Le Taumafaina na o Fualaau ʻAina ma Fualaau Faisua—O le ā le Manatu o le Tusi Paia?

I le lalolagi aoao, e toʻatele ua filifili e taumafa na o fualaau ʻaina ma fualaau faisua.

• “O le filifili e taumafa na o fualaau ʻaina ma fualaau faisua, o se auala e mafaufau ma ola ai tagata, ina ia ʻalofia ai le sauāina ma le faaaogāina o manu mo meaʻai, lavalava, ma isi mea.”—The Vegan Society.

Ua taumafa nisi na o fualaau ʻaina ma fualaau faisua, ona e lē gata e latou te manatu mamafa i manu, ae faapea foʻi le siʻosiʻomaga, le soifua mālōlōina, po o ni māfuaaga faalelotu.

• “O le taumafaina e tagata na o fualaau ʻaina ma fualaau faisua, e ese mai i isi auala e faatulaga ai meaʻai e aai ai (diet), ona e latou te vaai i ai o se talitonuga, filifiliga tauamio, ma o se gaoioiga e faaleleia ai le tulaga o le lalolagi.”—Britannica Academic.

Pe o le a faaleleia le tulaga o le lalolagi pe a taumafa tagata na o fualaau ʻaina ma fualaau faisua? O le ā le manatu o le Tusi Paia?

Le silafaga a Lē na foafoaina i tatou i tagata ma manu

Ua faailoa mai i le Tusi Paia le silafaga a Lē na foafoaina i tatou, o Ieova le Atua.a E sili atu tagata nai lo o manu i lana silafaga, ma ua ia tuuina atu i tagata le pule i manu uma. (Kenese 1:27, 28) E lē gata i lea, na faataga foʻi e le Atua tagata e faaaogā manu mo meaʻai. (Kenese 9:3) Peitaʻi, e na te lē taliaina le sauāina o manu.—Faataoto 12:10.

E tusa ai la ma le manatu o le Tusi Paia, o le aai i aano o manu o le filifiliga a le tagata lava ia.b O lenā filifiliga, e lē faalagolago i ai lo tatou taʻuleleia i le silafaga a le Atua. (1 Korinito 8:8) E lē tatau ona tatou faitioina filifiliga a isi e faatatau i meaʻai.—Roma 14:3.

Le auala e maua ai se lumanaʻi e sili ona lelei

Ua faailoa mai i le Tusi Paia, e lē mafai ona faaleleia faafitauli o le lalolagi, i le auala e tatou te filifili e ola ai. O le tele o faafitauli o le lalolagi ia ua lē mafai ona foʻia, e māfua mai i faiga faapolotiki, feutagaʻiga a tagata lautele ma faiga faapisinisi. Ua taʻua i le Tusi Paia:

• “O le mea ua faapiʻoina e lē mafai ona faasaʻoina.”—Failauga 1:15.

O le a foʻia e Lē na foafoaina i tatou faafitauli o loo tatou fesagaʻia i aso nei. O loo taʻua i le Tusi Paia i se gagana faafaatusa le gaoioiga o le a ia faia.

• “Ona ou iloa lea o le lagi fou ma le lalolagi fou; auā ua mavae atu le uluaʻi lagi ma le uluaʻi lalolagi, ua lē toe iai foʻi se sami.”—Faaaliga 21:1.

O le a suia e le Atua malo faaletagata po o “le uluaʻi lagi,” i “le lagi fou,” po o le pulega a lona Malo i le lagi. O le a tafiesea e lona Malo “le uluaʻi lalolagi” po o tagata amioleaga, ma pule mai i “le lalolagi fou,” po o ē e lotomalilie e gauaʻi i lana pulega.

E faatoʻā lelei atoatoa le siʻosiʻomaga ma ola filemu manu ma tagata, pe a pule le Malo o le Atua.—Isaia 11:6-9.