Ia Fesoasoani i Tagata Aʻoga ia Filifili e Auauna iā Ieova

1-2. (a) Aiseā e ono faatalatū ai nisi tagata aʻoga o le Tusi Paia e avea o ni Molimau a Ieova? (e) O le ā o le a talanoaina i lenei suʻesuʻega?

PE NA e tau faatalatū e avea oe o se Molimau a Ieova? Atonu na e popole ina neʻi lē fiafia mai iā te oe i latou e tou te faigaluega faatasi, o au uō po o ou tauaiga. Pe na e mafaufau foʻi e lē mafai ona e ola e ōgatusa ma tapulaa a le Atua. Pe afai o lea, e te malamalama la i faalogona o tagata aʻoga o le Tusi Paia, atonu o loo faatalatū e avea o ni Molimau a Ieova.

² Na silafia e Iesu, o na ituaiga o popolega e faigofie ona taofia ai se tasi mai i le agaʻigaʻi i luma faaleagaga. (Mata. 13:​20-22) Peitaʻi, e leʻi faavaivai ai o ia i le fesoasoani atu iā i latou na faatalatū e mulimuli atu iā te ia. Nai lo o lea, o lana faaaʻoaʻoga ua tatou iloa ai auala e fesoasoani ai i a tatou tagata aʻoga, ina ia (1) iloa luʻi o loo faalavelavea ai lo latou agaʻigaʻi i luma, (2) faalolotoina lo latou alofa mo Ieova, (3) fetuunaʻi mea e faamuamua i le olaga, ma le (4) manumalo mai i teteega. E faapefea ona tatou faatatauina fautuaga a Iesu i ona soo, a o faaaogāina le tusi Se Olaga Fiafia e Faavavau! e fesoasoani ai i se tagata aʻoga o le Tusi Paia ina ia auauna iā Ieova?

FESOASOANI I LE TAGATA AʻOGA IA ILOA LUʻI O LOO FAALAVELAVEA AI LONA AGAʻIGAʻI I LUMA

3. O le ā atonu na taofia ai Nikotemo mai i le avea o se soo o Iesu?

³ Na feagai Nikotemo, o se taʻitaʻi lauiloa o Iutaia, ma se luʻi i le avea ai o se soo o Iesu. E pe ā na o le ono masina talu ona amata le faiva a Iesu, ae talitonu Nikotemo na auina mai Iesu e le Atua. (Ioa. 3:​1, 2) Peitaʻi, na manaʻo Nikotemo e feiloaʻi faalilolilo ma Iesu ʻona o le fefe i tagata Iutaia.’ (Ioa. 7:13; 12:42) Atonu na matuā popole ina neʻi aafia lona tulaga taualoa pe a avea ma soo o Iesu.a

4. Na faapefea ona fesoasoani Iesu iā Nikotemo ina ia malamalama i mea e faatalitalia e le Atua mai iā te ia?

⁴ Na iloa lelei e Nikotemo le Tulafono, ae na ia manaʻomia se fesoasoani ina ia malamalama ai i mea e faatalitalia e Ieova mai iā te ia. Na faapefea ona fesoasoani Iesu iā te ia? Na faataulaga e Iesu lona taimi, e ala i le lotomalie e feiloaʻi ma Nikotemo i le pō. Na faailoa manino atu foʻi e Iesu iā Nikotemo mea e manaʻomia ona ia faia, ina ia avea ai o se soo: ia salamō mai i ana agasala, papatisoina i le vai, ma faaalia le faatuatua i le Alo o le Atua.—Ioa. 3:​5, 14-21.

5. E faapefea ona fesoasoani i se tagata aʻoga o le Tusi Paia e iloa se mea o loo faalavelavea ai lona agaʻigaʻi i luma?

⁵ E tusa pe e malamalama lelei se tagata aʻoga i le Tusi Paia, ae atonu e na te manaʻomia le fesoasoani ina ia iloa ai mea o loo faalavelavea ai o ia mai i le agaʻigaʻi i luma. O se faataʻitaʻiga, atonu o lana galuega po o teteega mai i lona aiga ua faafaigatā ai ona ia ausia sini faaleagaga. O lea, ia faaavanoa atu lou taimi e fesoasoani ai i lau tagata aʻoga. E mafai ona e valaaulia o ia e lua te faiʻaiga faatasi pe savalivali foʻi. O taimi paganoa faapena, e mafai ona saʻoloto ai e faamatala mai ona faalogona ma luʻi o loo ia fesagaʻia. Ia faalaeiau lau tagata aʻoga e faia ni suiga manaʻomia ina ia faaalia ai lona alofa mo Ieova, ae e lē ina ia faafiafia ai oe.

6. E faapefea ona e fesoasoani i se tagata aʻoga ina ia maua le lototele e auauna ai iā Ieova? (1 Korinito 16:13)

⁶ Pe a mautinoa le tagata aʻoga o le a fesoasoani Ieova iā te ia ina ia ola e ōgatusa ma tapulaa o le Tusi Paia, o le a ia maua ai le lototele e faatatau ai mea o loo ia aʻoaʻoina. (Faitau le 1 Korinito 16:13.) E mafai ona faatusaina lau matafaioi i le faiaʻoga o se ʻautaalo. O se faiaʻoga lelei, e lē gata e na te aʻoaʻoina lana ʻau ina ia lelei le taaalo, ae e na te faamautinoa atu foʻi iā i latou e mafai ona latou manumalo. I se tulaga talitutusa, o se faiaʻoga lelei o le Tusi Paia, e lē gata e na te aʻoaʻo atu mea e faafinagaloina mai e le Atua, ae e na te faamautinoa atu foʻi i lana tagata aʻoga, e mafai ona ia faia ni suiga manaʻomia i lona olaga, e ala i le fesoasoani a Ieova. E faapefea ona e faia faapea?

FESOASOANI I LE TAGATA AʻOGA E FAALOLOTOINA LONA ALOFA MO IEOVA

7. Na faapefea ona fesoasoani Iesu i lana ʻaufaalogologo ina ia faalolotoina lo latou alofa mo Ieova?

⁷ Na silafia e Iesu, o le alofa i le Atua e uunaʻia ai ona soo e faatatau mea e latou te aʻoaʻoina. Na masani ona ia aʻoaʻo ona soo i mea e faalolotoina ai lo latou alofa i lo latou Tamā i le lagi. O se faaaʻoaʻoga, na ia faatusa Ieova i se tamā e na te avatu mea lelei i lana fanau. (Mata. 7:​9-11) O nisi o le ʻaufaalogologo a Iesu, atonu e leʻi ola aʻe i se aiga e iai se tamā e alofa. Seʻi faaata o latou faalogona ina ua faamatala e Iesu le talafaatusa i se tamā alofa, na ia talia ma le agalelei lona atalii na ola i se olaga fouvale. Na latou iloa ai le alofa faapelepele o Ieova i lana fanau i le lalolagi.—Luka 15:​20-24.

8. E faapefea ona e fesoasoani i lau tagata aʻoga e faalolotoina lona alofa mo Ieova?

⁸ E mafai foʻi ona e fesoasoani i lau tagata aʻoga e faalolotoina lona alofa mo Ieova, e ala i le faamatilatila o uiga o le Atua i taimi o a oulua suʻesuʻega. I lua suʻesuʻega taʻitasi, ia fesoasoani iā te ia e iloa le fesootaʻiga o mea o loo ia aʻoaʻoina ma le alofa o Ieova. Pe a talanoaina le taulaga togiola, ia fesoasoani iā te ia e iloa aogā patino o le togiola iā te ia. (Roma 5:8; 1 Ioa. 4:10) E mafai ona uunaʻia se tagata aʻoga e alofa iā Ieova, pe a manatunatu i le tele o le alofa o Ieova iā te ia.—Kala. 2:20.

9. O le ā na fesoasoani iā Michael e suia ai lona olaga?

⁹ Seʻi mātau le mea na tupu iā Michael mai i Indonesia. Na ola aʻe o ia i le upu moni ae e leʻi papatiso lava. I le 18 o ona tausaga, na maua ai sana galuega o se ave loli i se isi atunuu. Na toe foʻi o ia i Indonesia e faaipoipo, ae na mulimuli ane ia tuua lana avā ma lona afafine i inā, ae toe alu i se isi atunuu e faigaluega ai. I le taimi lea, na amata ai ona suʻesuʻeina le Tusi Paia e lana avā ma lona afafine ma agaʻigaʻi i luma. Ina ua maliu le tinā o Michael, na toe foʻi ai loa o ia e tausia lona tamā, ma malie ai e faia sana suʻesuʻega faale-Tusi Paia. Na matuā pāʻia le loto o Michael ina ua oo i le vaega “Saʻiliʻili Atili,” i le lesona 27 o le tusi Se Olaga Fiafia e Faavavau! Na maligi ona loimata ina ua manatunatu i le matuā ootia o faalogona o Ieova, a o silasila mai i le mafatia o lona alo. O i inā na amata ai ona ia matuā talisapaia le taulaga togiola, ma uunaʻia ai o ia e suia lona olaga ma papatisoina.

FESOASOANI I LAU TAGATA AʻOGA E FETUUNAʻI MEA E FAAMUAMUA

10. Na faapefea ona fesoasoani Iesu i ona soo ina ia fetuunaʻi mea e faamuamua i le olaga? (Luka 5:​5-11) (Tagaʻi foʻi i le ata.)

¹⁰ Na vave ona talitonu uluaʻi soo, o Iesu o le Mesia lea na folafolaina mai, ae na manaʻomia ona latou faia ni suiga ina ia faamuamua ai le galuega talaʻi. I le taimi na valaaulia ai e Iesu Peteru ma Aneterea e mulimuli atu iā te ia i le faiva faataimi atoa, ua fai sina umi talu ona avea i laʻua ma soo. (Mata. 4:​18, 19) E foliga mai na latou galulue faatasi ma Iakopo ma Ioane o ni faifaiva, ma na taulau manuia le latou pisinisi faifaiva. (Mare. 1:​16-20) Ina ua filifili Peteru ma Aneterea e “tuua . . . a la upega,” e mautinoa na la faia ni fuafuaga i le auala e tausia ai o la aiga, a o mulimuli atu iā Iesu. O le ā na uunaʻia ai i laʻua e toe fetuunaʻi mea e faamuamua i le olaga? O loo faamatala mai i le tusi o Luka, na faia e Iesu se vavega lea na faamautinoa atili atu ai iā i laʻua, e mafai e Ieova ona tausia o latou manaʻoga.—Faitau le Luka 5:​5-11.

11. E faapefea ona faaaogā mea na tutupu iā i tatou e faamalosia ai le faatuatua o a tatou tagata aʻoga?

¹¹ E ui e lē mafai ona tatou faia ni vavega e pei o Iesu, ae e mafai ona tatou faamatala atu le auala e tausia ai e Ieova i latou e faamuamua o Ia i o latou olaga. O se faataʻitaʻiga, pe e te manatua le auala na fesoasoani ai Ieova iā te oe ina ua amata ona e auai i sauniga? Atonu na manaʻomia ona e talanoa atu i lou pule ma faamatala i ai, e lē mafai ona e toe galue ovataimi pe afai e misi ai au sauniga. A o e faasoa atu i lau tagata aʻoga mea na tutupu iā te oe, ia faamatala atu foʻi le auala na faamalosia ai lou faatuatua, ina ua e vaaia le faamanuia a Ieova i lau filifiliga e faamuamua le tapuaʻiga iā te ia.

12. (a) O ā aogā o le valaaulia o tagata talaʻi eseese i a tatou suʻesuʻega faale-Tusi Paia? (e) E faapefea ona e faaaogā vitiō e aʻoaʻo atu ai se manatu tāua i lau tagata aʻoga? Aumai se faataʻitaʻiga.

¹² O se mea lelei foʻi i lau tagata aʻoga le faalogo i isi uso ma tuafāfine, a o faamatala mai auala na latou faia ai fetuunaʻiga o mea e faamuamua i o latou olaga. O lea, ia valaaulia tagata talaʻi eseese ina ia auai i la oulua suʻesuʻega faale-Tusi Paia. Ia talosaga atu iā i latou e faamatala pe na faapefea ona latou maua le upu moni, ma o ā mea na latou faia ina ia faamuamua ai le auaunaga iā Ieova. E lē gata i lea, ia faaalu se taimi e te lua matamata ai ma lau tagata aʻoga i vitiō o loo i le tusi Se Olaga Fiafia e Faavavau! i le vaega “Saʻiliʻili Atili,” po o se vitiō mai i le vaega “Manatu Faaopoopo” pe a talafeagai. O se faataʻitaʻiga, pe a talanoaina le lesona 37, e mafai ona e faamatilatila mataupu silisili mai i le vitiō O le a Tausia e Ieova o Tatou Manaʻoga.

FESOASOANI I LAU TAGATA AʻOGA E MANUMALO I TETEEGA

13. Na faapefea ona sauniunia e Iesu ona soo mo teteega?

¹³ Na masani ona taʻu atu e Iesu i ona soo o le a latou fesagaʻia teteega mai i isi, e oo lava i o latou tauaiga. (Mata. 5:11; 10:​22, 36) A o lata i le faaiʻuga o le faiva a Iesu, na ia lapataʻia ona soo e ono fasiotia i latou. (Mata. 24:9; Ioa. 15:20; 16:2) Na ia apoapoaʻi atu iā i latou ina ia faaeteete a o faia la latou faiva. Na ia fautuaina i latou ia aua neʻi finau ma ē e tetee mai, ma e manaʻomia ona faaalia le faautauta ina ia mafai ai pea ona talaʻi atu.

14. E faapefea ona sauniunia a tatou tagata aʻoga mo teteega? (2 Timoteo 3:12)

¹⁴ E mafai ona sauniunia la tatou tagata aʻoga mo teteega, e ala i le faamatala i ai o tala e na te ono faatalitalia mai i ana uō, o ē e faigaluega faatasi, ma tauaiga. (Faitau le 2 Timoteo 3:12.) Atonu e ulagia o ia i le galuega ona o suiga ua ia faia i lona olaga. E oo lava i ona tauaiga vavalalata, e latou te ono tauemua ona talitonuga e faavae i le Tusi Paia. O le vave lava e tatou te sauniunia ai a tatou tagata aʻoga e fesagaʻia teteega, o le faigofie foʻi lenā ona latou iloa o le auala e tali atu ai.

15. O le ā e fesoasoani i se tagata aʻoga e onosaia ai teteega mai i ona tauaiga?

¹⁵ Pe a talanoa e faatatau i teteega mai i tauaiga, ia faalaeiau lau tagata aʻoga ia mafaufau i māfuaaga e ono lē fiafia ai ona tauaiga. Atonu e latou te mafaufau ua faasesēina o ia, pe e pau lava e latou te lē fiafia i Molimau a Ieova. E oo lava iā Iesu, na ia feagai ma teteega mai i ē e pele iā te ia. (Mare. 3:21; Ioa. 7:5) O lea, ia fesoasoani i lau tagata aʻoga ia onosaʻi pea ma faaalia le faautauta i isi, e oo lava i ona tauaiga.

16. E faapefea ona tatou fesoasoani i se tagata aʻoga e faasoa atu ona talitonuga i se auala faautauta?

¹⁶ E tusa foʻi pe fia talanoa sona tauaiga i le Tusi Paia, ae o se mea atamai i le tagata aʻoga le lē faamatalaina atu o mea uma i le taimi e tasi, ina neʻi fiu ai lona tauaiga ma lē toe fia talanoa ai. O lea, ia faalaeiau lau tagata aʻoga e faasoa atu ona talitonuga i se auala faigofie ma puupuu, ina ia faaosofia ai le toe fia talanoa o lona tauaiga i se isi taimi. (Kolo. 4:6) Atonu e mafai foʻi ona ia faasino i ai le jw.org, ina ia mafai ai ona latou aʻoaʻo atili e faatatau i Molimau a Ieova i se taimi e fetaui ma i latou.

17. E faapefea ona e fesoasoani i le tagata aʻoga ina ia iloa tali atu i fesili e faatatau i Molimau a Ieova? (Tagaʻi foʻi i le ata.)

¹⁷ E mafai foʻi ona e faaaogā le faasologa o mataupu “Fesili e Masani Ona Lāgā e Faatatau i Molimau a Ieova” o loo i le jw.org, ina ia fesoasoani ai i lau tagata aʻoga e iloa ni tali faigofie e fai atu, pe a fesiligia o ia e ona tauaiga ma ē e latou te faigaluega. (2 Timo. 2:​24, 25) Pe a uma lesona taʻitasi, ia talatalanoa i le vaega “Ua Faapea Mai Nisi” lea o loo i le tusi Se Olaga Fiafia e Faavavau! Ia faalaeiau lau tagata aʻoga e faataʻitaʻi ni ana tali e fai atu i ana lava upu. Aua e te faatalatū e avatu ni fautuaga e faaleleia atili ai ana tali. O na faataʻitaʻiga o le a fesoasoani iā te ia e faamatala atu ai ma le mautinoa ona talitonuga.

18. E faapefea ona e faalaeiau se tagata aʻoga e faasoa atu ona talitonuga i le talaʻiga? (Mataio 10:27)

¹⁸ Na faatonu e Iesu ona soo ina ia faalauiloa atu i le lautele le tala lelei. (Faitau le Mataio 10:27.) O le vave lava e faailoa atu ai e le tagata aʻoga ona talitonuga i isi, o le vave foʻi lenā ona ia iloa o le tāua o le faalagolago iā Ieova. E faapefea ona e fesoasoani i le tagata aʻoga ina ia ausia lenā sini? Pe a faasilasila i le faapotopotoga se tauiviga, ia faalaeiau lau tagata aʻoga e aapa atu ina ia avea o se tagata talaʻi. Ia faamatala i ai le māfuaaga e faigofie ai i le toʻatele le amata talaʻi i taimi o tauiviga. E mafai foʻi ona e faalaeiau lau tagata aʻoga ina ia aapa atu e fai sana lauga i le sauniga amata o le vaiaso, ina ia toleni ai o ia e faasoa atu ma le mautinoa ona talitonuga i isi.

IA FAAALIA ATU E TE MAUFAATUATUAINA LAU TAGATA AʻOGA

19. Na faapefea ona faaalia e Iesu lona maufaatuatuaina o ona soo, ma e faapefea ona tatou faaaʻoaʻo iā te ia?

¹⁹ A o leʻi afio aʻe Iesu i le lagi, na ia fetalai atu i ona soo o le a latou toe faatasi. E latou te leʻi malamalama na uiga atu Iesu i lo latou faatasi ma ia i le lagi. Peitaʻi, na maufaatuatuaina e Iesu ona soo o le a latou faafiafiaina le finagalo o lona Tamā, e ui e latou te leʻi malamalama lelei. (Ioa. 14:​1-5, 8) Na ia silafia lelei na latou manaʻomia sina taimi e malamalama ai i nisi o mea, e pei o lo latou faamoemoe i le lagi. (Ioa. 16:12) E tatou te faaalia foʻi le maufaatuatuaina o a tatou tagata aʻoga, e ala i le uaʻi i lo latou faanaunauga e faafiafia Ieova.

20. Na faapefea ona faaalia e se tuafafine mai Malawi lona maufaatuatuaina o lana tagata aʻoga?

²⁰ Ia tatou maufaatuatuaina o loo mananaʻo a tatou tagata aʻoga e faia le mea saʻo. O se faaaʻoaʻoga, na suʻesuʻe le tuafafine o Saib mai i Malawi ma se fafine Katoliko e igoa iā Alina, e faaaogā ai le tusi Se Olaga Fiafia e Faavavau! Ina ua uma ona la talanoaina le lesona 14, na fesili atu Sai iā Alina po o le ā sona manatu i le faaaogāina o faatusa mo tapuaʻiga. Na lē fiafia Alina ma faapea mai: “O le mea lenā e pule ai lava aʻu.” Atonu na mafaufau Sai o le a lē toe manaʻo Alina e faaauau le la suʻesuʻega. Peitaʻi, na onosaʻi pea Sai e fai le suʻesuʻega ma le faamoemoe o le a iai se aso e malamalama ai Alina, e sesē le faaaogāina o faatusa. I nai masina mulimuli ane ai, na fai atu ai e Sai le fesili o loo i le lesona 34: “Ua faapefea ona e maua aogā i lou suʻesuʻeina o le Tusi Paia, ma le iloaina o le Atua moni o Ieova?” Na faapea mai Alina, e tele manatu lelei na ia aʻoaʻoina, e pei o le lē auai lea o Molimau a Ieova i faiga e taʻusalaina e le Tusi Paia. E leʻi umi ae lē toe faaaogāina e Alina faatusa, ma agavaa ai mo le papatisoga.

21. E faapefea ona fesoasoani i a tatou tagata aʻoga ina ia faamalosia lo latou faanaunauga e auauna iā Ieova?

²¹ E ui o Ieova “o lē e na te faatupuina,” ae e faia foʻi lo tatou sao e fesoasoani i le tagata aʻoga ina ia agaʻigaʻi i luma. (1 Kori. 3:7) E lē lava le tau ina aʻoaʻo o ia i mea e faafinagaloina e Ieova, ae ia fesoasoani foʻi i le tagata aʻoga e atiaʻe le alofa loloto mo Ia. E tatou te faalaeiauina o ia e faaalia lona alofa mo Ieova, e ala i le fetuunaʻi o mea e faamuamua i le olaga. E tatou te aʻoaʻo o ia e faalagolago iā Ieova a o feagai ma teteega. Pe a iloa mai e le tagata aʻoga lo tatou maufaatuatuaina o ia, o le a fesoasoani lenā iā te ia e maua ai le malosi e ola e ōgatusa ma tapulaa a Ieova, ma faamalosia ai lona faanaunauga e auauna pea iā te Ia.