Po o Tatau Pea Ona Ou Avetaavale?

UA TELE tausaga o e avetaavale, ma e te fiafia e te alu i so o se mea i lau oe lava taavale. Ae talu ai nei, na talanoa atu ai nisi o lou aiga ma au uō, pe e faamata o fetaui ona e aveina pea le taavale. Peitaʻi, e te lē iloa po o le ā le māfuaaga e popole ai fua i lau aveave.

Pe afai o loo e fesagaʻia se tulaga tai faapena, o le ā e fesoasoani iā te oe e iloilo ai po o tatau pea ona e avetaavale?

I nisi atunuu, pe a oo le matua o le soifua o se tasi i se tausaga patino, e manaʻomia ona ia maua se faatagaga faaletulafono mai i se fomaʻi, e iloa ai pe e tatau ona iai pea sona laisene avetaavale. E tatau i Kerisiano e nonofo i na atunuu ona usitaʻia na tulafono. (Roma 13:1) Peitaʻi, e tusa pe e iai pe e leai ni tulafono faapena i le atunuu o loo e nofo ai, ae e mafai lava ona e iloilo po o talafeagai ona e aveina pea se taavale.

E FAAPEʻĪ LAU AVEAVE?

Ua taʻua e se tasi o faalapotopotoga mo tagata matutua, o se mea lelei le fesili ifo i fesili nei:

Pe e leaga laʻu vaai i le pō pe e faigatā foʻi ona ou iloa atu faailoilo o le auala?
Pe e faigatā ona feliuaʻi loʻu ulu e vaai aʻu faata po o ni vaega foʻi e faigatā ona iloa atu?
Pe e tuai laʻu gaoioi, e pei o le taimi e sui ai mai i le vae penisini agaʻi i le vae taofi?
Pe e lemū tele laʻu aveave ma iʻu ai ina poloka le auala?
Pe e masani ona tau lavea laʻu taavale, pe maʻosiʻosia foʻi ma omoomo ona e fai ma ou soʻaina ni mea?
Pe e iai se taimi na taofi ai aʻu e se leoleo ona o laʻu aveave?
Pe e iai se taimi na ou tautulemoe ai a o ave le taavale?
Po o inu ni aʻu fualaau lea e aafia ai le auala ou te aveina ai le taavale?
Pe na talanoa mai nisi o loʻu aiga po o ni aʻu uō i laʻu aveave?

Pe afai o le ioe lau tali i se fesili se tasi pe lua o na fesili, atonu la e manaʻomia ona e faia ni fetuunaʻiga. O se faataʻitaʻiga, atonu e manaʻomia ona faaitiitia taimi e te aveina ai le taavale, aemaise lava i le pō. Ia fai ma masani le iloilo po o fetaui ona e aveina pea le taavale. E mafai ona e fesili i se tasi o lou aiga po o sau uō po o le ā sona manatu i lau aveave. Atonu foʻi e mafai ona e auai i se polokalame e faaleleia atili ai lau aveave. Peitaʻi, pe afai o le ioe lau tali i le tele o fesili o loo taʻua i luga, atonu la o se mea atamai lou lē toe aveina o se taavale.

IA TAʻITAʻIA I TATOU E MATAUPU SILISILI O LE TUSI PAIA

E lē faigofie ona tatou iloa ua amata ona lē lelei la tatou aveave. E tatou te ono lagona foʻi le lē fiafia pe a mafaufau o le a lē mafai ona tatou toe aveina se taavale, pe talanoa mai se isi i la tatou aveave. O ā la ni mataupu silisili o le Tusi Paia e fesoasoani e ʻalofia ai faalogona faapena, ma faia ai ni filifiliga lelei? Ia mātau ni mataupu silisili se lua.

Ia faamaulalo pe ia iloa mea e gata ai lo tatou malosi. (Faata. 11:2) A o faasolo ina tatou matutua, o le a faasolo foʻi ina leaga la tatou faalogo, o le vaai, vaivai le tino ma iʻu ai ina tuai la tatou gaoioi. O se faataʻitaʻiga, e iloa e le toʻatele o tagata ua faasolo ina matutua, e lē tatau ona latou toe taaalo i nisi o taaloga ona e ono lavevea ai. E tai faapena foʻi le aveina o se taavale. O se tagata e faamaulalo, e na te iloa lelei e iai lava le taimi e lē tatau ai ona ia toe aveina se taavale, pe afai e aafia ai lona saogalemu. (Faata. 22:3) O le tagata faamaulalo foʻi, e na te talia fautuaga pe a talanoa atu isi e faatatau i lana aveave.—Faatusatusa i le 2 Samuelu 21:15-17.

ʻAlofia le nofosala i le faamasaatoto. (Teu. 22:8) E tugā iʻuga e oo i ai, pe afai e lē lelei le auala e tatou te faafoeina ai se taavale. Pe afai la e manaʻo pea se tasi e na te aveina se taavale e ui e lē o toe lelei lana aveave, e iʻu la ina lamatia ai lona ola po o soifua o isi. Pe afai foʻi e ogaoga se faalavelave tau taavale e tulaʻi mai ona o i tatou, ua tatou nofosala la i le faamasaatoto.

Pe afai o loo e filifili po o tatau pea ona e avetaavale, ia ʻalofia le manatu e faapea ua leai sou aogā pe a e lē toe aveave. E matuā pele oe iā Ieova ona o ou uiga lelei e pei o le faamaulalo, lotomaulalo, ma le manatu mamafa i le saogalemu o isi. E lē taitai foʻi tuulafoaʻia oe e Ieova, ma ua ia folafola mai o le a ia tausia ma faamalosia oe. (Isa. 46:4) O lea, ia talosaga atu iā te ia mo le atamai aogā ma le faautauta, ina ia e iloa ai pe e tatau ona e aveina pea se taavale pe e leai.

E Faapefea Ona Tatou Fesoasoani Atu?

E masani lava, o tagata e sili ona faigofie ona talanoa atu i se tasi ua matua e faatatau i lana aveave, o se isi o lona aiga. Pe afai foʻi o oe o se uō a lenā tagata, ma na e faalogo i nisi o talanoa e faatatau i lana aveave, aua e te manatu māmā i na faamatalaga. O le ā la se mea e mafai ona e faia? Atonu e mafai ona e fai i lau uō e te lua tiʻetiʻe i lana taavale. Pe afai e te iloa e ao ona talanoa i ai e faatatau i lana aveave, ia faia faapea i se auala agalelei ma faamaoni. Ia tuu oe i le tulaga o lau uō. Ia ʻalofia le talanoa e faatatau i le matua o lona soifua, ae talanoa saʻo e faatatau i lana aveave. Ia ʻalofia le faapea atu, “E lē tatau ona e toe aveave” ae ia faapea atu, “Matuā ou popole lava i tupu se mea iā te oe ona o lau aveave.” Ia faamanatu atu iā te ia mataupu silisili o le Tusi Paia na talanoaina i lenei mataupu, ma faamautinoa atu foʻi i ai o loo e iloa lona faanaunauga ina ia faatatauina na fautuaga.

E tatau iā i tatou uma ona taumafai e malamalama i faalogona o se tagata matua, pe afai ua lē tatau ona ia toe aveina se taavale. Atonu e oo iā te ia faalogona e pei ua leai sona saʻolotoga e alu ai na o ia i se mea. E faapefea la ona tatou fesoasoani atu? Ia faaalia le agalelei, ma saʻili ni auala aogā e fesoasoani atu ai. (Faata. 17:17) Atonu e musu o ia e talosaga mai mo se fesoasoani, ona e pei ua faatele galuega iā i tatou. O lea, ia tausolomua e fesili i ai pe e manaʻo e piki o ia, pe momoli i se mea. Atonu e mafai ona faatulaga ni taimi e te alu atu ai e momoli o ia i mea e fia alu i ai, e pei o sauniga, talaʻiga, fai sana faatau, pe ō foʻi e vaai le fomaʻi. Ia faamautinoa atu i ai, o loo e manaʻo e fesoasoani atu ma faaalu le taimi faatasi ma ia.—Roma 1:11, 12.