Sui Fou e Toʻalua o le Vaega Pule

I LE fonotaga faaletausaga iā Oketopa 5, 2024, na faia ai se faasilasilaga faapitoa e faapea, ua tofia le uso o Jody Jedele ma Jacob Rumph o ni sui o le Vaega Pule o Molimau a Ieova. Ua tele tausaga o auauna ma le faamaoni nei uso iā Ieova.

Na fanau le uso o Jedele i Missouri, i Amerika, ma na tausia aʻe o ia i le upu moni. Talu ai na nonofo lo latou aiga i se vaipanoa e lē toʻatele ai ni Molimau a Ieova, o le māfuaaga lea na asiasi ane ai le toʻatele o uso mai i isi vaipanoa e fesoasoani i la latou oganuu. O lea, na feiloaʻi ai o ia i le toʻatele o uso e eseese o latou talaaga, ma na iai se aafiaga lelei iā te ia o lo latou autasi ma le alofa. Na papatiso o ia a o talavou iā Oketopa 15, 1983, ma na olioli o ia i lana faiva. Ina ua uma lana aʻoga, na amata loa lana paeonia sauatoa iā Setema 1989.

A o lāiti le uso o Jedele ma lona tuafafine, na masani ona ave i laʻua e o la mātua e asiasi i le Peteli. O na asiasiga na totō ai i o la loto le faanaunauga e auauna i le Peteli, o se sini na la ausiaina. Na amata le auaunaga a le uso o Jedele i le Peteli i Wallkill iā Setema 1990. Na galue o ia i le Matagaluega o le Faamamā, ma mulimuli ane galue i le matagaluega e gafa ma le tausia o le soifua mālōlōina o le aiga Peteli.

I le taimi lea, na tulaʻi mai ai se manaʻoga mo uso i faapotopotoga faa-Sipaniolo. O lea na auai ai le uso o Jedele i se tasi o na faapotopotoga ma aʻoina le gagana. E leʻi umi ae feiloaʻi o ia iā Damaris, o se tuafafine na paeonia i le matagaluega lea e iai le faapotopotoga a le uso o Jedele. Mulimuli ane, na la faaipoipo ma auauna faatasi i le Peteli.

I le 2005, na la tuua ai le Peteli ina ia tausia nai o la mātua. I le taimi lenā, na auauna ai i laʻua o ni paeonia sauatoa. E lē gata i lea, na avea le uso o Jedele o se faiaʻoga i le Aʻoga mo le Auaunaga Paeonia, ma o se sui foʻi o le Komiti o Mataupu Tau Falemaʻi, faapea le Komiti o Faugāfale o le Vaipanoa.

I le 2013, na toe valaaulia ai le uso o Jedele ma lana avā i le Peteli, e fesoasoani i le fausiaina o le Peteli i Warwick. Talu mai lenā taimi, na la auauna ai foʻi i Patterson ma Wallkill. Na galue le uso o Jedele i le Matagaluega mo Faugāfale i le Vaipanoa, faapea le Auaunaga o Faamatalaga Faafomaʻi. Iā Mati 2023, na tofia ai o ia o se fesoasoani i le Komiti o le Auaunaga. Pe a mafaufau i le tele o faaeaga na auauna ai o ia, ua faapea mai le uso o Jedele: “O nisi taimi e lagona le lē mautonu pe a maua ni faaeaga fou. Peitaʻi, o taimi na e sili ona manaʻomia ona faalagolago ai iā Ieova, auā e na o ia e mafai ona faapogaia i tatou e faataunuu so o se mea e finagalo i ai.”

Na fanau le uso o Rumph i Kalifonia, i Amerika. A o laʻitiiti, na taumafai lona tinā e aʻoaʻo o ia i upu moni o le Tusi Paia, e ui lava e leʻi toe auai lona tinā i sauniga ma talaʻiga i le taimi lea. E lē gata i lenā, na masani ona alu le uso o Rumph i tausaga taʻitasi e asi le tinā o lona tamā, o se tuafafine Molimau a Ieova e faamaoni. O i inā, na amata ai ona fiafia le uso o Rumph i le upu moni. O lea, i le 13 o ona tausaga, na manaʻo ai e faia sana suʻesuʻega faale-Tusi Paia, ma na papatiso o ia a o talavou iā Setema 27, 1992. O se fiafiaga ona na toe malosi i le upu moni le tinā o Rumph, ma na papatiso foʻi lona tamā, faapea lona uso ma lona tuafafine.

A o talavou le uso o Rumph, na ia mātauina ai le fiafia o paeonia. O lea, ina ua uma lana aʻoga, na amata loa lana paeonia iā Setema 1995. I le tausaga 2000, na siitia atu ai o ia i Ekutoa i le mea sa tele ai le manaʻoga. O i inā na fetaui ai ma Inga, o se tuafafine paeonia mai i Kanata. Na mulimuli ane la faaipoipo ma auauna i se taulaga i Ekutoa, lea e toʻaitiiti le ʻautalaʻi na iai. Ae i le taimi lenei, ua faatuputeleina le aofaʻi o le faapotopotoga i inā.

A o faagasolo taimi, na tofia le uso o Rumph ma lana avā o ni paeonia faapito, ma mulimuli ane galue o ia o se ovasia matagaluega. I le tausaga 2011, na valaaulia ai i laʻua i le vasega lona 132 o le Aʻoga i Kiliata. Ina ua uma, na la galulue i vaipanoa eseese o le lalolagi ma olioli i vala eseese o le auaunaga, e pei o le Peteli, faamisionare ma le ovasia matagaluega. Na maua foʻi e le uso o Rumph le faaeaga e avea ai o se faiaʻoga i le Aʻoga mo Tagata Talaʻi o le Malo.

Ina ua pepesi le faamaʻi o le KOVITI-19, na toe foʻi loa le uso o Rumph ma lana avā i Amerika. Na valaaulia i laʻua e galulue i le Peteli i Wallkill, lea na maua ai e le uso o Rumph toleniga i le Matagaluega o le Auaunaga. Na mulimuli ane toe auina atu i laʻua i le Peteli i Ekutoa, ma galue ai le uso o Rumph o se sui o le Komiti o le Lālā. I le 2023, na tofia ai i laʻua i Warwick, ma iā Ianuari 2024, na avea ai le uso o Rumph o se fesoasoani i le Komiti o le Auaunaga. Pe a toe tepa i tua i faaeaga na auauna ai le uso, na ia faapea mai: “E lē tāua po o fea le mea e tatou te auauna ai, ae o le mea e sili ona tāua o tagata o loo tatou galulue faatasi.”

E tatou te matuā talisapaia galuega mamafa a nei uso, ma e “faaauau ona [tatou] faapelepele i tane faapena.”—Fili. 2:29.