Anton Petrus/Moment via Getty Images
IA FAAAUAU ONA MATAALA!
Po o le a Tupu se Taua a le Lalolagi?—O le ā le Manatu o le Tusi Paia?
A o faagasolo le 30 tausaga talu ai, na manatu ai le toʻatele ua sologa lelei ma faaauau pea ona faaleleia le vā o atunuu. Peitaʻi, e lē o le tulaga lenā pe a fua i mea na tutupu talu ai nei.
“Ua popole tagata i aafiaga i isi atunuu o le taua i Kasa, a o fetauaʻi ai Isaraelu ma Hezbollah i le tuaoi o Lepanona.”—Reuters, Ianuari 6, 2024.
“O osofaʻiga i nofoaga eseese a vaega o loo faatonutonuina e Iran, o le toe fausiaina o ana meatau faaniukilia, ma le ʻau faatasi atu i ai o Rusia ma Saina, ua faamataʻuina ai atunuu i le itu i sisifo.”—The New York Times, Ianuari 7, 2024.
“O loo faaauau pea ona faaleagaina vaega o Ukraine i osofaʻiga a Rusia.”—UN News, Ianuari 11, 2024.
“O le faatupulaʻia o le tamaoaiga ma le malosi faavaegaʻau o Saina, o le faateteleina o le lotonuu i Taiwan, ma le lē lelei o le vā o Saina ma le Iunaite Setete, e ono faigofie ona tulaʻi mai ai ni fetauaʻiga.”—The Japan Times, Ianuari 9, 2024.
O le ā le manatu o le Tusi Paia e faatatau i feeseeseaʻiga i le vā o atunuu o loo tatou vaaia i aso nei? Po o le a iʻu atu i se taua a le lalolagi?
Na valoia mai i le Tusi Paia mea o loo tutupu
E lē o valoia mai i le Tusi Paia se taua patino o loo tatou vaaia i aso nei. Peitaʻi, o loo valoia mai ai le tele o fetauaʻiga i o tatou aso, lea ua “aveesea ai le filemu mai i le lalolagi.”—Faaaliga 6:4.
O loo valoia mai i le tusi o Tanielu “i le taimi o le iʻuga,” o le a auai ai malo malolosi o le lalolagi i se “tautūleiga” po o le tausinioga mo le pule. O lenā tausinioga o le a faaalialia ai le malolosi o a latou vaegaʻau, ma faaaluina ai le tele o le “ʻoa” po o tupe.—Tanielu 11:40, 42, 43.
O se taua o le a oo mai
Ua faailoa mai i le Tusi Paia o le a matuā leaga le tulaga o le lalolagi. Na valoia e Iesu “o le a tupu le puapuaga tele, e leai sona tusa talu le amataga o le lalolagi.” (Mataio 24:21) O lenā “puapuaga tele,” o le a iʻu atu ai i se taua e taʻua o Amaketo, lea e faamatalaina o “le taua o le aso tele o le Atua o Lē e ona le malosi uma lava.”—Faaaliga 16:14, 16.
Peitaʻi, o le taua o Amaketo o le a faasaoina ai tagata, ae lē o le fasiotia ai. O lenā taua o le a faaiʻuina ai e le Atua pulega a tagata, ia o loo faapogaia le tele o taua. Ina ia iloa pe faapefea ona iʻu atu le taua o Amaketo i le filemu tumau, faitau i mataupu nei: