ai lea mea ma lea mea.”—Iako. 4:15.

15. O le ā ua tatou iloa e faatatau i le lumanaʻi?

¹⁵ E ui e tatou te lē iloa mea o le a tutupu i lea aso ma lea aso, ae ua tatou iloa ua folafola mai e Ieova le ola e faavavau, a lē i le lagi po o le lalolagi. Ua tatou iloa e lē mafai ona tala pepelo o ia, ma e leai se mea e mafai ona taofia o ia mai i le faataunuuina o ana folafolaga uma. (Tito 1:2) E na o ia lava e mafai ona “taʻu mai talu mai le amataga le iʻuga, ma taʻu mai foʻi talu mai aso anamuā mea e leʻi faia.” E tatou te iloa le moni o lenā manatu i mea na tutupu i taimi ua mavae, ma e faapena foʻi i mea o le a tutupu i le lumanaʻi. (Isa. 46:10) E tatou te mautinoa e leai se mea e mafai ona taofia le alofa o Ieova iā i tatou. (Roma 8:​35-39) O le a foaʻi mai e Ieova le atamai, faamāfanafanaga, ma le malosi e tatou te manaʻomia, ina ia onosaia ai so o se tulaga faigatā e tatou te ono fesagaʻia. E tatou te mautinoa o le a fesoasoani ma faamanuia i tatou e Ieova.—Iere. 17:​7, 8.

E SILI ATU ONA SILAFIA E IEOVA I TATOU NAI LO O I TATOU LAVA

16. E pei ona faaalia i le Salamo 139:​1-6, o ā mea o loo silafia e Ieova lea e lē mafai ona tatou malamalama i ai?

¹⁶ Faitau le Salamo 139:​1-6. E silafia e Lē na Foafoaina i tatou, le auala na faia ai i tatou, faapea mea na tutupu i le olaga lea e aafia ai i tatou i le itu i le tino, faalogona ma le mafaufau. E naunau mai o ia iā i tatou i taimi uma. E na te silafia a tatou tala ma le uiga moni o a tatou faamatalaga, faapea mea e tatou te faia ma le māfuaaga e faia ai faapea. Na taʻua e le tupu o Tavita, e nofosauni Ieova e tausia i tatou ma e fesoasoani mai. Maʻeu se faaeaga o le uaʻi mai iā i tatou o le Alii Pule Silisili Ese i le aoao o mea, o Lē na foafoaina le lagi ma le lalolagi! Na faapea mai Tavita: “Ua matuā maoaʻe lava, ua ou lē malamalama i ai.”—Sala. 139:6.

17. Aiseā e ono faigatā ai ona tatou talitonu e silafia lelei i tatou e Ieova?

¹⁷ E ono faigatā iā i tatou ona manatu iā Ieova o se Tamā alofa e naunau mai iā i tatou, ona atonu o o tatou talaaga, o aganuu, po o talitonuga foʻi sa iai. Pe atonu foʻi e tatou te manatu e taumamao Ieova mai iā i tatou, ona o le ogaoga o ni a tatou mea sesē na faia i le taimi ua teʻa. E oo lava iā Tavita na iai foʻi faalogona faapena. (Sala. 38:​18, 21) Pe atonu foʻi e taumānatu se tasi o loo taumafai e suia lona olaga, ina ia ōgatusa ma tapulaa amiotonu a Ieova: ʻPe afai e malamalama moni le Atua iā te aʻu, aiseā e na te faatalitalia ai aʻu e lafoaʻia se olaga e fetaui ma faalogona masani na ou ola aʻe ma aʻu?’

18. O ā aogā o le iloaina e sili atu ona silafia e Ieova i tatou nai lo o i tatou lava? (Tagaʻi foʻi i ata.)

¹⁸ O le mea moni, e sili atu ona silafia e Ieova i tatou nai lo o i tatou lava, ma o loo ia silafia mai se mea lelei iā i tatou lea atonu e tatou te lē o iloa. E alofa mai pea o ia e ui o loo ia silafia o tatou masei, ma e malamalama i o tatou faalogona ma le māfuaaga e tatou te faia ai se gaoioiga. (Roma 7:15) Pe a tatou talia le mea moni e uaʻi mai Ieova i mea lelei e mafai ona tatou faia, o le a atili faamalosia ai i tatou e auauna faamaoni iā te ia ma le fiafia.

19. O le ā ua tatou mautinoa i ai e faatatau iā Ieova?

¹⁹ O le mea mautinoa ua tatou iloa, o Ieova o le alofa lava ia. (1 Ioa. 4:8) Ua tatou iloa o ana tapulaa amiotonu ua atagia mai ai lona alofa, ma e manaʻo i le mea e sili ona lelei mo i tatou. Ua tatou iloa e finagalo Ieova ia tatou maua le ola e faavavau. Ina ia maua le ola e faavavau, ua ia saunia mai le togiola, ma o lenā meaalofa ua faamautinoa mai ai e mafai ona tatou taulau e ui i o tatou masei. (Roma 7:​24, 25) Ua tatou iloa foʻi “e sili atu le Atua i o tatou loto, e na te silafia foʻi mea uma lava.” (1 Ioa. 3:​19, 20) O loo silafia mai e Ieova mea uma e faatatau iā i tatou, ma e na te mautinoa e mafai ona tatou taulau i le faia o lona finagalo.

20. O le ā e fesoasoani iā i tatou e ʻalofia ai le soona popole?

²⁰ E lē o taofia e Ieova mai iā i tatou ni faamatalaga e manaʻomia moni ona tatou iloa. O lo tatou talia ma le lotomaulalo o lenā manatu, o le a tatou lē soona popole ai i faamatalaga e tatou te lē o iloa. Nai lo o lea, e ao ona tatou uaʻi atu i mataupu e sili ona tāua. O le faia faapea, e faaalia ai lo tatou maufaatuatuaina atoatoa o Ieova, “o Lē e atoatoa lona poto.” (Iopu 36:4) E ui e iai le mea e gata ai lo tatou iloa e faatatau i nisi o mataupu, ae e tatou te tulimataʻia le taimi o le a tatou aʻoaʻoina ai e faavavau le tele o mea e faatatau i lo tatou Atua Silisili.—Fai. 3:11.