Ia Aʻoaʻo Lau Fanau e Faaalia le Lotofaafetai

Ua faaalia mai i suʻesuʻega, o tagata e faaalia le lotofaafetai e sili atu ona fiafia, e soifua mālōlōina, e mafai ona fesagaʻia faafitauli ma maua ni faauōga lelei. Na taʻua e se tagata suʻesuʻe e igoa iā Robert A. Emmons, “O le faaalia o le lotofaafetai e puipuia mai ai se tasi i uiga e faaleagaina ai e pei o le matauʻa, teuloto o le ita, manaʻo tele, ma le lototigā.”a

E faapefea ona aogā i fanau le faaalia o le lotofaafetai? I se suʻesuʻega na faia i le fā tausaga i talavou e 700, o i latou e faaalia le lotofaafetai e itiiti le avanoa e kopi ai i suʻega, faaaogā sesē o fualaau faasāina ma le ʻava malosi, po o le atiaʻe o amioga e lamatia ai isi.

• Se uiga e lē faaalia ai le lotofaafetai. E toʻatele tamaiti e manatu, o mea lelei uma ua faia mo i latou o mea ia ua tatau ona latou maua. O le a lē faaalia e se tamaitiiti le lotofaafetai, pe a manatu o ia o faamanuiaga e na te maua o se mea e tatau mo ia nai lo o se meaalofa.

  Ua taatele lenā uiga i aso nei. Ua faapea mai se tinā e igoa iā Katherine, “Ua aʻoaʻo e le lalolagi tagata e manatu faapito. Ua tumu ala faasalalau i ata o mea uma e tatau ona tatou ʻmauaina,’ ma o tatou tagata muamua e tatau ona mauaina na mea.”

• E mafai ona aʻoaʻo fanau ia faaalia le lotofaafetai mai lava a o lāiti. Ua faapea mai se tinā e igoa iā Kaye, “E faigofie ona aʻoaʻo tamaiti. O lea la, o le aʻoaʻoina o i latou i masaniga lelei a o lāiti, e tai pei o le faaaogāina o se tee e faatū saʻo ai se laau ina ia saʻo ai lana ola.”

Le auala e aʻoaʻo ai le lotofaafetai

• Aʻoaʻo upu e fai atu. E oo lava i tamaiti lāiti, e mafai ona latou aʻoaʻoina le faapea atu faafetai pe a avatu i ai e se isi se meaalofa pe faaalia foʻi i ai le agalelei. Pe a oo ina matutua, o le a latou matuā talisapaia le limafoaʻi o isi.

  

  Mataupu silisili o le Tusi Paia: ʻIa faaalia lo outou lotofaafetai.’—Kolose 3:15.

  “E faigofie ona fai mai le tama a le ma tama e tolu tausaga, ʻfaafetai lava.’ O taimi uma lava e talosaga mai ai i se mea, e lē misi le fai mai ʻfaamolemole.’ Na ia aʻoaʻoina mai lenā mea i ona mātua. O o la uiga faaaloalo ma le faaalia o le lotofaafetai, ua faaaʻoaʻo i ai le la tama.”—Jeffrey.

• Aʻoaʻo gaoioiga e fai. Aiseā e lē aʻoaʻo ai lau fanau e tusi se tusi faafetai pe a avatu i ai e se tagata se meaalofa? E lē gata i lea, pe a tuu atu ni feʻau i le fanau e fai, ia fesoasoani iā i latou e iloa le tele o galuega e manaʻomia ona fai ina ia tumau ai ona mamā le fale ma fiafia ai le aiga.

  

  Mataupu silisili o le Tusi Paia: “E sili le fiafia e maua i le foaʻi atu i lo o le talia mai.”—Galuega 20:35.

  “E fesoasoani le ma fanau talavou i le aiga, e ala i le kukaina o meaʻai ma fai feʻau i le fale. E fesoasoani lenā mea iā i laʻua e talisapaia ai a ma taumafaiga o ni mātua. O le faia faapea, ua la faaalia ai le lotofaafetai.”—Beverly.

• Aʻoaʻo le uiga e tatau ona faaalia. Mafaufau i le lotofaafetai e tai pei o se laau e ola i le palapala e taʻua o le lotomaulalo. E iloa e tagata lotomaulalo e latou te manaʻomia le fesoasoani ina ia taulau ai i so o se mea latou te faia. O lenā uiga e latou te faaalia ai le lotofaafetai i ē na lagolagosua iā i latou.

  

  Mataupu silisili o le Tusi Paia: “Ia faia ma le lotomaulalo, i le manatu ua sili isi iā te outou, ia vaavaai ma le naunau e lē gata i au lava mea, ae i mea foʻi e lelei ai isi.”—Filipi 2:3, 4.

  “O nisi taimi, e matou te taaalo ai i le taaloga na matou faaigoaina o le ʻlototalisapaia’ pe a fai a matou meaʻai i le afiafi. E taʻu mai lava e le tagata ia se mea na ia lotofaafetai ai i lenā aso. E aogā i tagata uma ina ia i ai se vaaiga saʻo ma lotofaafetai ai, nai lo o le i ai o se vaaiga sesē ma le manatu faapito.”—Tamara.

Fesoasoani: Faataatia se faaaʻoaʻoga lelei. E faigofie atu ona faaalia e fanau le lotofaafetai, pe a latou faalogo o loo e faaalia e lē aunoa le lotofaafetai i isi ma i latou.