UA FESILI MAI TALAVOU
E Faapefea Ona Ou Iloa Talanoa ma Isi?
I lenei mataupu
Aiseā e lelei ai le talanoa faafesagaʻi?
E manatu nisi e faigatā le talanoa faafesagaʻi, e lē pei o le fesootaʻi i text.
“E sili atu le popole pe a talanoa faafesagaʻi ona e lē mafai ona toe sui pe tapē sau tala na fai.”—Anna.
“O le text e pei o se ata tifaga na puʻeina, ae o le talanoa faafesagaʻi e tai pei o se ata o loo faatino i luma o tagata. Pe a ou talanoa ma se isi, e pau lava le mea ou te popole ai, ia aua neʻi sesē saʻu upu.”—Jean.
Ae e manaʻomia ona e iloa talanoa faafesagaʻi ma tagata. Aiseā? Auā e iai le taimi o le a manaʻomia ai ona saʻili ni au uō fou, suʻe se galuega tumau, pe amata foʻi se faigāuō pe afai ua lava lou matua.
O le mea e lelei ai, o le talanoa faafesagaʻi e lē o se mea e tatau ona e fefe ai. E mafai ona e iloa le auala e talanoa faafesagaʻi ai, e tusa po o oe o se talavou e matamuli.
“E mautinoa o le a iai taimi e sesē ai sau tala ma e mā ai. Ae aua le soona faamamafaina i lou mafaufau.”—Neal.
E faapefea ona amata se talanoaga?
Ia fai ni fesili. Ia mafaufau i se mataupu e fiafia i ai tagata, ma amata ai se talanoaga. O se faataʻitaʻiga:
“Pe na toe alu se tou tafaoga talu ai nei?”
“Manaia ia o le website lea. Na e vaai muamua i ai?”
“Pe na e faalogo . . . ?”
E mafai foʻi ona e mafaufau i se mea e lua te tutusa ai ma le tagata. O se faataʻitaʻiga, pe e lua te aʻoʻoga pe faigaluega faatasi? Ia faia ni fesili e fua i mea e lua te tutusa ai.
“Ia mafaufau i ni fesili e te fiafia ai ma naunau e iloa le tali a tagata i na fesili.”—Maritza.
Se mea e faaeteete i ai: Aua neʻi pei oe o se leoleo o loo faia ni suʻesuʻega e ala i le tuʻifesili o le tagata. Aua foʻi e te faia ni fesili o le a māsiasi ai le tagata, e pei o le “Aiseā e ofu soo ai lou ofu lenā?” po o le “Aiseā na lē uma ai au aʻoga?” Ia mātau, o le fesili lona lua e pei o se fesili suʻesuʻevale.
Aua foʻi neʻi pei oe o se leoleo o loo faia ni suʻesuʻega e ala i le faailoa atu o ou manatu i lau fesili a o leʻi tali mai po o le uma foʻi ona tali mai o le tagata. I se isi faaupuga, ia talatalanoa ma le tagata nai lo o le faia o fesili e pei o loo e suʻesuʻeina o ia.
Pe e pei au fesili o fesili a se leoleo o loo faia ni suʻesuʻega?
Mataupu silisili o le Tusi Paia: “O manatunatuga i le loto o le tagata, e pei o vai loloto ia, a o le tagata e iai le faautaga loloto, e na te utufia mai ai.”—Faataoto 20:5.
Ia faalogologo lelei. E faalagolago le sologa lelei o se talanoaga i lou faalogologo lelei nai lo o lou poto e tautala.
“Ou te taumafai e iloa se mea fou e faatatau i le tagata o loo ma talanoa. Pe a uma, ou te taumafai e manatua le mea na ia taʻu mai ina ia ou iloa se fesili e fai i ai pe a ma toe talanoa.”—Tamara.
Se mea e faaeteete i ai: Aua e te popole po o le ā le isi tala e fai atu. O le a e iloa le tala e fai atu pe afai e te faalogologo lelei.
Mataupu silisili o le Tusi Paia: “Ia faalogologo lelei . . . ae aua le vave ona tautala.”—Iakopo 1:19.
Ia naunau moni i isi. E sili atu ona e fiafia i se talanoaga pe a e uaʻi lelei i le tagata o loo lua talanoa.
“Pe a iloa e le tagata o loo e uaʻi atu i ana tala o loo fai, o le a sologa lelei le lua talanoaga e tusa pe e iai taimi e te lē iloa ai se tala e fai atu.”—Marie.
Se mea e faaeteete i ai: ʻAlofia le suʻesuʻevale. Atonu o le suʻesuʻevale lo tatou faapea atu “Manaia lou ofu. E fia le tau o lou ofu?”
Mataupu silisili o le Tusi Paia: “[Ia] vaavaai ma le naunau e lē gata i au lava mea, ae i mea foʻi e lelei ai isi.”—Filipi 2:4.
E faapefea ona e faaiʻuina se talanoaga? O le fautuaga lenei a se alii talavou e igoa iā Jordan: “Ia faaiʻu i ni upu faalaeiau. O le a faigofie ona fai se isi lua talanoaga i se taimi mulimuli ane pe a e faapea atu, ʻManaia le ta talanoaga’ pe ʻIa manuia lou aso.’”