Ia Aʻoaʻo Atu le Upu Moni i se Auala Logolelei

1. O le ā e tatau ona tatou faia ina ia avea ai ma vaega o le aiga o Ieova?

PE A tatou feiloaʻi ma isi uso ma tuafāfine Molimau a Ieova, e masani lava ona tatou fesili le tasi i le isi, “Na faapefea ona e maua le upu moni?” O nisi e ono tali mai, “Na ou ola aʻe i le upu moni,” ae o isi e faapea mai, “E leʻi leva ona ou maua le upu moni.” E māfua ona tatou tali faapena, ona e tatou te iloa o loo taaʻina e upu moni o le Tusi Paia le auala e tatou te ola ai. E lē gata i lea, ina ia avea i tatou ma vaega o le aiga o Ieova, e ao ona tatou talisapaia le upu moni, ma ola e ōgatusa ma lenā upu moni. E aofia ai i lenā mea lo tatou faamaoni i upu ma gaoioiga.—Sala. 15:​1-3.

2. (a) O le ā se mea na iloa e tagata e faatatau iā Iesu? (e) O le ā le auala na tali mai ai tagata i upu moni na aʻoaʻoina atu e Iesu?

² E moni ma faamaoni fetalaiga uma a Iesu. E oo lava i ona fili, na latou iloa le moni o fetalaiga a Iesu e ui lava e latou te leʻi ioe i mea uma na ia aʻoaʻoina atu. (Mata. 22:16) Na fetalai Iesu e faatatau i aafiaga o upu moni na ia aʻoaʻoina atu e faapea: “Ua ou sau e faatupu fevaevaeaʻiga, o le atalii ma lona tamā, o le tama teine ma lona tinā, o le avā foʻi ma le tinā o lana tane.” (Mata. 10:35) Ina ua aʻoaʻo atu e Iesu le upu moni, e leʻi iai sona faanaunauga ina ia faatupuina ai ni fevaevaeaʻiga i tagata. (Mata. 23:37) Peitaʻi, na ia silafia o le mea lenā e tupu pe a faalogo tagata i le upu moni. O nisi o le a latou talisapaia upu moni o le Tusi Paia, ae o isi e latou te teena.—2 Tesa. 2:​9-11.

3. O le ā o le a tatou talanoaina i lenei suʻesuʻega?

³ I le pei o Iesu, e tatou te taumafai e faamaoni ma tautatala i le mea moni i taimi uma, e tusa lava pe e lē fiafia mai ai isi iā i tatou. E tatou te talaʻi foʻi ma aʻoaʻo atu upu moni o le Tusi Paia, e ui lava i teteega. Peitaʻi, e tatau ona tatou faaeteete i le auala ma le taimi e tatou te tautatala ai i le mea moni, e pei o taimi e tatou te talaʻi atu ai. I lenei la suʻesuʻega, o le a tatou talanoaina ai po o fea e tatou te maua ai upu moni. O le a iloiloina ai foʻi fesili nei: ʻO le ā le uunaʻiga e tatou te tautatala ai i le mea moni? E faapefea ona tatou faailoa atu upu moni? O le ā le taimi e tatau ai ona tatou faailoa atu upu moni?’ O lo tatou malamalama i nei vala taʻitasi, o le a fesoasoani atili ai iā i tatou ina ia faailoa atu upu moni i se auala logolelei, pe i se auala faautauta ma i le taimi talafeagai.

O FEA E TATOU TE MAUA AI UPU MONI?

4. Aiseā e faapea atu ai o Ieova o le Puna o upu moni uma?

⁴ O Ieova o le Puna o upu moni uma. E moni ma faamaoni ana fetalaiga uma. O se faataʻitaʻiga, e lē fesiligia le tonu o ana fetalaiga e tusa ai o le mea e saʻo ma le mea e sesē. (Sala. 19:9; 119:​142, 151) E taunuu ana folafolaga uma, ma e leai sana folafolaga e na te lē tausia. (Nu. 23:19; Isa. 55:​10, 11) O le mea moni, e lē mafai ona tala pepelo Ieova. (Epe. 6:18) E lētioa la taʻua o ia o “le Atua faamaoni.”—Sala. 31:5.

5. Aiseā e faapea atu ai e lē faigatā ona tatou maua “le Atua faamaoni”? Ia faamatala. (Galuega 17:27)

⁵ E toʻatele tagata e manatu e faigatā ona tatou maua pe iloa Ieova “le Atua faamaoni.” Peitaʻi, e lē saʻo lenā manatu, auā o loo siʻomia i tatou i le tele o faamaoniga e iloa ai o loo soifua Ieova. (Roma 1:20) Ina ua talanoa atu le aposetolo o Paulo i nisi o tagata Eleni atamamai sa iai i Atenai, na ia taʻua ai e finagalo le Atua ina ia tatou “maua o ia,” ma “e lē o mamao o ia mai iā i tatou taʻitoʻatasi.” (Faitau le Galuega 17:27.) O le mea moni, e tosina atu e Ieova iā te ia tagata lotomaulalo o loo saʻilia upu moni e faatatau iā te ia.—Ioa. 6:44.

6. O ā nisi o upu moni o loo iai i le Tusi Paia, ma aiseā e tatou te talisapaia ai le iloaina o na upu moni?

⁶ E faapefea la ona tatou maua Ieova? O se tasi o auala, o le suʻesuʻeina lea o le Tusi Paia. Na faagaeeina e le agaga paia o le Atua i latou na tusia le Tusi Paia. (2 Pete. 1:​20, 21) O lea, e moni ma faamaoni mea uma o loo tusia ai, ma e mafai ona tatou maufaatuatuaina. O se faataʻitaʻiga, e maufaatuatuaina faamatalaga o loo i le Tusi Paia e faatatau i le amataga o lo tatou vateatea, ma le auala na maua ai le ola i le lalolagi. (Kene. 1:​1, 26) E tatou te talitonu foʻi i faamatalaga a le Tusi Paia i le māfuaaga ua agasala ai tagata uma, ma le pogai o le tele o mafatiaga faapea le oti. (Roma 5:12; 6:23) E lē gata i lea, e maufaatuatuaina folafolaga a Ieova o loo iai, e faatatau i le taimi o le a faalēaogāina ai e lona Alo galuega uma a Satani “le tamā o le pepelo.” (Ioa. 8:44; Roma 16:20) E mautinoa foʻi e taunuu folafolaga a le Tusi Paia e faapea, o le a faaumatia e Iesu tagata amioleaga, toe faatutū mai ē ua maliliu, toe faafoʻisia le tulaga lelei o le lalolagi, ma fesoasoani iā i tatou ia toe maua le tulaga lelei atoatoa. (Ioa. 11:​25, 26; 1 Ioa. 3:8) Maʻeu se faaeaga ua tatou mauaina, o le aʻoaʻoina e Ieova i upu moni, faapea le avanoa e tatou te faasoa atu ai i isi na upu moni!—Mata. 28:​19, 20.

O LE Ā LE UUNAʻIGA E TATOU TE TAUTATALA AI I LE MEA MONI?

7-8. Pe e tāua le uunaʻiga e tatou te tautatala ai i le mea moni? Ia aumai se faataʻitaʻiga. (Mareko 3:​11, 12) (Tagaʻi foʻi i ata.)

⁷ E pei ona taʻua muamua, e tāua ona tatou tautatala faamaoni ina ia talia ai i tatou i le aiga o Ieova. Peitaʻi, e lē lava le tau ina tautatala i le mea moni. E tāua iā Ieova le uunaʻiga po o le māfuaaga e tatou te tautatala ai i le mea moni. Seʻi mātau se mea na tupu a o faagasolo le faiva a Iesu i le lalolagi. (Faitau le Mareko 3:​11, 12.) A o talaʻi o ia e lata i le sami o Kalilaia, na lolofi ane ai iā te ia se motu o tagata e toʻatele. Na ō ifo foʻi nisi o tagata na uluitino e temoni, ua faapaʻuʻū ma alalaga atu iā Iesu e faapea: “O oe lava o le Alo o le Atua.” Aiseā na taʻua ai e temoni lenā faamatalaga moni e faatatau iā Iesu? Na latou mananaʻo e faatalitonu tagata iā i latou, ma iʻu ai ina mulimuli atu iā i latou nai lo o le auauna iā Ieova. E ui lava na taʻua e temoni se upu moni e faatatau iā Iesu, peitaʻi e sesē le uunaʻiga na latou faia ai faapea. Na silafia lelei e Iesu faanaunauga o na temoni, ma e leʻi faasesēina ai o ia. O le mea moni, na ia faatonuina na temoni e aua neʻi talaʻi atu e faatatau iā te ia.

⁸ O le ā se lesona ua tatou aʻoaʻoina mai i lenei tala? E matuā tāua iā Ieova le uunaʻiga e tatou te tautatala ai i le mea moni. O lea, e tatou te aʻoaʻoina isi i upu moni e faatatau iā Ieova, ona e tatou te alolofa iā te Ia. Ia faauaʻi atu foʻi i latou iā Ieova ma avatu le viiga iā te Ia, nai lo o le faauaʻi mai o tagata iā i tatou lava.—Mata. 5:16; faatusatusa i le Galuega 14:​12-15.

9. O le ā e ao ona tatou ʻalofia ma aiseā?

⁹ Ia mātau se isi mea e ono tupu, e tatou te faauaʻi mai ai isi iā i tatou. Seʻi faapea ua faailoa atu e se uso tofia iā te oe ni faamatalaga faalilolilo, ma ua e alu atu ma faailoa atu na faamatalaga i isi. Pe a iloa mulimuli ane e na tagata e saʻo faamatalaga na e faailoa atu, atonu o le a latou vaai maualuga ai iā te oe ma mafaufau e tele ni faamatalaga faalilolilo o loo e iloa. Peitaʻi, po o le silafaga foʻi lenā a Ieova? E leai! (Faata. 11:13) Aiseā? E ui lava e saʻo faamatalaga na e faailoa atu, ae e leai sau aiā e faailoa atu ai na faamatalaga faalilolilo, ma e sesē foʻi le uunaʻiga na e faailoaina atu ai.

E FAAPEFEA ONA TATOU FAAILOA ATU UPU MONI?

10. O le ā e uiga atu i ai faamatalaga e “logolelei”? (Kolose 4:6)

¹⁰ Faitau le Kolose 4:6. Na faamanatu atu e le aposetolo o Paulo i Kerisiano i Kolose, e tatau ona “lē aunoa ona . . . logolelei” a latou faamatalaga. O le ā le uiga o lenā manatu? O le faaupuga Eleni lea o loo faaliliuina mai ai lenei manatu, e faasino atu lea i lo tatou faia o ni faamatalaga e aogā i isi, ae e agalelei foʻi ma logomālie.

11-12. Aiseā e tāua ai lo tatou faaeteete i le auala e faailoa atu ai i isi upu moni o le Tusi Paia? Ia faataʻitaʻi. (Tagaʻi foʻi i ata.)

¹¹ E ao ona tatou utagia le fautuaga a Paulo ina ia logolelei a tatou faamatalaga, a o tatou aʻoaʻoina isi i upu moni o le Tusi Paia. Ua faatusaina upu moni o loo i le Tusi Paia, i se pelu maʻai e mafai ona vaevaeina ai o tatou tino ma agaga. O lona uiga, e mafai e na upu moni ona faailoa mai ai faalogona ma uunaʻiga moni o loo iai i se tasi. (Epe. 4:12) Peitaʻi, pe afai e tatou te lē taulimaina ma le atamai le Tusi Paia, e ono iʻu ai ina tatou faatigā i se tasi pe faatupuina ai foʻi ni feeseeseaʻiga. E faapefea?

¹² Ia mātau le faataʻitaʻiga lenei. Seʻi faapea ua tatou tau atu i le talaʻiga i se tamāloa e fiafia e talanoa i le Tusi Paia, ae e na te faaaogāina faatusa i lana tapuaʻiga, ma e fiafia e faamanatu faatasi ma lona aiga le Kerisimasi ma le Eseta. O le ā le auala e tatou te ono tali atu ai iā te ia? Atonu e tatou te faaaogā le Tusi Paia e faamaonia atu ai le sesē o le tapuaʻi i tupua e leai ni ola, ma e faapaupau le amataga o aso faamanatu e pei o le Kerisimasi ma le Eseta. (Isa. 44:​14-20; 2 Kori. 6:​14-17) Peitaʻi, o le ā le mea e tupu pe afai o le auala lenā e tatou te faailoa atu ai na upu moni i la tatou uluaʻi feiloaʻiga? E ui lava e moni aʻoaʻoga o loo tatou faailoa atu, ae e tatou te lē o taulimaina ma le atamai le Tusi Paia.

13. E faapefea ona faamāi i le masima a tatou faamatalaga?

¹³ Na fautuaina foʻi e Paulo le ʻauuso i Kolose ina ia “faamāi” i le masima a latou faamatalaga. E lē o le uiga o le manatu o Paulo, ia taumafai e natia pe faaʻaloʻalo le taʻuina atu o le upu moni i isi. Nai lo o lea, e ao ona “faamāi” a latou faamatalaga, ina ia “tofo” lelei pe logolelei i le faalogo a isi, ma faigofie ai ona latou talia upu moni o loo aʻoaʻoina atu. (Iopu 12:11) Peitaʻi, e lē faigofie le faia faapea. I le tai pei o a tatou meaʻai, e masani ona tatou mafaufau e fiafia isi i le tofo o se meaʻai ona o loo lelei i la tatou tofo. E tai faapena foʻi a tatou faamatalaga. E faigofie ona tatou mafaufau o loo logolelei i le faalogo a isi tagata, ae o le mea moni e leai. O se faataʻitaʻiga, o se mea masani i nisi o aganuu le tautala saʻo pe faaali saʻo atu manatu o se tasi, e tusa lava pe o loo talanoa atu i se tagata matua. Ae i isi aganuu, o se matuā lē faaaloalo le faia faapea. O le māfuaaga lea na fautua mai ai Paulo, ina ia tatou iloa le “auala e tali atu ai i tagata taʻitoʻatasi.” O lona uiga, e tatau ona fua a tatou faamatalaga i le mea e logolelei i le faalogo a isi, ae e lē o le mea e logolelei iā i tatou lava.

O LE Ā LE TAIMI E TATAU AI ONA FAAILOA ATU UPU MONI?

14. Pe na aʻoaʻoina e Iesu ona soo i mea uma na ia iloa a o iai i le lalolagi? Ia faamatala.

¹⁴ Na masani ona fetalai atu Iesu i ona soo i upu logolelei, ma aʻoaʻoina ma le agalelei i latou i le tele o mea. (Mare. 6:34) Peitaʻi, na tele pea isi mea na manaʻomia ona latou aʻoaʻoina. Ae nai lo o le aʻoaʻoina o i latou e Iesu i mea uma lava na ia iloa, na ia faaalia le fetuutuunaʻi ma amanaʻia e iai le mea e gata mai ai lo latou iloa. Na ia silafia lelei, e leʻi oo i le taimi talafeagai e aʻoaʻo ai ona soo i nisi o upu moni. Na fetalai Iesu e lē mafai e ona soo ona malamalama i na mea uma i lenā taimi. (Ioa. 16:12) O le ā se lesona e tatou te aʻoaʻoina mai ai?

15. Pe e tatau ona tatou faailoa atu i a tatou tagata aʻoga mea uma o loo tatou iloa i le taimi e tasi? Ia faamatala. (Faataoto 25:11) (Tagaʻi foʻi i le ata.)

¹⁵ Ua tatou aʻoaʻoina mai i le faaaʻoaʻoga a Iesu, e lē faapea a tatou iloa le upu moni, ona tatou aʻoaʻo atu lea o mea uma ua tatou iloa i le taimi e tasi. Nai lo o lea, e ao ona tatou fetuutuunaʻi e fua i le tulaga o le tagata. O se faataʻitaʻiga, seʻi toe mafaufau i le tamāloa na taʻua muamua, lea e fiafia e faamanatu faatasi ma lona aiga le Kerisimasi ma le Eseta. E tatou te iloa lelei, e faapaupau le amataga o na aso faamanatu ma e lē fiafia ai le finagalo o Ieova. Ae seʻi faapea o lea ua lua suʻesuʻe ma le tamāloa, ae ua toe lua vaiaso oo i le Kerisimasi. Pe faamata e logolelei a tatou faamatalaga, pe afai e tatou te faailoa atu mai i le Tusi Paia le faapaupau o na aso, ma faatalitalia e lē tatau ona ia faamanatuina le Kerisimasi? O le mea moni, e iai lava tagata e vave ona faatatauina mea ua latou aʻoaʻoina mai i le Tusi Paia. Peitaʻi, o isi e umi se taimi faatoʻā latou faia ni suiga. O lea, e mafai ona tatou fesoasoani i se tagata aʻoga ina ia agaʻigaʻi i luma, e ala i le faailoa atu iā te ia o upu moni o le Tusi Paia i le taimi talafeagai.—Faitau le Faataoto 25:11.

16. E faapefea ona tatou fesoasoani i a tatou tagata aʻoga ina ia “savavali pea . . . i le upu moni”?

¹⁶ Maʻeu lo tatou olioli pe a tatou fesoasoani i se tasi, ina ia iloa upu moni e faatatau iā Ieova! E faapefea ona tatou fesoasoani i isi ina ia “savavali pea . . . i le upu moni”? (3 Ioa. 3, 4) E ala i lo tatou faia o mea nei: Ia faataatia se faaaʻoaʻoga lelei mo i latou. Ia atagia atu i le auala o loo tatou ola ai, e tatou te talitonu i folafolaga o loo i le Tusi Paia. Ia saʻo le uunaʻiga e tatou te tautatala ai i le mea moni. Ia logolelei a tatou faamatalaga, ma aʻoaʻo atu le upu moni i se auala agalelei ma i le taimi talafeagai. E tatou te avatu foʻi le viiga iā Ieova e ala i le faauaʻi atu o isi iā te ia. O le faia faapea, e faamaonia ai o i tatou o ni auauna a Ieova le Atua faamaoni.