O Ai Lasalo ma le Tagata Mauʻoa?

Tali a le Tusi Paia

O Lasalo ma le tagata mauʻoa, o ni tagata i se tasi o talafaatusa a Iesu. (Luka 16:19-31) I lenā tala, na faasino atu nei tagata i ni vaega se lua o tagata: (1) o taʻitaʻi lotu Iutaia faamaualuluga i aso o Iesu, ma le (2) o tagata na talia le feʻau a Iesu.

I lenei mataupu

• O le ā na taʻua e Iesu e faatatau iā Lasalo ma le tagata mauʻoa?

• Pe na tupu moni lava lenei talafaatusa?

• Pe e lagolagoina e lenei talafaatusa le aʻoaʻoga o le afi i Seoli?

• O le ā le uiga o lenei talafaatusa?

O le ā na taʻua e Iesu e faatatau iā Lasalo ma le tagata mauʻoa?

I le Luka mataupu 16, na faamatala ai e Iesu ni suiga tetele na tutupu i olaga o ni tamāloloa se toʻalua.

O se otootoga puupuu lenei o le talafaatusa na faamatalaina e Iesu: Na iai se tagata mauʻoa na tele ana meafaitino. Na masani ona faanofo i le faitotoʻa o lona pā se tagata ʻaisi e igoa iā Lasalo, lea e manaʻo e ʻai i mea e toʻulu ifo mai i le laulau a le tagata mauʻoa. A o faagasolo taimi, na maliu Lasalo ma ua ave o ia e agelu i autafa o Aperaamo. Na maliu foʻi le tagata mauʻoa ma tanu o ia. I le talafaatusa, na faamatalaina ai nei tamāloloa o loo ola pea ina ua mavae le oti. Na faapuapuagatia le tagata mauʻoa i le afi, ma talosaga atu iā Aperaamo e auina mai Lasalo e fufui le tumutumu o lona tamatamaʻilima i le vai, ma faamālū ai le laulaufaiva o le tagata mauʻoa. Na teena e Aperaamo le talosaga a le tagata mauʻoa, ma taʻua ua matuā suia le tulaga o o la olaga. Na ia taʻua foʻi ua iai se vanu tele i lo la vā, ma e lē mafai ona sao ai se tasi.

Pe na tupu moni lava lenei talafaatusa?

Leai. Na taʻua e Iesu lenei talafaatusa e aʻoaʻo atu ai se lesona. Ua faamaonia e tagata atamamai, o se talafaatusa lenei tala. O se faataʻitaʻiga, ua taʻua i se ulutala o le Luther’s Bible lomiga 1912, o lenei tala o se talafaatusa. Ua taʻua foʻi i se faaopoopoga pito i lalo a le Jerusalem Bible a le Katoliko e faapea, o lenei tala o se “talafaatusa e lē o faamatalaina ai se tagata na soifua i se taimi.”

Pe na aʻoaʻoina e Iesu e ola pea le tagata pe a oti? Po o lona uiga o le a faapuapuagatia isi tagata i Seoli pe a feoti? Pe e uiga atu na iai Aperaamo ma Lasalo i le lagi? O nisi nei o faamaoniga e iloa ai e lē o le tulaga lenā.

Mo se faataʻitaʻiga:

• Pe afai na iai le tagata mauʻoa i se nofoaga moni e faapuapuagatia ai i le afi, pe e lē liu ausa ai la le vai sa i le tumutumu o le tamatamaʻilima o Lasalo?

• Ae pe e mafai e se matāua o le vai, ona avatu i le tagata mauʻoa le mapusaga tumau mai i le faapuapuagatiaina i le afi?

• E faapefea ona iai Aperaamo i le lagi, ae o lea sa taʻua e Iesu e leai se tasi na alu aʻe i le lagi?—Ioane 3:13.

Pe e lagolagoina e lenei talafaatusa le aʻoaʻoga o le afi i Seoli?

Leai. E ui ua na o se talafaatusa lenei tala, ae ua finau mai le toʻatele o loo faaata mai ai le aʻoaʻoga, o tagata lelei e ō i le lagi ae faapuapuagatia tagata leaga i le afi i Seoli.a

Pe e talafeagai lenā manatu? Leai.

E lē ōgatusa lenā manatu ma aʻoaʻoga o le Tusi Paia e faatatau i le tulaga o ē ua maliliu. O se faataʻitaʻiga, e lē o taʻua ai o tagata lelei uma ua maliliu e ola i se olaga lelei i le lagi pe faapuapuagatia tagata leaga i le afi. Nai lo o lea, ua taʻua manino i le Tusi Paia: “Auā o ē ua ola ua latou iloa e oti i latou; a o ē ua oti, latou te lē iloa se mea.”—Failauga 9:5.

O le ā le uiga o lenei talafaatusa?

Ua faailoa mai i lenei talafaatusa, o le a matuā suia le tulaga o mea mo ni vaega se lua o tagata.

Ua faaata mai e le tagata mauʻoa taʻitaʻi lotu Iutaia “o ē e naunau i tupe.” (Luka 16:14) E ui na latou faalogo i fetalaiga a Iesu, ae na latou teena. Na vaai maulalo nei taʻitaʻi lotu i tagata.—Ioane 7:49.

Ua faaata mai e Lasalo tagata o ē na talia le feʻau a Iesu, ma na inosia e taʻitaʻi lotu Iutaia.

Na matuā tele se suiga o le tulaga o mea, mo nei vaega e lua.

• E toʻatele taʻitaʻi lotu Iutaia na manatu ua latou maua le finagalo malie o le Atua. Ae ona e latou te leʻi talia le feʻau a Iesu, na teena ai i latou e le Atua ma peiseaʻī ai ua latou feoti. Na faapuapuagatia foʻi i latou, ona o le feʻau na talaʻia e Iesu ma ona soo.—Mataio 23:29, 30; Galuega 5:29-33.

• O tagata ua leva ona lē ano i ai taʻitaʻi lotu, ua latou maua nei le finagalo malie o le Atua. Na talia e le toʻatele le feʻau o le Afioga a le Atua lea na aʻoaʻoina e Iesu, ma latou maua ai faamanuiaga. Ua latou maua nei le avanoa e olioli ai e faavavau i le finagalo malie o le Atua.—Ioane 17:3.