O Ai o le a Laveaʻia Tagata Lautele?—O le ā le Manatu o le Tusi Paia?

E tusa ai ma se lipoti a Malo Aufaatasi:

E mai iā Oketopa 7 e oo iā Oketopa 23, 2023, ua silia i le 6,400 tagata ua fasiotia, ae e silia ma le 15,200 i latou ua manunuʻa ona o le taua i Kasa i Isaraelu. O le toʻatele o i latou, o tagata lautele. E lē gata i lenā, e faitau selau afe i latou ua sulufaʻi atu i isi nofoaga.
E oo mai iā Setema 24, 2023, ua 9,701 tagata lautele ua fasiotia ae 17,748 ua manunuʻa i totonu o Ukraine, ona o le taua i le vā o Rusia ma Ukraine.

O le ā se faamoemoe ua faailoa mai i le Tusi Paia mo i latou ua mafatia ona o taua?

Se faamoemoe

Ua valoia mai i le Tusi Paia o le a ʻfaaiʻuina e le Atua taua i tuluʻiga o le lalolagi.’ (Salamo 46:9) O le a ia faaaogā se pulega po o se faigāmalo i le lagi, e suia faigāmalo uma a tagata i le lalolagi. (Tanielu 2:44) O le a aumaia e le Malo o le Atua se mapusaga mo tagata.

Mātau po o le ā o le a faia e Iesu Keriso, le Tupu o le Malo o le Atua:

“E laveaʻi e ia le tagata mativa o loo alaga mo se fesoasoani, atoa foʻi ma lē e faatauvaa ma lē ua leai sona fesoasoani. E tigā alofa o ia i lē ua faatauvaa ma lē ua mativa, e faaola foʻi e ia o ē ua matitiva. E laveaʻiina e ia i latou mai i le pule sauā ma faiga sauā.”—Salamo 72:12-14.

E ala mai i lona Malo, o le a aveesea atoatoa e le Atua mea leaga ma mafatiaga, ua māfua ona o taua ma faiga sauā.

“E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”—Faaaliga 21:4.

Ua toeitiiti ona faia lea e le Malo o le Atua o suiga tetele i le lalolagi. Na valoia mai i le Tusi Paia “taua ma tala o taua” o loo tatou vaaia i aso nei. (Mataio 24:6) O nei taua ma isi mea o loo tutupu, ua faamaonia mai ai ua tatou ola i “aso e gata ai” o pulega a tagata.—2 Timoteo 3:1.