“E iā Ieova le Taua”

I le 1999, na faatonu ai e le malo o Falani le totogi atu e Molimau a Ieova o lafoga mo so o se foaʻi tauofo na tuuina atu i le tatou lālā i Falani, mai i le tausaga 1993 e oo i le 1996. Na tatou tuuina atu le mataupu i le Faamasinoga a Falani, ae e leʻi manuia. E leʻi manuia foʻi a tatou taumafaiga ina ua toe apili le faaiʻuga, ma na aveese faamalosi ai loa e le malo o Falani le silia i le fā ma le ʻafa miliona tālā Europa ($6,300,000 tālā Amerika), mai i le teugātupe a lo tatou lālā i Falani. Na pau lo tatou faamoemoega na iai, o le ave loa o le mataupu i le Faamasinoga o Aiā Tatau a Tagata i Europa. Peitaʻi, na faatonu e le Faamasinoga le faia o sa tatou feiloaʻiga ma lōia a le malo ma se sui o le faamasinoga, ina ia soālaupule muamua le mataupu pe mafai ona faia sa tatou maliega, a o leʻi avatu i luma o le faamasinoga.

Na matou faatalitalia o le a faamalosia i matou e le sui o le faamasinoga, ina ia totogi atu se vaegātupe i le malo o Falani. Ae na matou iloa foʻi, e tusa pe totogi atu na o se vaega, e matuā feteenaʻi lava ma mataupu silisili o le Tusi Paia. O foaʻi a uso ma tuafāfine e fesoasoani e lagolagoina ai manaʻoga o le Malo o le Atua, ae lē o faigāmalo a tagata. (Mata. 22:21) Peitaʻi, na matou auai pea i lenā feiloaʻiga ona o lo matou faaaloalo i le faatonuga a le Faamasinoga.

Na faia la matou feiloaʻiga i se tasi o potu o le fale faamasino. Na amata leaga lava le matou feiloaʻiga ina ua fai mai le sui o le faamasinoga, e tatau ona totogi e Molimau a Ieova lafoga i le malo o Falani. Na faafuaseʻi lava ona matou fesili atu: “Pe e te silafia ua uma ona aveese faamalosi e le malo o Falani, le silia ma le fā ma le ʻafa miliona tālā Europa mai i la matou teugātupe?”

Na faateʻia le sui o le faamasinoga, ona e na te leʻi iloa le mea na faia e le malo o Falani. Ina ua faamautinoa mai e lōia a le malo o le mea lenā na latou faia, na matuā lē fiafia o ia ma ia otegia ai i latou ma faamuta loa le feiloaʻiga. O i inā na ou iloa ai, ua faalaa mai Ieova e fesoasoani ina ia matou manumalo i se auala e matou te leʻi faatalitalia. Na matou matuā fiafia ina ua matou tuua lenā feiloaʻiga.

Iā Iuni 30, 2011, na autasi ai faamasino uma o le Faamasinoga o Aiā Tatau ina ia faalēaogā lo tatou totogiina o lafoga. Na latou faatonu foʻi le malo o Falani e toe totogi mai tupe na latou aveesea faamalosi, ma faaopoopo i ai se tupe faasili. O loo aogā pea lenā faaiʻuga i le puipuia o le tapuaʻiga moni i Falani e oo mai i aso nei. E ui e leʻi fuafuaina la matou fesili na fai atu i le sui o le faamasinoga, ae na pei lenā fesili o le maa na tau tonu i le muāulu o Koliata, ona na suia ai le iʻuga o le faamasinoga. E pei o upu a Tavita iā Koliata, na māfua ona matou manumalo ona “e iā Ieova le taua.”—1 Samu. 17:​45-47.

Peitaʻi, e lē na o le pau lea o se faamasinoga ua manumalo ai Molimau a Ieova. E ui i teteega mai faigāmalo ma lotu, ae e 1,225 faamasinoga ua tatou manumalo ai i faamasinoga maualuluga a atunuu e 70 ma isi faamasinoga faavaomalo. Ua fesoasoani na faamasinoga e puipuia ai a tatou aiā tatau, e pei o le aiā tatau e faatulafonoina ai le avea o i tatou o se tapuaʻiga, talaʻi atu i le lautele, teena tuigātoto ma lē auai i sauniga faalotonuu.

O le ā le māfuaaga na faia ai saʻu vaega i se mataupu faafaamasinoga i Europa, ae o loo oʻu auauna i le ofisa ulu o Molimau a Ieova i Niu Ioka, i Amerika?

TAUSIA E NI MĀTUA MAELEGA

Na faauu oʻu mātua o George ma Lucille mai i le vasega lona 12 o le Aʻoga i Kiliata, ma na auauna i Aitiope i le taimi na ou fanau ai i le 1956. Na la faaigoa aʻu iā Philip, ona o Filipo le faievagelia mai i le uluaʻi senituri. (Galu. 21:8) I le tausaga na sosoo ai, na faasā ai e le faigāmalo le tapuaʻiga a Molimau a Ieova. E ui na ou laʻitiiti, ae ou te manatua lelei le faia faalilolilo o a matou tapuaʻiga, ma na ou faapea lava aʻu o se mea lelei. Ae o le mea e faanoanoa ai, na aveesea faamalosi i matou mai i le atunuu i le 1960.

Ina ua siitia atu lo matou aiga i Kansas i Amerika, na faaauau pea ona faaalia e oʻu mātua le maelega e pei o le taimi sa avea ai ma misionare. Na la ola e ōgatusa ma le upu moni, ma na la totōina fatu o le upu moni iā i matou ma loʻu tuafafine matua o Judy ma loʻu uso laʻitiiti o Leslie, lea na fananau foʻi i Aitiope. Na ou papatiso i le 13 o oʻu tausaga, ma i le tolu tausaga mulimuli ane ai, na siitia atu ai lo matou aiga i Peru i le mea e tele ai le manaʻoga.

I le 1974 ina ua 18 oʻu tausaga, na tofia ai e le lālā i Peru i matou ma isi uso e toʻafā e avea o ni paeonia faapito. Na tatau ona matou talaʻi i vaipanoa e leʻi talaʻia muamua i atumauga o Andes, lea e aofia ai ma tagata e tautatala i le gagana Quechua ma le gagana Aymara. Na matou feoaʻi i se taavale sa feaveaʻi ai se tamaʻi fale na matou nonofo ai. Na matou faaigoaina o le Vaa o Noa ona o ona foliga e pei o se pusa. Ou te manatua loʻu fiafia e faaaogā le Tusi Paia e faailoa atu ai i tagata, ua toeitiiti lava ona aveesea lea e Ieova o le mativa, maʻi ma le oti, ma e toʻatele na taliaina le feʻau o le Malo.—Faaa. 21:​3, 4.

AUAUNA I LE OFISA ULU

I le 1977 ina ua asiasi mai i Peru le uso o Albert Schroeder, o se sui o le Vaega Pule a Molimau a Ieova, na ia faalaeiauina ai aʻu e aapa atu e galue i le Peteli i le ofisa ulu. E leʻi umi ae ou auauna i le Peteli i Brooklyn iā Iuni 17, 1977. A o faagasolo tausaga e fā na sosoo ai, na ou galue i matagaluega na gafa ma le faamamā ma le faaleleia o le Peteli.

Iā Iuni 1978, na ma feiloaʻi ai ma Elizabeth Avallone i se tauaofiaga faavaomalo i New Orleans, i Louisiana. Na tausia aʻe o ia e ni mātua e malolosi i le upu moni e pei foʻi o oʻu mātua. Na ia auauna o se paeonia sauatoa ma na manaʻo e faaauau pea lana faiva faataimi atoa iā Ieova. Na faaauau ona ma faamasani, ma e leʻi umi ae ma faaipoipo iā Oketopa 20, 1979, ma auauna i le Peteli o se ulugalii.

E ese le agalelei ma alolofa o uso ma tuafāfine o le faapotopotoga Sipaniolo i Brooklyn, lea na ma faapotopotoga muamua ai. A o faagasolo tausaga, na ma auai foʻi i isi faapotopotoga e tolu lea na faalaeiauina ma le agalelei i maʻua e faaauau i le auaunaga i le Peteli. E ma te talisapaia la latou lagolagosua, faapea le fesoasoani a o ma aiga ma uō i le tausiaina o ma mātua ina ua matutua.

AUAUNA I LE MATAGALUEGA O TULAFONO

Iā Ianuari 1982, na tofia ai aʻu e galue i le Matagaluega o Tulafono i le Peteli. Ina ua mavae le tolu tausaga, na talosagaina ai aʻu ou te alu e aʻoga faalōia ina ia avea ai aʻu o se lōia. Na faateʻia aʻu ina ua ou iloa, o le tele o le saʻolotoga o loo aeae ai le toʻatele o tagata i Amerika ma isi atunuu, e māfua mai i mataupu faafaamasinoga na manumalo ai Molimau a Ieova. O na mataupu faafaamasinoga mataʻina, na tele ina talanoaina i a matou vasega.

I le 1986 ina ua 30 oʻu tausaga, na tofia ai aʻu e avea ma ovasia o le Matagaluega o Tulafono. Na ou fiafia i loʻu faaeaga e ui i loʻu laʻitiiti. Ae i le taimi e tasi, na ou lagona foʻi le popole ona e tele mea ou te lē iloa ma e lē faigofie le faaeaga.

Na avea aʻu o se lōia i le 1988. Peitaʻi, ou te leʻi iloa le telē o le aafiaga o laʻu aʻoga faalōia i le ma faiā ma Ieova. O aʻoaʻoga maualuluga, e mafai ona maileia ai se tasi i le uiga faasausili, ma manatu ai e sili atu o ia nai lo o isi e leʻi lelei ni aʻoaʻoga. Peitaʻi, na fesoasoani mai si aʻu avā o Elizabeth ina ia ou toe foʻi i le faia o laʻu faasologa faaleagaga, e pei o le taimi a o ou leʻi alu e aʻoga faalōia. Ina ua mavae sina taimi, na mafai ona toe faamalosia laʻu faiā ma Ieova. Ua ou iloa mai i le mea na tupu iā te aʻu, e leai se aogā o le poto faalelalolagi. O le mea e sili ona tāua, o le iai lea o se faiā māfana ma Ieova, ma ia malosi le alofa mo Ia ma ona tagata.

PUIPUIA MA LE FAAMAUTŪINA FAALETULAFONO O LE TALA LELEI

Ina ua uma laʻu aʻoga faalōia, na ou uaʻi atu loa e fesoasoani i mataupu faaletulafono i le Peteli, ma puipuia la tatou faalapotopotoga faapea le aiā e talaʻi ai. E ui na ou fiafia i loʻu faaeaga, ae na iai foʻi luʻi ona o le vave o suiga i le faalapotopotoga. O se faataʻitaʻiga, sa masani ona tatou talosaga i tagata mo se foaʻi mo a tatou lomiga. Ae i le 1990, na talosagaina ai le Matagaluega o Tulafono, ina ia saunia se taʻiala i le auala e taofia ai le faia faapea. Talu mai lenā taimi, ua tufatufaina atu a tatou lomiga e aunoa ma se totogi. O lenā faatulagaga na faafaigofie ai galuega i le Peteli ma i le talaʻiga, ma ua ʻalofia ai le totogiina o ni lafoga e lē manaʻomia. Na popole le toʻatele o le a lē toe mafai ona faatupe le sauniaina o a tatou lomiga mo le talaʻiga. Peitaʻi, e lē o le mea lenā na tupu. Talu mai le 1990, ua sili atu ma le faaluaina le aofaʻi o tagata ua auauna iā Ieova, ma ua tatou maua i aso nei meaʻai faaleagaga e aunoa ma se totogi. Ua ou vaaitino i le taulau manuia o suiga tetele i la tatou faalapotopotoga, ona o le fesoasoani a Ieova ma lana taʻitaʻiga e ala mai i le pologa faamaoni.—Eso. 15:2; Mata. 24:45.

E ui e lelei a tatou lōia, ae e lē na o le pau lenā o le māfuaaga e tatou te manumalo ai i faamasinoga. O le tele o taimi, e māfua ona o amioga lelei a tagata o Ieova. O se faataʻitaʻiga o le 1998, ina ua auai ni sui se toʻatolu o le Vaega Pule ma a latou avā i ni tauaofiaga faapitoa na faia i Cuba. O o latou uiga lelei ma faaaloalo, na talitonu ai tagata maualuluga o le malo e leai sa tatou vaega e faia i faiga faapolotiki, ma na sili atu lenā nai lo o le taumafai e faamatala atu māfuaaga o lo tatou solitū.

Peitaʻi, o nisi taimi e pau le auala e faasaʻo ai se faiga lē tonu, o le ave lea i luma o le faamasinoga, ina ia ʻpuipuia ma faamautūina ai faaletulafono le tala lelei.’ (Fili. 1:7) O se faataʻitaʻiga, e tele tausaga o lē amanaʻia e Europa ma Korea i Saute la tatou aiā tatau e tatou te lē auai ai i vaegaʻau. O le iʻuga, e pe ā ma le 18,000 uso i Europa ma le silia i le 19,000 uso i Korea i Saute na faafalepuipuiina, i le lē auai i le vaegaʻau ona o o latou lotofuatiaifo.

Iā Iulai 7, 2011, na māeʻa ai le faamasinoga i le vā o le uso o Bayatyan ma le malo o Armenia. O i inā na tuuina mai ai e le Faamasinoga o Aiā Tatau a Tagata i Europa se faaiʻuga mataʻina e faapea, e tatau i atunuu uma i Europa ona faataga so o se tasi e faia se isi auaunaga, pe afai e lē auai i le vaegaʻau ona o ona talitonuga faalelotu. E tai faapena foʻi le faaiʻuga na faia e le Faamasinoga a Korea i Saute iā Iuni 28, 2018. Pe ana lē tutumau faamaoni o tatou uso talavou, semanū e lē mafai ona tatou maua nei faaiʻuga mataʻina.

O loo galulue mamafa i latou o loo i le matagaluega o tulafono i le ofisa ulu ma i lālā i le lalolagi aoao, e puipuia la tatou aiā e tapuaʻi ma talaʻi ai. O se faaeaga le fesoasoani i o tatou uso ma tuafāfine o loo feagai ma teteega mai i faigāmalo. E tusa pe e tatou te lē manumalo i se faamasinoga, ae o loo tatou avatu pea se molimau lelei i kovana, o tupu ma i luma o atunuu. (Mata. 10:18) O se faataʻitaʻiga, e tatau i faamasino, o sui o malo, o le ʻaufaasalalau ma tagata lautele, ona iloilo mau o loo faaaofia atu i a tatou faamatalaga tusitusia, faapea mau e tatou te taʻua a o faagasolo se faamasinoga. O na faamatalaga e malamalama ai tagata lotofaamaoni e faatatau i Molimau a Ieova, ma iloa ai e faavae o tatou talitonuga mai i le Tusi Paia. O nisi o i latou na ua avea o ni auauna a Ieova.

FAAFETAI TELE LAVA IEOVA!

I le silia ma le 40 tausaga ua mavae, na ou maua ai le faaeaga e galulue ma isi lālā i le lalolagi aoao i mataupu faaletulafono, ma tū atu i luma o le tele o faamasinoga maualuga ma le toʻatele o tagata maualuluga o le malo. E ese loʻu talisapaia o i latou o loo matou galulue i le Matagaluega o Tulafono i le ofisa ulu, ma i le lalolagi aoao. Ua ou maua se olaga e matuā faamalieina.

Ua 45 tausaga o lagolagoina ma le faamaoni aʻu e si aʻu avā pele o Elizabeth, i taimi e sologa lelei ai mea faapea taimi faigatā. Ou te matuā talisapaia lona faia faapea, e ui o loo feagai ma se maʻi e faatapulaa ai mea e mafai ona ia faia.

Ua ma iloa mai i mea na ma vāaitino ma tofo totino i ai, e lē mafai ona tatou manumalo i so tatou lava malosi po o tomai. E pei o upu a Tavita, “O Ieova o le malosi ia o lona nuu.” (Sala. 28:8) O le mea moni, “e iā Ieova le taua.”