Auala e Maua ai le Fiafia i Nei Aso Faigatā—O le ā le Manatu o le Tusi Paia?

A o faagasolo nei aso faigatā, e lē mafai ona tatou pulea mea e tutupu iā i tatou. Peitaʻi, o lo tatou fiafia e faalagolago i le saʻo o la tatou vaaiga i mea, ae e lē fua i o tatou tulaga. Ua faapea mai le Tusi Paia e taʻua o le Good News Translation, “o tagata fiafia e fiafia o latou olaga i taimi uma,” e ui i faafitauli o loo feagai ma i latou. (Faataoto 15:15) E faapefea ona faateleina lo tatou fiafia? Ia mātau nisi o fautuaga a le Tusi Paia e fesoasoani iā te oe.

Taumafai e faatoʻafilemu lagona popole

Ua faapea mai le Tusi Paia: “O popolega i le loto o le tagata e faavaivai ai le loto, a o tala lelei e olioli ai le loto.”—Faataoto 12:25.

• E mafai ona fesoasoani le Tusi Paia iā te oe e faatoʻafilemu ou lagona popole. Mo nisi faamatalaga, ia faitau i le mataupu “Le Manatu o le Tusi Paia e Faatatau i le Popole.”

Taumafai e foʻia faalogona tuua toʻatasi

Ua faapea mai le Tusi Paia: “O le uō moni e alofa i taimi uma ma o ia o se uso ua fanau mo taimi o puapuaga.”—Faataoto 17:17.

• O loo maua i le Tusi Paia fautuaga e fesoasoani iā te oe e foʻia ai faalogona tuua toʻatasi, e ala i le atiaʻe o ni faauōga. Ia faitau i le mataupu “Atiaʻe Faauōga Ina ia Foʻia ai le Tuua Toʻatasi—Le Auala e Fesoasoani ai le Tusi Paia.”

Atiaʻe le alofa i le Atua ma tuaoi

Ua faapea mai le Tusi Paia: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa. . . . Ia e alofa atu i lou tuaoi e pei o oe lava iā te oe.”a—Mataio 22:37-39.

• O le tatalo e fesoasoani e atiaʻe ai lo tatou alofa i le Atua. Mo nisi faamatalaga, ia faitau i le mataupu “Po o Faafofoga le Atua i a Tatou Tatalo?”

• E faaalia lo tatou alofa i isi e ala i le feutagaʻi ma i latou e pei ona poloaʻia e Iesu. Ia faitau i nisi faamatalaga i le mataupu faa-Peretania “What Is the Golden Rule?”

Ia aʻoaʻo atili auala e fesoasoani ai le Tusi Paia iā te oe, ina ia maua le fiafia i nei aso faigatā. E matou te valaaulia oe e faataʻitaʻi se talanoaga faale-Tusi Paia e aunoa ma se totogi.