O Aogā o le Taulaga a Iesu

I tausaga taʻitasi, e faapotopoto ai i le lalolagi aoao Molimau a Ieova ma le faitau miliona o ē valaaulia e faamanatu le maliu o Iesu e pei ona ia faatonuina. (Luka 22:19) E fesoasoani lenei sauniga iā i tatou e talisapaia ai le tāua o le taulaga na faia e Iesu, ina ua ia foaʻiina mai lona ola mo tagata. E tatou te aʻoaʻoina ai foʻi aogā o lana taulaga mo i tatou i le taimi lenei ma le lumanaʻi.—Ioane 3:16.

E tusa pe na e auai i le Faamanatuga i lenei tausaga pe leai, e faapefea ona aogā iā te oe le maliu o Iesu? E lua ni vala tāua na aʻoaʻoina i tatou e Iesu e tatau ona tatou faia:

1. Ia aʻoaʻoina e faatatau i le Atua ma Iesu. Na tatalo Iesu i lona Tamā e faapea: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”—Ioane 17:3.
2. Ia gaoioi e tusa ma mea ua e aʻoaʻoina. Na faamatilatila e Iesu e manaʻomia ona tatou faatatauina ana aʻoaʻoga i o tatou olaga. O se faataʻitaʻiga, na faaiʻu lana lauga taʻutaʻua i le mauga e ala i le avatu o le faamālō i so o se tasi e “faalogo i [ana] upu ma faia.” (Luka 6:46-48) Na iai foʻi se isi taimi na ia fetalai atu ai: “Afai ua outou iloa nei mea, e fiafia outou pe a outou faia.”—Ioane 13:17.

Pe e te fia aʻoaʻoina atili e faatatau i le Atua ma Iesu? Pe e te fia mauaina ni fautuaga aogā ina ia gaoioi ai e tusa ma mea ua e aʻoaʻoina? Mātau nisi o fesoasoani nei.

Suʻesuʻe le Tusi Paia

Ua fesoasoani a matou suʻesuʻega faale-Tusi Paia e faia e aunoa ma se totogi i le toʻatele o tagata e suʻesuʻe ai le Tusi Paia ma faatatauina i o latou olaga.

Tagaʻi i le vaega Suʻesuʻe Faatasi le Tusi Paia ma se Faiaʻoga ina ia iloa atili ai e faatatau i lenei polokalame.
Maimoa i le vitiō Le Auala e Fai ai Lau Suʻesuʻega Faale-Tusi Paia ina ia iloa ai le auala e faia ai talanoaga faale-Tusi Paia ma Molimau a Ieova.

Sauniga a Molimau a Ieova

E faalua ona faia sauniga a Molimau a Ieova i le vaiaso i a latou Maota mo Sauniga. I nei sauniga, e matou te iloiloina ai le Tusi Paia ma le auala e faatatau ai na aʻoaʻoga i o matou olaga.

E mafai ona auai ai so o se tasi i nei sauniga; e lē tau manaʻomia ona avea oe ma Molimau a Ieova ina ia e auai mai ai. E fua i le vaipanoa o loo e iai, e mafai ona e alu i le Maota mo Sauniga pe faaaogā le zoom.

Maimoa i le vitiō O ā Mea o Loo Faia i se Maota mo Sauniga? ina ia e malamalama ai i mea e faia i sauniga.

Ina ia saʻili se nofoaga lata ane o loo faia ai sauniga, tagaʻi i le vaega Sauniga a Molimau a Ieova.

Mataupu ma vitiō i le Initaneti

O le tele o mataupu ma vitiō i lenei Upega tafaʻilagi e fesoasoani iā te oe e aʻoaʻoina atili e faatatau i aʻoaʻoga a Iesu ma le tāua o lona maliu.

O se faaaʻoaʻoga, ina ia aʻoaʻoina pe e faapefea i le maliu o le tagata e toʻatasi ona maua ai e le faitau miliona o tagata aogā, faitau i mataupu “Na Faapefea ona Faasaoina i Tatou e Iesu?” ma le “Aiseā na Puapuaga ma Maliu ai Iesu?” pe maimoa i le vitiō Aiseā na Maliu ai Iesu?